পুহৰ শীতৰ সেই মাদকতা আজি ক’ত
পুহৰ ঠাণ্ডা৷ কাৰোবাৰ বাবে ই মাদকতা, আন কাৰোবাৰ বাবে বিৰক্তি৷ জুহালৰ জুই আৰু লেপৰ তলৰ উমে পিছে পুহৰ ঠাণ্ডাত বিৰক্তিতকৈ বহুতৰ বাবে মাদকতা বেছি আনে৷ কিন্তু দিনে দিনে এই মাদকতা যেন কমি যাবলৈ ধৰিছে৷ পুহ যাবৰে হ’ল, কিন্তু মাদকতা অনা সেই ঠাণ্ডা আজি নোহোৱা হ’ল৷ জানুৱাৰীৰ প্ৰায় মাজভাগতো বিশেষ ঠাণ্ডা নাই৷ ঠাণ্ডা আপেক্ষিকভাৱে আগতকৈ বহু কমিছে৷ চহৰৰ পৰা বহু নিলগত থকা গাঁওবোৰত ঠাণ্ডা থাকিলেও গুৱাহাটী বা ব্যস্ত চহৰবোৰত দুপৰীয়া বেলিটোৰ তলত চাটি-ফুটি কৰে দেহ৷ দিনৰ ভাগত বেছি গৰম কাপোৰৰ প্ৰায় প্ৰয়োজনেই নাই৷ সন্ধ্যা নামিলেহে কিছু ঠাণ্ডা পৰে৷ কিন্তু কিয় এনে হৈছে? পৃথিৱীৰ উষ্ণতা বাঢ়িছে নেকি? যদি বাঢ়িছে, কিয়? কোন জগৰীয়া তাৰ বাবে? পৰিত্ৰাণৰ উপায় কি? মাজে-সময়ে এনে প্ৰশ্নই হয়তো বহুতকে চিন্তিত কৰি তোলে৷ ১৮৯৬ চনতেই নোবেল বঁটাপ্ৰাপক বিজ্ঞানী আৰ্হেনিয়াছে Philosophical Magazine and Journal of Science নামৰ গৱেষণা আলোচনীখনত উল্লেখ কৰিছিল যে কয়লাৰ [কাৰ্বন] দহনৰ ফলত উৎপন্ন হোৱা কাৰ্বন-ডাই-অক্সাইড গেছে এসময়ত পৃথিৱীৰ উত্তাপ বঢ়াই তুলিব৷ লক্ষণীয়ভাৱে আৰ্হেনিয়াছৰ এই ভৱিষ্যদ্বাণীৰ এশ বছৰ নোহোৱাৰ পৰাই বায়ুমণ্ডলত হোৱা কাৰ্বন-ডাই-অক্সাইডৰ অস্বাভাৱিক হাৰ বৃদ্ধিয়ে গোলকীয় উষ্ণতা বৃদ্ধি কৰি জলবায়ুৰ অভূতপূৰ্ব পৰিৱৰ্তন ঘটাইছে৷ কাৰ্বন-ডাই-অক্সাইডৰ সমান্তৰালভাৱে মানুহৰ বিভিন্ন কৰ্মৰাজিৰ বাবে নিৰ্গমন হোৱা মিথেন, নাইট্ৰাছ অক্সাইড, কাৰ্বন মন’-অক্সাইড, অজ’ন, ক্ল’ৰ’ফ্লুৰ’ কাৰ্বন আদি গেছেও গোলকীয় উষ্ণতা বৃদ্ধিত অৰিহণা যোগাই আহিছে৷ ভূপৃষ্ঠৰ উষ্ণতা বৃদ্ধিৰ বাবে জগৰীয়া এই গেছসমূহক সেউজ গৃহ গেছ বুলি কোৱা হয়৷ বিশেষকৈ কাৰ্বন-ডাই অক্সাইডক এই উষ্ণতা বৃদ্ধিৰ পৰিঘটনাটোৰ মূল কাৰক হিচাপে গণ্য কৰা হয়৷ গোলকীয় উষ্ণতা বৃদ্ধি বা সেউজ গৃহ প্ৰভাৱ প্ৰধানতঃ দুইধৰণে হ’ব পাৰে– প্ৰাকৃতিক আৰু অপ্ৰাকৃতিক বা মানৱসৃষ্ট৷ কিন্তু সাম্প্ৰতিক সময়ত মানৱসৃষ্ট কাৰকৰ পৰা উৎপন্ন হোৱা সেউজ গৃহ গেছৰ মাত্ৰা বৃদ্ধিয়ে গোলকীয় উষ্ণতা অস্বাভাৱিক হাৰত বৃদ্ধি কৰিছে৷ আধুনিক বিশ্বৰ অপৰিহাৰ্য জীৱনশৈলীৰ বাবে ব্যৱহৃত বিভিন্ন কল-কাৰখানা, মটৰগাড়ী, ইন্ধনচালিত যন্ত্ৰ আদিৰ লগতে শক্তি উৎপাদনৰ বিভিন্ন ব্যৱস্থাই কাৰ্বন-ডাই-অক্সাইডৰ লগতে বিভিন্ন সেউজ গৃহ গেছৰ নিৰ্গমন দিনক দিনে বৃদ্ধি কৰিছে৷ তদুপৰি আমাৰ সকলোৰে জ্ঞাত যে সালোক সংশে¡ষণ প্ৰক্ৰিয়াৰ জৰিয়তে গছে পাতৰ সহায়ত বায়ুমণ্ডলত থকা কাৰ্বন-ডাই-অক্সাইড গেছ গ্ৰহণ কৰে আৰু অক্সিজেন গেছ এৰি দিয়ে৷ গছৰ এনে ক্ৰিয়াৰ বাবে বায়ুমণ্ডলত কাৰ্বন-ডাই-অক্সাইডৰ মাত্ৰা হ্ৰাস হয়৷ কিন্তু দুৰ্ভাগ্যজনকভাৱে জনবিস্ফোৰণ আৰু আধুনিকীকৰণৰ বাবে বাঢ়ি যোৱা বনাঞ্চল ধবংসকাৰ্যই বায়ুমণ্ডলত কাৰ্বন-ডাই-অক্সাইডৰ পৰিমাণ বৃদ্ধি কৰিছে৷ বিগত দুটা দশকত বায়ুমণ্ডলত এই সেউজ গৃহ গেছৰ পৰিমাণ ৬০ শতাংশতকৈও অধিক বৃদ্ধি পাইছে৷ প্ৰাপ্ত তথ্য মতে, সেউজ গৃহ গেছসমূহৰ অৱস্থিতিৰ ফলত পৃথিৱীৰ উষ্ণতা ১৭৭৩ চনৰ প্ৰাক্শিল্পায়ন যুগতকৈ ১০ চেলছিয়াছ বৃদ্ধি পাইছে আৰু অনাগত কেইবছৰমানৰ ভিতৰত ০.৭০ চেলছিয়াছপৰ্যন্ত বঢ়াৰ সম্ভাৱনা আছে৷ গোলকীয় উষ্ণতা ৫০ চেলছিয়াছতকৈ অধিক বৃদ্ধিয়ে পৃথিৱীৰ মুঠ জনসংখ্যাৰ ৭৪ শতাংশ মানুহক ক্ষতি কৰবি বুলি জনা যায়৷ বৰ্তমান বিশ্বত দেখা দিয়া বিভিন্ন প্ৰাকৃতিক ধবংসলীলাৰ প্ৰায়বোৰৰ বাবে সেউজগৃহ গেছসমূহেই দায়ী৷ সেউজ গৃহৰ ধবংসমুখী প্ৰভাৱৰ পৰা মানৱ জাতিৰ পৰিত্ৰাণৰ একমাত্ৰ উপায় হ’ল মানুহৰ কৰ্মৰাজিৰ দ্বাৰা সৃষ্ট সেউজ গৃহ গেছসমূহৰ, বিশেষকৈ কাৰ্বন-ডাই-অক্সাইডৰ নিৰ্গমন হ্ৰাস কৰোৱা৷ কাৰ্বন-ডাই-অক্সাইডৰ নিৰ্গমন হ্ৰাস কৰাৰ বাবে ৰাষ্ট্ৰসংঘয়ো জলবায়ু পৰিৱৰ্তনৰ কাৰ্যক্ৰম চুক্তিৰ জৰিয়তে বিভিন্ন দেশক ঐক্যবদ্ধভাৱে সন্মিলিত কৰি ক’প [COP- Conference of Parties] গঠন কৰে৷ ক’পৰ জৰিয়তে মানৱসৃষ্ট কাৰকসমূহ চিনাক্ত কৰি নাকী লগোৱাৰ ব্যৱস্থা কৰা হয় আৰু সেউজ প্ৰযুক্তিৰ জৰিয়তে কাৰ্বন-ডাই-অক্সাইডৰ নিৰ্গমন ৰোধ কৰাৰ পৰিকল্পনা কৰা হয়৷ কাৰ্বন-ডাই-অক্সাইডৰ নিৰ্গমন হ্ৰাস কৰাৰ বাবে জনসচেতনতা আটাইতকৈ জৰুৰী৷ যান-বাহন বৃদ্ধিয়ে যিহেতু কাৰ্বন-ডাই-অক্সাইডৰ নিৰ্গমন বৃদ্ধি কৰে, সেয়ে নাগৰিকে যান-বাহন ব্যৱহাৰৰ ক্ষেত্ৰত সচেতন হোৱা দৰকাৰ৷ ব্যক্তিগত বাহনৰ পৰিৱৰ্তে ৰাজহুৱা পৰিবহণৰ ব্যৱহাৰে কাৰ্বন-ডাই-অক্সাইডৰ লগতে যান-জঁটৰ পৰাও নাগৰিকক সকাহ দিব৷ বনাঞ্চল ধবংসৰ পৰা বিৰত থাকক৷ সময় থাকোঁতেই আমি সজাগ নহ’লে আমাৰেই অপকৰ্মৰ দ্বাৰা সৃষ্ট কাৰ্বন-ডাই-অক্সাইডে এদিন আমাকেই নিঃশেষ কৰিব৷