গেম ভিলেজত লাভলীনা, মেৰী কম
আমাৰ অসম, ১৯ জুলাইঃ ২৩ জুলাইৰ পৰা আৰম্ভ হ’বলগীয়া টকিঅ’ অলিম্পিকত ভাগ ল’বলগীয়া ভাৰতীয় দলটোত আছে ৬৭ জন পুৰুষ আৰু ৫২ গৰাকী মহিলা খেলুৱৈ৷ তাৰ মাজত আছে উত্তৰ-পূৱৰ আঠগৰাকী খেলুৱৈ৷ এইসকলৰ মাজত নিসন্দেহে এইবাৰ সকলোৰে দৃষ্টি থাকিব উত্তৰ-পূৱৰ দুগৰাকী খেলুৱৈৰ ওপৰত৷ দুয়োগৰাকী হৈছে বক্সাৰ– অসমকন্যা লাভলীনা বৰগোঁহাইৰ লগতে ছবাৰৰ বিশ্ব মহিলা বক্সিং চেম্পিয়ন মণিপুৰৰ এম চি মেৰী কম৷ প্ৰথমবাৰৰ বাবে অলিম্পিকলৈ যোগ্যতা অৰ্জন কৰা ২৩ বছৰীয়া লাভলীনা হৈছে এইবাৰ অলিম্পিক পদকৰ প্ৰবল দাবীদাৰ৷ আনহাতে, ২০১২ চনৰ লণ্ডন অলিম্পিকৰ ব্ৰঞ্জৰ পদক বিজয়ী ৩৮ বছৰীয়া মেৰী কমক অন্তিমবাৰৰ বাবে দেখা যাব বিশ্বৰ সৰ্ববৃহৎ ক্ৰীড়া সমাৰোহখনত৷ মেৰী কম আৰু লাভলীনাসহ ভাৰতৰ জ্ঝজনীয়া বক্সিং দলটো ইতিমধ্যে প্ৰবেশ কৰিছে গেমছ ভিলেজত৷ চেফ ডে মিছন, অসমৰে বীৰেন্দ্ৰ প্ৰসাদ বৈশ্যৰ সৈতে মেৰী কম আৰু লাভলীনাৰ ফটো ইতিমধ্যে শ্বেয়াৰ কৰা হৈছে ছ’চিয়েল মিডিয়াত৷ ভাৰতীয় ভাৰোত্তোলন সন্থাৰ সভাপতিৰ দায়িত্বত থকা ৰাজ্য সভাৰ সাংসদ বৈশ্য ভাৰতীয় দলৰ চেফ ডে মিছনৰ দায়িত্বত থকাত লাভলীনাৰ লগতে উত্তৰ-পূৱৰ আন খেলুৱৈসকলৰ বাবে পৰিবেশ সহজ হৈ পৰিছে৷ ভাৰতীয় ক্ৰীড়াক্ষেত্ৰত বীৰেন্দ্ৰ প্ৰসাদ বৈশ্য অচিনাকী নাম নহয়৷ দীৰ্ঘ সময় ধৰি তেওঁ জড়িত আছে ক্ৰীড়াৰ সৈতে৷ খেলুৱৈৰ সৈতেও তেওঁৰ সম্পৰ্ক যথেষ্ট মধুৰ৷ তাৰ প্ৰমাণ টকিঅ’ অলিম্পিকৰ গেমছ ভিলেজতে পোৱা গৈছে৷ ভাৰতীয় দলটোৰ মুৰব্বী হোৱা হেতুকে প্ৰতিগৰাকী খেলুৱৈৰে খবৰ লৈছে তেওঁ, হাঁহি ফূৰ্তি কৰিছে সকলোৰে সৈতে৷ নিসন্দেহে বৈশ্যৰ এই আন্তৰিতা খেলুৱৈসকলৰ মনোবল বৃদ্ধিত সহায়ক হ’ব৷ লাভলীনা আৰু মেৰী কমৰ লগতে টকিঅ’ অলিম্পিকৰ বাবে ভাৰতীয় দলত থকা উত্তৰ-পূৱৰ আন খেলুৱৈসকল হৈছে নীলকান্ত শৰ্মা, সুশীলা চানু, লালৰেমচিয়ামী [হকী], মীৰাবাঈ চানু [ভাৰোত্তোলন], তৰুণদ্বীপ ৰায় [আৰ্চাৰী] আৰু সুশীলা লিকমাবাম [জুডো]৷