'আমাৰ অসম'ৰ টিংখাঙৰ প্ৰতিবেদক, ১৭ ফেব্ৰুৱাৰীঃ মাতৃহাৰা হ’ল অসম চৰকাৰৰ উদ্যোগ, বাণিজ্য আৰু ৰাজহুৱা প্ৰতিষ্ঠান তথা সাংস্কৃতিক পৰিক্ৰমা বিভাগৰ কেবিনেট মন্ত্ৰী বিমল বড়া৷ শনিবাৰে দিনৰ ১:৫৭ বজাত শেষ নিশ্বাস ত্যাগ কৰে বিমল বড়াৰ মাতৃয়ে ৷ 

টিংখাঙৰ কেছেৰুগুৰিৰ নিজা বাসগৃহত ৭৭ বছৰ বয়সত মৃত্যু হয় সৰবৰহী মহিলা ঘনকান্তি বড়াৰ৷ সৰবৰহী মহিলাগৰাকীৰ মৃত্যুৰ বাতৰি বিয়পি পৰাৰ লগে লগে অজস্ৰ গুণমুগ্ধৰ সমাগম ঘটে মন্ত্ৰীগৰাকীৰ বাসগৃহত৷ বিভিন্ন জনে নশ্বৰ দেহত পুষ্পাঞ্জলি অৰ্পণ কৰি শ্ৰদ্ধা নিবেদন কৰে ৷ 

মন্ত্ৰী বিমল বড়া জৰুৰী সভাত অংশ লোৱাৰ উদ্দেশ্যে দিল্লীত থকা অৱস্থাতে মাতৃৰ বিয়োগৰ বাতৰি পাই মৰ্মাহত হৈ পৰে৷ মাতৃৰ মৃত্যুৰ খবৰ পোৱাৰ লগে লগে মন্ত্ৰী বড়া দিল্লীৰ পৰা ঘৰলৈ ৰাওনা হৈছে ৷ পুত্ৰ ঘৰলৈ আহি পোৱাৰ পিছতহে অন্তোষ্টিক্ৰিয়া সম্পন্ন কৰা হ’ব ৷ ঘনকান্তি বড়াই দুগৰাকী পুত্ৰ, বোৱাৰী, দুগৰাকী বিবাহিতা কন্যা, নাতি-নাতিনীসহ বহু আত্মীয় স্বজনক ইহসংসাৰত এৰি থৈ গৈছে ৷ তেখেতৰ মৃত্যুত টিংখাঙত শোকৰ ছাঁ পৰিছে ৷