‘আমাৰ অসম’ৰ শিলচৰ আৰু হাইলাকান্দিৰ প্ৰতিনিধি, ১ জুনঃ ৰাজ্যৰ বান পৰিস্থিতি জটিল হৈয়েই আছে৷ বানত কক্‌বকাইছে ৰাজ্যৰ বিভিন্ন ঠাইৰ লাখ লাখ লোকে৷ চৰকাৰী তথ্য মতে, শুকুৰবাৰে নিশাপৰ্যন্ত বানত মৃত্যু হৈছে আঠজন লোকৰ৷ শেহতীয়াকৈ কপিলীৰ ধলে উটুৱাই নিছে দুজন যুৱকক৷ পশ্চিম কাৰ্বি আংলঙৰ সাতগাঁৱত বৃহস্পতিবাৰে নিশা এজন যুৱকক বানে উটুৱাই নিয়ে৷ হাইলাকান্দিত নৈত উটি গৈছে এটি শিশু৷ সমনীয়াৰ সৈতে শুকুৰবাৰে পুৱা পথৰ দাঁতিত খেলি থকাৰ সময়তে প্ৰবল সোঁতে উটুৱাই নিয়ে ধ্ৰুৱজিৎ দাস নামৰ সাত বছৰীয়া শিশুটিক৷ কিছু সময় পাছতে শিশুটোৰ মৃতদেহ উদ্ধাৰ কৰা হয়৷ পাঁচগ্ৰাম কালীনগৰ ষষ্ঠ ব্লকৰ সীতাংশু দাসৰ পুত্ৰ কণমানি ধ্ৰুৱজিতৰ মৃত্যুত অঞ্চলটোত শোকৰ ছাঁ পৰে৷ ৰাজ্যৰ বিভিন্ন ঠাইত নৈ-উপনৈসমূহৰ পানী বৃদ্ধি পোৱাৰ লগতে কৃত্ৰিম বানৰো প্ৰকোপ চৰিছে৷ ঠায়ে ঠায়ে ভূমিস্খলন হৈছে৷ ঘৰ-বাৰী, খেতিপথাৰ আদি জলমগ্ন হৈছে৷ মানুহৰ লগতে পশুধনৰো বিলাই-বিপত্তিৰ সীমা নোহোৱা হৈছে৷ ইফালে, শুকুৰবাৰে পুৱা পুনৰ শিলচৰ-কালাইন পথৰ তাৰাপুৰ শিৱবাৰী পথৰ লগতে নদীৰ পানী আৰু মথাউৰিৰ পৰিস্থিতি পৰিদৰ্শন কৰে জলসম্পদ মন্ত্ৰী পীয়ূষ হাজৰিকাই৷ ভ্ৰমণৰ সময়ত তেওঁ কয় যে আগন্তুক দহদিনৰ ভিতৰত শিলচৰ-কালাইন পথৰ তাৰাপুৰ শিৱবাৰী পথৰ নিৰ্মাণৰ কাম আৰম্ভ হ’ব৷ ইয়াত গড়কাপ্টানী বিভাগে ২১০ মিটাৰ এলিভেটেড ৰোড নিৰ্মাণ কৰিব৷  পথৰ সমান্তৰালকৈ নদী বান্ধৰ সমস্যা আৰু নাথাকিব৷ এই চৰকাৰখনে বানত আক্ৰান্তৰ সমস্যা সমাধানৰ বাবে চেষ্টা চলাই আছে৷ দহদিনৰ ভিতৰত পথ নিৰ্মাণ আৰম্ভ হ’ব৷ তেওঁ কয়– প্ৰতিটো বিভাগে বানৰ সময়ত বান নিয়ন্ত্ৰণৰ বাবে দিনে-নিশাই কাম কৰি আছে৷ এতিয়ালৈ কাছাৰত কোনো ধৰণৰ মথাউৰি ভঙা নাই৷ ৰিমালৰ প্ৰভাৱত বৰাক নদীৰ পানী বিপদসীমাৰ ওপৰৰে বৈছে৷ বাঢ়নী পানী দুই -তিনিদিনৰ কমিব৷ বৰাক উপত্যকাত প্ৰৱল বৰষুণৰ দ্বাৰা প্ৰভাৱিত এলেকাসমূহ পৰিদৰ্শন কৰি মন্ত্ৰী হাজৰিকাই কয়– ১৫ দিনৰ ভিতৰত সকলো ক্ষতিগ্ৰস্ত মথাউৰি পুননিৰ্মাণ কৰা হ’ব৷ মন্ত্ৰীজনৰ সৈতে শিলচৰৰ বিধায়ক দীপায়ন চক্ৰৱৰ্তী আৰু লক্ষীপুৰৰ বিধায়ক কৌশিক ৰায়ৰ লগতে বিভাগীয় বিষয়াসকল বান পৰিস্থিতিৰ বুজ লয়৷ ইপিনে বৰাক উপত্যকাৰ সৈতে বহিঃৰাজ্যসহ গুৱাহাটীৰে  যোগাযোগ বিচ্ছিন্ন হৈ পৰিছে৷ একমাত্ৰ বিমান সেৱা চলিছে যদিও ভাৰা তিনিগুণ বৃদ্ধি পাইছে৷ শিলচৰ, কাছাৰ জিলাত অপৰিৱৰ্তিত হৈ আছে বান পৰিস্থিতি৷ লাখতকৈ বেছি পোহনীয়া পশুধন ক্ষতিগ্ৰস্ত হৈছে আৰু ১৫২৩ হেক্টৰ শস্যভূমি বানত ডুব গৈছে৷ শিলচৰ অন্নপূৰ্ণা ঘাটত বৰাক নৈৰ জলপৃষ্ঠ ২১ঃ৫৪ মিটাৰ ওপৰৰে বৈ আছে৷ ইয়াত বিপদসীমা ১৯ঃ৮৩ ছেণ্টিমিটাৰ৷ জিলাখনৰ মুঠ ১৫০খন ৰাজহ গাঁও বানত ক্ষতিগ্ৰস্ত হৈছে৷  ইয়াৰ ভিতৰত উদাৰবন্দ ৰাজহ চক্ৰৰ ২৩খন ৰাজহ গাঁও, শিলচৰৰ ৩২খন, সোণাইৰ ১৬খন, লক্ষীপুৰৰ ৪খন আৰু কাটিগড়া ৰাজহ চক্ৰৰ ৭৫খন ৰাজহ গাঁও বানত ডুব গৈছে৷ মুঠতে বানাক্ৰান্ত লোকৰ সংখ্যা ১,০২,২৪৬ জন৷  ইয়াৰে ৪৪,২৭৫জন পুৰুষ, ৪৩,৬৪৪ গৰাকী মহিলা আৰু ১৪,৩২৭ টা শিশু৷ ইতিমধ্যে জিলাখনৰ ৫১টা আশ্ৰয় শিবিৰত আশ্ৰয় লৈছে বানাক্ৰান্তই৷ শিলচৰ আৰু কাটিগৰাত বানে ভয়াৱহ ৰূপ লৈছে৷ মন্ত্ৰী হাজৰিকাই কয়– বানত ক্ষতিগ্ৰস্তসকলে আবেদন কৰিব লাগিব৷  জিলা প্ৰশাসনৰ ৰাহাট এপৰ জৰিয়তে আবেদন কৰিব পাৰিব৷ ইফালে, জিলা পশুপালন আৰু চিকিৎসা বিভাগৰ বিষয়া জিতেন্দ্ৰ ভূঞাই কয় যে কাছাৰ জিলাত অধিক গো-ধন ক্ষতিগ্ৰস্ত হৈছে৷  তেওঁ কয়– আজিৰে পৰা গো-খাদ্য বিতৰণ কৰা হ’ব৷ প্ৰথম পৰ্যায়ত ২৫৬ কুইণ্টল পশু খাদ্য আৱণ্টন দিয়া হৈছে৷

‘আমাৰ অসম’ৰ হাইলাকান্দিৰ প্ৰতিনিধি, ১ জুনঃ হাইলাকান্দিত শুকুৰবাৰে পুনৰ কাটাখাল নৈৰ কোবাল সোঁতত উটি গৈ মৃত্যু হয় এটি ৭ বছৰীয়া শিশুৰ৷ মৃত শিশুটিৰ নাম ধ্ৰুৱজ্যোতি দাস৷ স্থানীয় কালীনগৰ ষষ্ঠ খণ্ডত সংঘটিত হৈছে এই ঘটনা৷ খবৰ অনুসৰি, শুকুৰবাৰে পুৱা শিতাংশু ৰঞ্জন দাস নামৰ এগৰাকী ব্যক্তিৰ দুই পুত্ৰ ক্ৰমে কুনাল দাস (১৩) আৰু ধ্ৰুৱজ্যোতি দাস (৭) কাটাখাল নৈৰ সোঁতত উটি যায়৷ ওচৰত থকা লোকসকলে কোনোমতে কুনালক বচাবলৈ সক্ষম হলেও ধ্ৰুৱজ্যোতি  সন্ধানহীন হৈ পৰে৷ পিছত খবৰ দিয়া হয় এছডিআৰএফক৷ এছডিআৰএফৰ জোৱানসকল ঘটনাস্থলীত উপস্থিত হৈ প্ৰায় চাৰি ঘণ্টা অভিযান চলাই অৱশেষত উদ্ধাৰ কৰে শিশুটিৰ মৃতদেহ৷ এই ঘটনাক কেন্দ্ৰ কৰি সমগ্ৰ এলেকাটোত শোকে বিৰাজ কৰিছে৷ ইপিনে, হাইলাকান্দিত মাত্ৰ দুই দিনত তিনিটাকৈ সলিল সমাধিৰ ঘটনা সংঘটিত হোৱাৰ পিছত অৱশেষত সজাগ হৈছে জিলা প্ৰশাসন৷ শুকুৰবাৰে হাইলাকান্দি জিলা দুৰ্যোগ শাখাই জনসাধাৰণক সাঁতোৰ, মাছ ধৰা, ৱাটাৰ ৰাফটিং, বানৰ পানীত গছৰ অৱশিষ্ট আৰু বাঁহ ধৰাৰ পৰা বিৰত থাকিবলৈ আহ্বান জনাইছে৷ জিলাখনৰ দুৰ্যোগ শাখাই বিভিন্ন প্ৰান্তত মাইকযোগে প্ৰচাৰ চলাই জনসাধাৰণক এই বিষয়ে সতৰ্ক থাকিবলৈ আহ্বান জনাইছে৷