আৰ চি বিৰ বিৰুদ্ধে সবাতোকৈ সফল বলাৰ হিচাপে পৰিগণিত জাদেজা

আমাৰ অসম,১৪ এপ্ৰিলঃ ৰয়েল চেলেঞ্জাৰ্ছ বাংগালোৰৰ বিৰুদ্ধে আটাইতকৈ সফল বলাৰ হিচাপে পৰিগণিত হৈছে চেন্নাই ছুপাৰ কিংছৰ ৰবীন্দ্ৰ জাদেজা৷ দলটোৰ বিৰুদ্ধে সৰ্বাধিক উইকেট লাভ কৰা খেলুৱৈ হিচাপে চিহ্নিত হৈছে চি এছ কেৰ নতুন অধিনায়কজন৷ মঙলবাৰে আৰ চি বিৰ তিনিটাকৈ উইকেট লাভ কৰি এনে সফলতা লাভ কৰে খেলুৱৈজনে৷ এফ ডু প্লেছিছ নেতৃত্বাধীন দলটোৰ বিৰুদ্ধে জাদেজাই লাভ কৰা উইকেটৰ সংখ্যা হ’লগৈ এতিয়া ২৬ টা৷ আৰ চি বিৰ বিৰুদ্ধে সফল বলাৰৰ তালিকাত ৰবীন্দ্ৰ জাদেজাৰ পিছতে আছে যশপ্ৰীত বুমৰা আৰু আশীষ নেহৰা৷ দলটোৰ বিৰদ্ধে বুমৰা আৰু নেহৰাই  লাভ কৰা উইকেটৰ সংখ্যা ক্ৰমে ২৪ আৰু ২৩৷ মঙলবাৰৰ খেলখনত শিৱম ডুবেৰ অপৰাজিত ৯৫ আৰু ৰবিন উথাপ্পাৰ ৮০ ৰানৰ সহায়ত প্ৰথমে বেট ধৰি চেন্নাই ছুপাৰ কিংছে নিৰ্ধাৰিত অভাৰত চাৰিটা উইকেট হেৰুৱাই ২১৬ ৰান কৰিছিল৷ ৰয়েল চেলেঞ্জাৰ্ছ বাংগালোৰে নিধাৰ্ৰিত অভাৰত ৯ উইকেট হেকৰুৱাই ১৯৩ ৰান কৰি পৰাজয় বৰণ কৰে৷