পৰ্তুগালে চিন্তাত ৰাখিছে মৰক্কোক
ডিজিটেল ডেস্ক,১০ ডিচেম্বৰ: বিশ্ব ফুটবলৰ এসময়ৰ অন্যতম শ্ৰেষ্ঠ দল স্পেইনক হৰুৱাই আনন্দ উদ্যাপন কৰিলেও কাতাৰ বিশ্বকাপৰ কোৱাৰ্টাৰ ফাইনেলত অৱতীৰ্ণ হোৱাৰ পূৰ্বে মৰক্কোৰ খেলুৱৈসকলক যেন কিছু চাপত থকা দেখা গৈছে৷ ইয়াৰ কাৰণটো হৈছে কোৱাৰ্টাৰ ফাইনেলত দলটোৰ প্ৰতিপক্ষ হ’ব পৰ্তুগাল৷ ফাৰ্নাণ্ডো ছাণ্টোছৰ দলটোক পৰাস্ত কৰাটো যে সহজ নহয়, সেই কথা মৰক্কোৰ ফুটবলাৰে ভালদৰে জানে৷ তাৰকা খেলুৱৈ ক্ৰিষ্টিয়ানো ৰ’নাল্ডো স্বাভাৱিক ছন্দত নাথাকিলেও দলটোৰ আন খেলুৱৈসকলক লৈ যথেষ্ট আশাবাদী প্ৰশিক্ষকজন৷ ছুইজাৰলেণ্ডৰ বিৰুদ্ধে প্ৰি-কোৱাৰ্টাৰ ফাইনেলত পৰ্তুগাল জয়ী হৈছিল ৬-১ গ’লত৷ সেই খেলখনত হেট্ৰিক অৰ্জন কৰিছিল গনচালো ৰামোছে৷ এই ৰামোছৰ বিৰুদ্ধেও সতৰ্ক থাকিব লাগিব মৰক্কোৰ ৰক্ষণ বিভাগ৷ কাতাৰ বিশ্বকাপত এই পৰ্যন্ত দুৰ্দান্ত ফৰ্মত আছে মৰক্কো৷ এখনো খেলতো পৰাস্ত হোৱা নাই৷ গ্ৰুপৰ প্ৰথমখন খেলত উৰুগুৱেৰ সৈতে গ’লশূন্য ড্ৰ খেলিছিল৷ তাৰ পাছত বেলজিয়াম, কানাডা আৰু স্পেইনক পৰাস্ত কৰি অন্তিম আঠ স্থানত উপনীত হৈছে৷ শনিবাৰে পৰ্তুগালৰ বিৰুদ্ধে জয় সম্ভৱ হ’লে আফ্ৰিকান দেশ হিচাপে অভিলেখ গঢ়িব মৰক্কোৱে৷ কিন্তু কোৱাৰ্টাৰ ফাইনেলত দলটোৱে ফাৰ্নাণ্ডো ছাণ্টোছৰ ৰণকৌশলৰ সন্মুখত কেনে প্ৰদৰ্শন দেখুৱায় তাক চাবলৈ উৎকণ্ঠাৰে বাট চাইছে ফুটবপ্ৰেমীয়ে৷ অভিজ্ঞতাৰ দিশৰ পৰা পৰ্তুগাল আগস্থানত থাকিলেও কাতাৰ বিশ্বকাপত এতিয়ালৈকে মৰক্কোৱে যি প্ৰদৰ্শন দেখুৱাইছে, তালৈ চাই কোৱাৰ্টাৰ ফাইনেলত দলটোৱে অঘটন ঘটোৱাৰ সম্ভাৱনা নিশ্চয় নুই কৰিব নোৱাৰি৷