আই আই টি গুৱাহাটীৰ তিনি প্ৰাক্তন ছাত্ৰৰ চমক

Published Date: 3 November, 2026

আই আই টি গুৱাহাটীৰ তিনি প্ৰাক্তন ছাত্ৰৰ চমক

'আমাৰ অসম'ৰ ডিজিটেল ডেস্কঃ গণিতক গেমিংলৈ ৰূপান্তৰ কৰি ১০ মিলিয়ন ডলাৰৰ বিনিয়োগ লাভ ‘Matiks’-ৰ গণিতক কেৱল পাঠ্যপুথি আৰু পৰীক্ষাৰ বিষয় হিচাপে সীমাবদ্ধ নাৰাখি উপভোগ্য খেললৈ ৰূপান্তৰ কৰাৰ ব্যতিক্ৰমী চিন্তাৰে আন্তঃৰাষ্ট্ৰীয় পৰ্যায়ত চৰ্চা লাভ কৰিছে IIT গুৱাহাটীৰ তিনিজন প্ৰাক্তন ছাত্ৰই। তেওঁলোকৰ দ্বাৰা প্ৰতিষ্ঠিত বেংগালুৰুস্থিত ব্ৰেইন-গেমিং ষ্টাৰ্টআপ ‘Matiks’-এ শেহতীয়াকৈ ১০ মিলিয়ন মাৰ্কিন ডলাৰৰ নতুন বিনিয়োগ লাভ কৰিছে। প্ৰি-ছিৰিজ A পৰ্যায়ৰ এই বিনিয়োগৰ নেতৃত্ব দিছে General Catalyst-এ। ইয়াৰ ফলত প্ৰতিষ্ঠানটোৰ মুঠ সংগৃহীত পুঁজিৰ পৰিমাণ ১৩.৫ মিলিয়ন ডলাৰৰো অধিক হৈছে। ২০২৪ চনত সুধাংশু ভাটিয়া, মোহন কুমাৰ আৰু সুশান্ত টিম্মাপুৰে আৰম্ভ কৰিছিল Matiks। তিনিওগৰাকী ২০২২ চনত IIT গুৱাহাটীৰ পৰা স্নাতক ডিগ্ৰী লাভ কৰিছিল। নতুন বিনিয়োগৰ ৰাউণ্ডত উদ্যোগপতি ৰনি স্ক্ৰুৱালাৰ লগতে পূৰ্বৰ বিনিয়োগকাৰী Info Edge Ventures, Tanglin Venture Partners আৰু Untitled Ventures-য়েও অংশগ্ৰহণ কৰিছে। Matiks-ৰ মূল উদ্দেশ্য হৈছে মানসিক গণনা, স্মৃতিশক্তি, যুক্তি আৰু প্ৰহেলিকাৰ জৰিয়তে গণিতক অধিক আকৰ্ষণীয় কৰি তোলা। সাধাৰণতে গণিতক বহুতে কঠিন আৰু পৰীক্ষাকেন্দ্ৰিক বিষয় হিচাপে গণ্য কৰে। কিন্তু এই ষ্টাৰ্টআপটোৱে মোবাইল গেমৰ আৰ্হিত গণিতৰ বিভিন্ন সমস্যা আৰু প্ৰত্যাহ্বানক প্ৰতিযোগিতামূলক খেললৈ ৰূপান্তৰ কৰিছে। তিনিওগৰাকী প্ৰতিষ্ঠাপকৰ শৈক্ষিক পটভূমিও যথেষ্ট আকৰ্ষণীয়। সুধাংশু ভাটিয়াই Mathematics and Computing বিষয়ত অধ্যয়ন কৰাৰ লগতে Product Design-ত মাইনৰ ডিগ্ৰী গ্ৰহণ কৰিছিল। মানসিক গণনাত বিশেষ পাৰদৰ্শিতা থকা সুধাংশুৱে ২০১৬ চনত Junior Mental Calculation World Cup-ত বিজয়ী হৈছিল। তেওঁ Limca Book of Records আৰু India Book of Records-তো স্থান লাভ কৰিছিল। আনহাতে, সুশান্ত টিম্মাপুৰে Electrical, Electronics and Communications Engineering বিষয়ত অধ্যয়ন কৰিছিল। Product Design-তো মাইনৰ ডিগ্ৰী গ্ৰহণ কৰা সুশান্ত এগৰাকী ৰাষ্ট্ৰীয় পৰ্যায়ৰ মানসিক গণিতৰ চেম্পিয়ন। তৃতীয় প্ৰতিষ্ঠাপক মোহন কুমাৰৰ জীৱনযাত্ৰা কিছু ব্যতিক্ৰমী। বিহাৰৰ এখন দুৰ্গম গাঁৱত জন্মগ্ৰহণ কৰা মোহনে শৈশৱতে শিক্ষাৰ সীমিত সুবিধাৰ মাজেৰে আগবাঢ়িছিল। ছবি অঁকা আৰু সংগীতৰ প্ৰতি আগ্ৰহী মোহনে দশম শ্ৰেণীৰ পিছত গণিতৰ প্ৰতি অধিক আকৰ্ষিত হৈ IIT-JEE পৰীক্ষাৰ বাবে প্ৰস্তুতি আৰম্ভ কৰে। ২০১৮ চনত IIT গুৱাহাটীৰ Computer Science and Engineering বিভাগত নামভৰ্তি লাভ কৰে। পৰৱৰ্তী সময়ত Sprinklr-ত ইণ্টাৰ্নশ্বিপ কৰাৰ লগতে Product Engineer হিচাপে কৰ্মজীৱন আৰম্ভ কৰে। ২০২৪ চনত কৰ্প'ৰেট চাকৰি এৰি Matiks গঢ়ি তোলাত মনোনিৱেশ কৰে। বৰ্তমান তেওঁ প্ৰতিষ্ঠানটোৰ সহ-প্ৰতিষ্ঠাপক তথা মুখ্য প্ৰযুক্তি বিষয়া (CTO)।

Matiks আৰম্ভ কৰাৰ আঁৰত আছিল মানুহৰ দৈনন্দিন জীৱনত গণিতৰ প্ৰতি আগ্ৰহ বৃদ্ধি কৰাৰ চিন্তা। সামাজিক মাধ্যমত সময় কটোৱাৰ পৰিৱৰ্তে মানুহক মগজুৰ সক্ৰিয় ব্যৱহাৰৰ প্ৰতি আকৰ্ষিত কৰাৰ লক্ষ্যৰে সুধাংশু ভাটিয়াই এই ধাৰণাটোৰ ওপৰত কাম আৰম্ভ কৰিছিল। পৰৱৰ্তী সময়ত তিনিওজন বন্ধুৱে এই চিন্তাক এক ব্যৱসায়িক ৰূপ দিয়ে। এই প্লেটফৰ্মত খেলুৱৈসকলে প্ৰথমে কম্পিউটাৰ নিয়ন্ত্ৰিত প্ৰতিদ্বন্দ্বীৰ সৈতে অনুশীলন কৰিব পাৰে। তাৰ পাছত আন খেলুৱৈৰ সৈতে প্ৰতিযোগিতাত অংশগ্ৰহণৰ সুবিধা আছে। দৈনিক প্ৰত্যাহ্বান, পুৰস্কাৰ আৰু বিভিন্ন লক্ষ্যৰ জৰিয়তে ব্যৱহাৰকাৰীক নিয়মীয়াকৈ খেলিবলৈ উৎসাহিত কৰা হয়। প্ৰতিষ্ঠাপকসকলৰ মতে, তেওঁলোকৰ লক্ষ্য কেৱল এটা গেমিং এপ নিৰ্মাণ কৰা নহয়, বৰং গণিতক ক্ৰীড়াৰ দৰে জনপ্ৰিয় কৰি তোলা। ২০২৬ চনত Matiks-ৰ ব্যৱহাৰকাৰীৰ সংখ্যা দ্ৰুতগতিত বৃদ্ধি পাইছে। প্ৰতিষ্ঠানটোৰ প্ৰকাশিত তথ্য অনুসৰি, বছৰৰ আৰম্ভণিতে দৈনিক সক্ৰিয় ব্যৱহাৰকাৰীৰ সংখ্যা প্ৰায় ২২ হাজাৰ আছিল যদিও ছেপ্টেম্বৰলৈ এই সংখ্যা ৩ লাখ অতিক্ৰম কৰে। একেটা মাহতে মাহেকীয়া সক্ৰিয় ব্যৱহাৰকাৰীৰ সংখ্যা ২২ লাখত উপনীত হোৱাৰ লগতে খেলুৱৈসকলে মুঠ ৪.৮ কোটি গেমত অংশগ্ৰহণ কৰে। ভাৰত বৰ্তমান প্ৰতিষ্ঠানটোৰ সৰ্ববৃহৎ বজাৰ। ইয়াৰ উপৰি আমেৰিকা, দক্ষিণ কোৰিয়া আৰু জাপানতো ব্যৱহাৰকাৰীৰ সংখ্যা বৃদ্ধি পাইছে। আন্তঃৰাষ্ট্ৰীয় বজাৰত অধিক সম্প্ৰসাৰণৰ লক্ষ্যৰে স্থানীয় ভাষা আৰু ব্যৱহাৰকাৰীৰ প্ৰয়োজন অনুসৰি নতুন সুবিধা সংযোজনৰ পৰিকল্পনা কৰিছে প্ৰতিষ্ঠানটোৱে। ইয়াৰ সমান্তৰালভাৱে গেমৰ বিশ্লেষণ, অনুশীলনৰ সুবিধা আৰু অতিৰিক্ত ফিচাৰযুক্ত পেইড ছাবস্ক্ৰিপচনৰ ব্যৱস্থাও পৰীক্ষা কৰি থকা হৈছে। ‘Jelo’ নামৰ আন এটা প্লেটফৰ্মৰ জৰিয়তে ব্যৱহাৰকাৰীয়ে নিজাকৈ গেম সৃষ্টি কৰি আনক খেলিবলৈ দিয়াৰ সুবিধা প্ৰদানৰ পৰিকল্পনাও কৰিছে Matiks-এ। কৃত্ৰিম বুদ্ধিমত্তাৰ সহায়ত গেম নিৰ্মাণৰ সম্ভাৱনাও পৰীক্ষা কৰি থকা হৈছে। বৰ্তমান ৪১ জন পূৰ্ণকালীন কৰ্মচাৰীৰে পৰিচালিত প্ৰতিষ্ঠানটোৱে নতুন বিনিয়োগ আন্তঃৰাষ্ট্ৰীয় সম্প্ৰসাৰণ, প্ৰযুক্তিৰ উন্নয়ন আৰু গেমিং ব্যৱস্থাটো অধিক শক্তিশালী কৰাৰ কামত ব্যৱহাৰ কৰিব। IIT গুৱাহাটীত আৰম্ভ হোৱা তিনিজন বন্ধুৰ চিন্তাই আজি আন্তঃৰাষ্ট্ৰীয় বিনিয়োগকাৰীৰ দৃষ্টি আকৰ্ষণ কৰিবলৈ সক্ষম হৈছে। গণিতৰ প্ৰতি মানুহৰ পৰম্পৰাগত ধাৰণা সলনি কৰি ইয়াক উপভোগ্য আৰু প্ৰতিযোগিতামূলক অভ্যাসলৈ ৰূপান্তৰ কৰাৰ এই প্ৰচেষ্টাই ভাৰতীয় ষ্টাৰ্টআপ জগতত এক নতুন সম্ভাৱনাৰ দুৱাৰ মুকলি কৰিছে।