‘আমাৰ অসম’ৰ মহানগৰ বাৰ্তা, ৮ জানুৱাৰীঃ ‘সাবোধান হওক, কেতিয়াও ছোছিয়েল মেডিয়াত বিজ্ঞাপন আৰু অচিনাকি গোটৰ পৰা বিনিয়োগৰ টিপ’ছ লওক৷ এইটো চাইবাৰ অপৰাধীৰ কৌশল হ’ব পাৰে আৰু ই আপোনাৰ সঞ্চয়ৰ পানী নিষ্কাশন কৰিব পাৰে৷ এনে যিক’নো মেটাৰত তৎক্ষণাত ৰাষ্ট্ৰীয় চাইবাৰ হেল্পোলাইন নম্বৰ লৈ ৰূপত কৰক৷’ –অসমীয়া লিপিত লিখা এই কথাখিনিৰ অৰ্থ বিচাৰি পোৱা টান৷ পঢ়িবলৈও টান, কোনোবাই ক’লে বুজি পাবলৈও টান৷ নিঃসন্দেহে এয়া অসমীয়া ভাষাৰ বিকৃত উপস্থাপন৷ কাৰোবাৰ মোবাইললৈ ফোন কৰিলে প্ৰায়েই হেল্ল’টিউনৰ ৰূপত ভাহি আহে অশুদ্ধ অসমীয়া উচ্ছাৰণ আৰু অসমীয়া ভাষাৰ অশুদ্ধ শব্দ আৰু বাক্যগাঁথনিৰে ভৰপূৰ এই কথাখিনি৷ 

এই সন্দৰ্ভত সৃষ্টি হোৱা তীব্ৰ ৰাজহুৱা প্ৰতিক্ৰিয়াৰ প্ৰতি টেলিকম বিভাগে গুৰুত্ব দিয়াৰ পৰিৱৰ্তে ধ্ৰুপদী ভাষাৰ মৰ্যাদা লাভ কৰা অসমীয়া ভাষাৰ ‘বস্ত্ৰহৰণ’ প্ৰক্ৰিয়া অব্যাহত ৰাখিছে৷ হাজাৰ প্ৰতিবাদতো ‘থমকি’ ৰোৱা নাই টেলিকম বিভাগ– টেলিকমৰ সৌজন্যত অসমীয়া ভাষাৰ শৰাধ চলি আছে, ‘সঞ্চয়ৰ পানী নিষ্কাশন’ৰ দৰে শব্দ লাখ লাখ মোবাইল গ্ৰাহকৰ কৰ্ণকুঁহৰত গুঞ্জৰিত হৈয়েই আছে৷ এই ঘটনাই অসমৰ ৰাইজক হতভম্ব কৰিছে যদিও অসমীয়া ভাষাৰ প্ৰতি টেলিকম বিভাগে প্ৰদৰ্শন কৰা অসৌজন্যমূলক আৰু অপমানজনক আচৰণৰ ক্ষেত্ৰত কুম্ভকৰ্ণৰ নিদ্ৰাত মগ্ন হৈ আছে জাতি-মাটি-ভেটি ৰক্ষাৰ শ্লোগান আওৰোৱা অসম চৰকাৰ আৰু অসমকে ধৰি উত্তৰ-পূৰ্বাঞ্চলক অষ্টলক্ষ্মী আখ্যা দিয়া কেন্দ্ৰৰ নৰেন্দ্ৰ মোদী চৰকাৰ৷ সদৌ অসম ছাত্ৰ সন্থাৰ মুখ্য উপদেষ্টা ড॰ সমুজ্জ্বল ভট্টাচাৰ্যই এই ঘটনাত গভীৰ উদ্বেগ প্ৰকাশ কৰিছে৷ 

ড॰ ভট্টাচাৰ্যই কয়– ‘চাইবাৰ অপৰাধ সন্দৰ্ভত সজাগতা সৃষ্টি কৰাৰ বাবে টেলিকম বিভাগে প্ৰস্তুত কৰা এই কলাৰটিউনৰ জৰিয়তে ধ্ৰুপদী ভাষাৰ মৰ্যাদা পোৱা অসমীয়া ভাষাক অপমান কৰা হৈছে৷ ভুল শব্দ, অশুদ্ধ বাক্যগাঁথনি আৰু বাৰেবাংকৰা উচ্ছাৰণেৰে অসমীয়া ভাষাৰ মৰ্যাদা হানি কৰা হৈছে৷ কোনো ভাষাৰ ক্ষেত্ৰত এনে হোৱাটো আমি নিবিচাৰোঁ৷ অসমীয়া এটা চহকী ঐতিহ্যসম্পন্ন আৰু সাংস্কৃতিক পৰম্পৰাৰে সমৃদ্ধ ভাষা৷ অসমীয়া ভাষাক অপমান কৰা এই হেল্ল’টিউন অচিৰেই বন্ধ কৰিবৰ বাবে আমি কেন্দ্ৰীয় চৰকাৰক আহ্বান জনাইছোঁ আৰু এই প্ৰসংগ কেন্দ্ৰীয় চৰকাৰৰ ওচৰত উত্থাপন কৰাৰ ক্ষেত্ৰত অনতিবিলম্বে কাৰ্যব্যৱস্থা গ্ৰহণ কৰিবলৈ অসম চৰকাৰক দাবী জনাইছোঁ৷ এই গোটেই বিষয়টো সন্দৰ্ভত কঠোৰ ব্যৱস্থা গ্ৰহণ কৰাৰ উপৰি অসমীয়া ভাষাক যথোপযুক্ত সন্মান প্ৰদৰ্শন কৰিবৰ বাবে আমি দুয়োখন চৰকাৰৰ লগতে সংশ্লিষ্ট টেলিফোন কোম্পানীসমূহক দাবী জনালোঁ৷’ ইপিনে, সদৌ অসম ছাত্ৰ সন্থাই এই বিভ্ৰান্তিকৰ বাৰ্তাৰ প্ৰচাৰ বন্ধ কৰাৰ দাবী জনোৱাৰ লগতে শুদ্ধ ৰূপত প্ৰচাৰ কৰাৰ দাবীৰে মঙলবাৰে প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী হিমন্তবিশ্ব শৰ্মালৈ জৰুৰী পত্ৰ প্ৰেৰণ কৰে৷ আছুৰ সভাপতি উৎপল শৰ্মা আৰু ভাৰপ্ৰাপ্ত সাধাৰণ সম্পাদক চৰ্জুন হাঞ্চেই কয়– ‘যোৱাটো বৰ্ষত অসমৰ জনসাধাৰণৰ বাবে আটাইতকৈ সুখৰ বতৰাবোৰৰ অন্যতম আছিল অসমীয়া ভাষাই ধ্ৰুপদী ভাষাৰ মৰ্যাদা লাভ কৰাটো৷ ভাৰত চৰকাৰে প্ৰদান কৰা এই স্বীকৃতিয়ে জাতিটোলৈ গৌৰৱ কঢ়িয়াই অনাৰ সমান্তৰালভাৱে ভাষাটোৰ প্ৰচাৰ, প্ৰসাৰ আৰু সংৰক্ষণৰ বাবে আমাক আটাইকে অধিক সচেতন আৰু দায়িত্বশীল কৰি তুলিলে৷ তেনে প্ৰেক্ষাপটতে শেহতীয়াকৈ ‘চাইবাৰ ছিকিউৰিটী’ৰ সজাগতাৰ নামত টেলিকম কোম্পানীসমূহে অসমীয়া ভাষাৰ বিকৃতকৰণেৰে প্ৰচাৰ কৰা এটি বাৰ্তাই সৰ্বত্ৰ প্ৰতিক্ৰিয়াৰ সৃষ্টি কৰিছে৷ অশুদ্ধ অনুবাদ আৰু উচ্ছাৰণেৰে টেলিকম কোম্পানীসমূহে ধ্ৰুপদী ভাষাটোৰ মৰ্যাদা হানি কৰি থকা কাৰ্যত ক্ষুব্ধ হৈ পৰিছে সদৌ অসম ছাত্ৰ সন্থা৷ এই বিভ্ৰান্তিকৰ বাৰ্তাৰ প্ৰচাৰ বন্ধ কৰি শুদ্ধ ৰূপত প্ৰচাৰ কৰাৰ দাবীৰে মঙলবাৰে প্ৰধানমন্ত্ৰী আৰু মুখ্যমন্ত্ৰীলৈ ছাত্ৰ সন্থাই জৰুৰী পত্ৰ প্ৰেৰণ কৰে৷ 

উল্লেখ্য, শেহতীয়াকৈ টেলিকম কোম্পানীসমূহে ‘চাইবাৰ ছিকিউৰিটী’ সন্দৰ্ভত এটা সজাগতা বাৰ্তা প্ৰচাৰ কৰি আছে৷ ভুল অনুবাদ, অশুদ্ধ উচ্ছাৰণ, ভুল শব্দ-বাক্য আৰু বিকৃত কথনশৈলীৰে অসমীয়া ভাষাটো বিকৃতভাৱে ব্যৱহাৰ কৰি আছে কোম্পানীসমূহে৷ বাৰ্তাটোৱে অসমৰ ৰাইজৰ মাজত সজাগতাতকৈ বেছি বিভ্ৰান্তি আৰু ক্ষোভৰহে সৃষ্টি কৰিছে৷ ধ্ৰুপদী ভাষাটোৰ এনে অপমান সহ্য কৰা নহ’ব৷ এই বিকৃত বাৰ্তাৰ প্ৰচাৰ বন্ধ হ’ব লাগে আৰু শুদ্ধকৈ বাণীবদ্ধ বাৰ্তাৰে সজাগতা সৃষ্টি কৰিব লাগে৷ ভাষাটোৰ মৰ্যাদা অটুট থাকিবই লাগিব৷’ ইফালে, অসমৰ বাতৰিকাকত, দূৰদৰ্শনকে ধৰি বৈদ্যুতিন সংবাদ মাধ্যম আৰু অন্যান্য মাধ্যমত অশুদ্ধ অনুবাদ আৰু উচ্ছাৰণেৰে প্ৰচাৰ হৈ থকা অসমীয়া ভাষাৰ বিজ্ঞাপনসমূহ বন্ধ কৰাৰ দাবী জনাইছে সদৌ অসম ছাত্ৰ সন্থাই৷ অসমৰ মুখ্যমন্ত্ৰীলৈ এই বিষয়ে জৰুৰী চিঠি প্ৰেৰণ কৰি ছাত্ৰ সন্থাই কয়– ‘দেশী-বিদেশী বিভিন্ন কোম্পানীয়ে অসমীয়া ভাষাত বিজ্ঞাপন প্ৰকাশৰ বেলিকা অসমীয়া ভাষাৰ উচ্ছাৰণ আৰু ব্যাকৰণৰ সামান্যতমো ধাৰণা নথকা বাহিৰা গোষ্ঠীৰ দ্বাৰা বিজ্ঞাপনসমূহ অনুবাদ কৰায়৷ তেনে বিজ্ঞাপনসমূহেৰে অসমৰ সংবাদ মাধ্যম, দেৱাল, হ’ৰ্ডিং ভৰি পৰিছে৷ এই বিজ্ঞাপনসমূহে ধ্ৰুপদী ভাষাৰ মৰ্যাদা পোৱা অসমীয়া ভাষাটোক নিতৌ অপমান কৰি আছে৷ এনে বিকৃত বিজ্ঞাপনৰ প্ৰচাৰ বন্ধ কৰিব লাগে৷ শুদ্ধকৈ অনুবাদ কৰি বিজ্ঞাপনসমূহ প্ৰচাৰ কৰিবলৈ কোম্পানীসমূহক বাধ্য কৰিব লাগে৷ অসমৰ উপযুক্ত থলুৱা ব্যক্তি বা অনুষ্ঠানক এনে কামত জড়িত কৰি ল’লে ভাষাটোৰ মৰ্যাদা অটুট থাকিব৷’