ডিজিটেল সংবাদ, কাকপথাৰঃ তিনিচুকীয়া জিলাৰ শদিয়া বিধানসভা সমষ্টিৰ অন্তৰ্গত কাকপথাৰৰ গাতে লাগি থকা উৱন গাঁৱলৈ যোৱা কাকপথাৰ তিনিআলিত ১৫ নং ৰাষ্ট্ৰীয় ঘইপথ সংযোগী মূল পথটো কদৰ্য্যময় অৱস্থাই জ্বলাকলা খুৱাইছে গাওঁবাসীক ৷ এজাক বৰষুণ দিলেই বোকাময় হৈ পৰা পথটোৰে কণ কণ ছাত্ৰ-ছাত্ৰীসকল বিদ্যালয়লৈ অহাৰ ক্ষেত্ৰত বিপদসংকুল হৈ পৰাৰ লগতে উৱন সত্ৰলৈ আহ-যাহ কৰা দূৰ-দূৰণিৰ ভক্তসকলৰ উপৰি গাওঁবাসীয়ে দুৰ্ভোগ ভুগিব লগা হৈছে ৷ চতুৰ্থবাৰৰ বাবে বিধানসভালৈ নিৰ্বাচিত হোৱা বিধায়ক বলিন চেতিয়াৰ লগতে কাকপথাৰ গাওঁ পঞ্চায়তত পথটো মেৰামতিৰ বাবে গাওঁবাসীয়ে বহুবাৰ আবেদন নিবেদন কৰিও কোনো ফল নধৰাত গাওঁখনৰ এদল মহিলা আৰু কণ কণ ছাত্ৰ-ছাত্ৰীয়ে বোকাময় পথচোৱাত উপস্থিত হৈ তামোল-পাণৰ শৰাই লৈ বিধায়কগৰাকীক পথচোৱা মেৰামতি কৰিবলৈ কাতৰ আহ্বান জনাই প্ৰতিকী প্ৰতিবাদ সাব্যস্ত কৰে৷ গাওঁবাসীয়ে অভিযোগ কৰা অনুসৰি বিধায়কগৰাকীক আঢ়ৈ কিলোমিটাৰ দৈৰ্ঘ্যৰ এই পথটো মেৰামতি কৰিবলৈ বহুবাৰ আবেদন জনোৱাৰ পিছত বিধায়কগৰাকীয়ে প্ৰতিবাৰে পথটি নিৰ্মাণৰ আশ্বাসৰ দিয়ে যদিও আজিলৈকে কোনো ব্যৱস্থা গ্ৰহণ নকৰিলে ৷ এই মূল পথটি অনতিবিলম্বে যাতায়তৰ বাবে উপযুক্ত কৰি নুতুলিলে ১৫ নং ৰাষ্ট্ৰীয় ঘাইপথ অৱৰোধৰ কৰাৰ লগতে আগন্তুক নিৰ্বাচন বৰ্জন কৰা হব বুলিও গাওঁবাসীয়ে সকীয়াই দিয়ে ৷