‘শ্ৰীৰঘুপতি’ৰ অভূতপূৰ্ব সফলতাৰ পাছত নতুন উদ্যমেৰে অসমীয়া ছবিৰ এক্সন হিৰ’ ৰবি শৰ্মাৰ আন এখন বিগ বাজেটৰ এক্সন থ্ৰিলাৰধৰ্মী নতুন অসমীয়া ছবি ‘ৰুদ্ৰ’ৰ মহুৰত শুকুৰবাৰে জ্যোতি চিত্ৰবনত অনুষ্ঠিত হৈ যায়৷ দক্ষ চিত্ৰ পৰিচালক পুলক গগৈৰ পুত্ৰ ৰূপক গগৈৰ পৰিচালনাৰে নিৰ্মাণ হ’ব লগা ‘ৰুদ্ৰ’ৰ শুকুৰবাৰে জ্যোতি চিত্ৰবনৰ বাকৰিত বহু গণ্যমান্য ব্যক্তিৰ উপস্থিতিত মহুৰত অনুষ্ঠান সম্পন্ন হৈ যায়৷ শ্যাম প্ৰডাকচনৰ বেনাৰত ৰূপক গগৈৰ কাহিনী-পৰিচালনা আৰু ৰাজেশ কুমাৰ ম’ৰৰ প্ৰযোজনাৰে নিৰ্মাণ হ’ব লগা ছবিখনৰ কাম এক্সন দৃশ্যৰে আৰম্ভ কৰা হয়৷ পৰিচালক ৰূপক গগৈৰ মাতৃ ৰেণু গগৈয়ে কেমেৰাত মাল্যাৰ্পণ কৰি ছবিৰ কাম শুভাৰম্ভ কৰা হয়৷ শিৱানন বৰুৱাই কেমেৰাৰ প্ৰথমটো শ্বট লয়৷

মহুৰত শ্বটৰ এক্সন দৃশ্যত ৰবি শৰ্মাৰ লগতে এটা যুৱকৰ দলে অংশ লয়৷ কেমেৰাৰ চুইচ অন কৰে মনোজ কুমাৰ কেৰিয়াই৷ নাৰিকল ভাঙে ওম প্ৰসাদ গাৰোদিয়াই৷ ছবিখনৰ এক্সন ডাইৰেক্টৰ হিচাপে মুম্বাইত প্ৰতিষ্ঠিত অসম সন্তান দীপক দাস৷ ইতিমধ্যে দীপক দাসে ‘ৰুদ্ৰ’ৰ বাবে এচাম যুৱকক সমৰকলাৰ প্ৰশিক্ষণ দি পাকৈত কৰি লৈছে৷ ছবিখনৰ মুখ্য চৰিত্ৰত এক্সন হিৰ’ ৰবি শৰ্মাই অভিনয় কৰাৰ লগতে নায়িকাৰ চৰিত্ৰত অভিনয় কৰিব প্ৰতিশ্ৰুতিসম্পন্ন অভিনেত্ৰী নন্দিনী কাশ্যপে৷ অন্যান্য চৰিত্ৰত অভিনয় কৰিব জয় কাশ্যপ, অৰ্চিতা আগৰৱালা, ৰাজীৱ ক্ৰ’, অনামিকা বৰ্মনকে ধৰি বহু ন-পুৰণি অভিনয় শিল্পীৰ সমাৱেশ ঘটিব ছবিখনত৷ ছবিখনত অভিনয়ৰ বাবে ৰাজ্যৰ ভিন্ন স্থানত অডিচনযোগে একাংশ শিল্পীক বাছনি কৰা হৈছিল৷