‘আমাৰ অসম’ৰ ষ্টাফ ৰিপ’ৰ্টাৰ, ১৪ জুলাইঃ মাদ্ৰাছাৰ বিৰুদ্ধে কঠোৰ স্থিতি গ্ৰহণ কৰাৰ পাছত এইবাৰ মিঞাৰ বিৰুদ্ধে প্ৰতিযোগিতাত নামিবলৈ অসমীয়াক আহ্বান জনালে মুখ্যমন্ত্ৰী ড॰ হিমন্ত বিশ্ব শৰ্মাই৷ সাংসদ বদৰুদ্দিন আজমলে অসমীয়া সন্দৰ্ভত কৰা মন্তব্যৰ প্ৰত্যুত্তৰ দিবলৈ গৈ বৃহস্পতিবাৰে সংবাদ মাধ্যমৰ আগত মুখ্যমন্ত্ৰী ড॰ শৰ্মাই কয়–বদৰুদ্দিন আজমলে ঠিকে কৈছে, মিঞা অবিহনে যে অসম নহয়৷ এইটো কথা ময়ো অনুভৱ কৰোঁ৷ অসমত ঈদৰ দিনা গোটেই বাছবিলাক নোহোৱা হৈ যায়৷ আজমলে যে আমাক ইতিকিং কৰিছে সেইটো তথ্যগতভাৱে ইতিকিং কৰিছে৷ অসমীয়া মানুহে যে কাম কৰে আৰু মিঞাই যে কাম অলপ বেছি কৰে তাক লৈ আমি দ্বিমত কৰিব নোৱাৰোঁ৷ ঈদৰ দুদিন গুৱাহাটীত কোনো যান-জঁটে নাছিল৷ তাৰ মানে গুৱাহাটী মহানগৰীত চবজি বেপাৰৰ পৰা ট্ৰাক-বাছ-ৰিক্সা চলোৱালৈকে গোটেইখিনি মিঞাই কৰে৷ বদৰুদ্দিন আজমলে যিটো কথা কৈছে সেইটো আমি জাতিটোৰ প্ৰতি অপমানসূচক হিচাপে গণ্য কৰিব লাগে৷ অসমীয়াই ইয়াৰ প্ৰতিশোধ ল’ব লাগে কৰ্ম-সংস্কৃতিৰ মাজেদি৷ আজি যে আজমলেও আমাক ইতিকিং কৰিব পৰা হ’ল সেইটো আমাৰ গাত বিন্ধিব লাগিব৷ মোৰ গাত বিন্ধিব লাগিব৷ অসমীয়া ল’ৰাবিলাকে এই কামবিলাক আজুৰি ল’ব লাগিব, কাজিয়া কৰি নহয়৷ কেইদিনমান আগতে অমিত শ্বাহৰ মিটিং আছিল৷ মিটিংখন ঈদৰ দিনত পৰিল৷ মই মিটিংখন বাতিল কৰিবলগীয়া হ’ল৷ সকলোৱে ক’লে যে সেইদিনা বাছ পোৱা নাযাব৷ সকলো বাছৰ ড্ৰাইভাৰ মিঞা৷ গুৱাহাটীত যিমান বাছ আছে সেই গোটেই বাছৰ ৮০ শতাংশ ড্ৰাইভাৰ মিঞা৷ অ’লা-উবেৰৰ ৭০ শতাংশ ড্ৰাইভাৰ মিঞা৷ তেওঁলোকে যথেষ্ট উপাৰ্জনো কৰে৷ চৰকাৰে আঁচনিও দিবলৈ সাজু আছে৷ গতিকে বদৰুদ্দিন আজমলে যিটো ইতিকিং কৰিছে, তাক ইতিকিং হিচাপে ল’ব লাগে আৰু আমি লাচিত বৰফুকন, চিলাৰায়ৰ নাম লৈ জীয়াই থকা প্ৰাণৱন্ত অসমীয়াসকল এই প্ৰত্যাহ৩ান গ্ৰহণ কৰিব লাগে৷ আগন্তুক ৰ বছৰৰ ভিতৰত উজনীৰ প্ৰতিটো সমষ্টিত পৰা যদি ২০০জন ড্ৰাইভাৰ আহে, মধ্য অসমৰ প্ৰতিটো সমষ্টিৰ পৰা আহে তেন্তে গুৱাহাটী আমি পৰিষ্কাৰ কৰি দিব পাৰোঁ৷ ফ্লাই অভাৰৰ তলত যিমান সবজি বেপাৰী আছে তাত আমি বেপাৰ কৰিব পাৰোঁ৷ গাঁৱত সবজিৰ দাম কম৷ ইয়াত তেওঁলোকে ব্যৱসায় কৰে৷ তেওঁলোকেহে দাম বেছি লয়৷ অসমীয়া বেপাৰী হ’লে অসমীয়াৰ পৰা ইমান বেছি দাম নল’লেহেঁতেন৷ সবজিৰ বেছি দামকোনে লৈ আছে এইকেইদিন? মিঞা বেপাৰীবিলাকে বেছি দাম লৈ আছে৷ অসমীয়া বেপাৰী হ’লে নিজৰ পৰা আমি ইমান বেছি দাম নল’লোঁহেঁতেন৷ সেইকাৰণে ফ্লাই অভাৰ মই খালী কৰি দিম৷ শংকৰদেৱ কলাক্ষেত্ৰৰ ফ্লাই অভাৰ মই খালী কৰি দিলোঁ৷ গুৱাহাটীৰ গোটেই ফুটপাথ মই খালী কৰি দিম৷ অসমীয়া মানুহখিনি ওলাই আহক৷ আজমলে যি কৈছে অসমীয়া মানুহে ইয়াক অপমান বুলি ল’ব লাগে৷ আজমলৰ দৰে মানুহেও অসমীয়া জাতিক অপমান কৰিব পৰা হ’ল৷ তাতকৈ দুখৰ কথা কি থাকিব পাৰে৷ ১০০টা মেডিকেল ছীটৰ ৪৫ট তেওঁলোকৰ মানুহে পাইছে৷ কিন্তু আমাৰ মানুহে নপঢ়াটো বেয়া হৈছে৷ গাঁৱে গাঁৱে ছুপাৰ-১০, ছুপাৰ-৩০ খোলক ডাঙৰ ডাঙৰ কথা কোৱা মানুহবোৰে৷ আজমলৰ জয়গান গাই কি লাভ আছে৷ আজমলে স্বৰ্গৰ পৰা প্ৰফেচৰ অনা নাই৷ আজমলৰ প্ৰফেচৰবিলাকতো আমাৰেই মানুহ৷ প্ৰতিটো সমষ্টিত ছুপাৰ-৩০ খুলিব লাগে বিধায়কসকলে৷ মিঞাৰ আসন কিয় বেছি হ’ব লাগে৷ অসমত অসমীয়াৰ ছীট বেছি হ’ব লাগে৷