'আমাৰ অসম’ৰ মাহমৰাৰ প্ৰতিবেদক, ১৪ আগষ্টঃ অসম চৰকাৰৰ স্বাস্থ্য বিভাগে ৰাজ্যৰ স্বাস্থ্যখণ্ডৰ অভূতপূৰ্ব উন্নয়ন হোৱা বুলি দাবী কৰি আহিছে যদিও প্ৰকৃততে অসমৰ স্বাস্থ্যখণ্ডৰ অৱস্থা উন্নত হৈছেনে, সেয়া এক ডাঙৰ প্ৰশ্ন হৈ পৰিছে। এখন এম্বুলেঞ্চৰ অভাৱৰ বাবেই চৰাইদেউত এটি আঢ়ৈ বছৰীয়া শিশুৰ কৰুণ মৃত্যু হোৱাৰ ঘটনাই এই বাস্তৱ ছবিখন পোহৰলৈ আহিছে । এই সন্দৰ্ভত প্ৰাপ্ত তথ্য অনুসৰি, চৰাইদেউ জিলাৰ শালকাঠনি চাহ বাগিছাৰ মেডেলা লাইনৰ নিৱাসী জেনিছ কুজুৰ আৰু মৰিয়ম কুজুৰৰ আঢ়ৈ বছৰীয়া পুত্ৰ সন্তান ৰিয়ান কুজুৰৰ সোমবাৰে সন্ধিয়া জ্বৰ হোৱাত বাগিচাখনৰ চিকিৎসালয়ত ভৰ্তি কৰে। বাগিচাৰ চিকিৎসালয়ত এগৰাকী নাৰ্ছে প্ৰাথমিক চিকিৎসা প্ৰদান কৰাৰ পাছত উন্নত চিকিৎসাৰ বাবে সোণাৰি ৰজাপুখুৰীস্থিত চৰাইদেউ অসামৰিক চিকিৎসালয়লৈ প্ৰেৰণ কৰে। লগে লগে শিশুটিক পিতৃ-মাতৃয়ে চৰাইদেউ অসামৰিক চিকিৎসালয়ত ভৰ্তি কৰে যদিও শিশুটিৰ স্বাস্থ্য অধিক অৱনতি ঘটাত নিশা প্ৰায় ১২ বজাত উন্নত চিকিৎসাৰ বাবে চিকিৎসকে ডিব্ৰুগড় অসম চিকিৎসা মহাবিদ্যালয়ত ভৰ্তি কৰাবলৈ পৰামৰ্শ আগবঢ়ায়।