নৱেম্বৰৰ শেষত ৰিয়াধত আই পি এলৰ নিলাম

নতুন দিল্লী, ৫ নৱেম্বৰ: ২০২৫ ছীজনৰ পূৰ্বে আই পি এলৰ মেগা নিলাম অনুষ্ঠিত হ’ব চলিত মাহৰ শেষলৈ৷ বি চি চি আইৰ এক সূত্ৰই জনোৱা মতে আই পি এলৰ আসন্ন মেগা নিলাম অনুষ্ঠিত হ’ব ছৌদি আৰৱৰ চহৰ ৰিয়াধত ২৪ আৰু ২৫ নৱেম্বৰত৷  আই পি এলৰ অপাৰেছন টীম ভেন্যু চূড়ান্ত কৰাৰ বাবে ৰিয়াধত আছে৷ বি চি চি আইৰ সূত্ৰটোৱে কয়–‘আই পি এলৰ নিলাম ৰিয়াধত হ’ব৷ সেই বিষয়ে ফ্ৰেন্সাইজীসমূহক জনোৱা হৈছে৷ সম্ভাৱ্য তাৰিখ২৪ আৰু ২৫ নৱেম্বৰ৷’ ঋষভ পণ্ট, শ্ৰেয়স আয়াৰ, কে এল ৰাহুল আদিৰ দৰে আগশাৰীৰ খেলুৱৈ এইবাৰ নিলামৰ অংশ হ’ব৷ ইতিমধ্যে আই পি এলৰ খেলুৱৈ ধৰি ৰখাৰ প্ৰক্ৰিয়া শেষ হৈছে৷ প্ৰতিটো দলে নিজৰ পৰিকল্পনা অনুসৰি ক্ৰিকেটাৰক ধৰি ৰাখিছে৷

আই পি এলৰ ১০টা দল মিলি ৪৬ জন ক্ৰিকেটাৰক আসন্ন তিনিটা ছীজনৰ বাবে দলত ৰাখি দিছে৷ নিলামত সকলো মিলি আৰু ২০৪ জন ক্ৰিকেটাৰ দলসমূহে লাভ কৰিব পাৰে৷ ইয়াৰ ভিতৰত বিদেশী ক্ৰিকেটাৰ থাকিব পাৰিব ৭০জন৷ বি চি চি আইৰ সূত্ৰটোৱে কয়–‘সকলো প্ৰস্তুতি চলি আছে৷ প্ৰস্ততি শেষ হ’লেই এই বিষয়ে আনুষ্ঠানিকভাৱে ঘোষণা কৰা হ’ব৷ ’ ২২ নৱেম্বৰৰ পৰা পাৰ্থত অষ্ট্ৰেলিয়াৰ বিৰুদ্ধে প্ৰথম টেষ্ট আৰম্ভ হ’ব৷ সেয়ে প্ৰথম টেষ্টৰ সময়তে আই পি এলৰ নিলাম হ’ব৷ উল্লেখ্য, যি টেলিভিশ্বন চেনেলে ব’ৰ্ডাৰ-গাভাস্কাৰ ট্ৰফী সম্প্ৰচাৰ কৰিব, সেই চেনেলেই আই পি এলৰ নিলামো সম্প্ৰচাৰ কৰিব৷ সেয়ে কোন সময়ত নিলাম অনুষ্ঠিত হ’ব সেই বিষয়ে আলোচনা চলিছে৷