২৬ মাৰ্চত বৰ্ষাপাৰাত আইপিএল, নাচিব জেকলিনে

‘আমাৰ অসম’ৰ গুৱাহাটীৰ প্ৰতিবেদক, ২৩ মাৰ্চঃ  শনিবাৰৰে পৰা ইণ্ডিয়ান প্ৰিমিয়াৰ লীগ চমুকৈ আই পি এল আৰম্ভ হোৱাৰ লগে লগে গুৱাহাটীৰ মহানগৰীতো ক্ৰীড়ানুৰাগীৰ উচাহৰ যেন অন্ত নোহোৱা হৈ পৰিছে৷ কিয়নো এইবাৰো গুৱাহাটীৰ বৰ্ষাপাৰা ষ্টেডিয়ামত অনুষ্ঠিত হ’ব আই পি এছ ১৮ সংখ্যক সংস্কৰণৰ দুখনকৈ হাইভেল্টজ মেচ৷ অসম সন্তান ৰিয়ান পৰাগে নেতৃত্ব দিয়া ৰাজস্থান ৰয়েলছে গুৱাহাটীত দুখন মেচত অংশ ল’ব৷ ইতিমধ্যে ৰাজস্থান ৰয়েলছে গুৱাহাটীক হোম গ্ৰাউণ্ড হিচাপে গ্ৰহণ কৰিছে৷ ২৬ মাৰ্চত বৰ্ষাপাৰাত কলকাতা নাইট ৰাইডাৰ্ছ আৰু ৩০ মাৰ্চত চেন্নাই ছুপাৰ কিংছৰ লগত যুঁজ হ’ব ঘৰুৱা দল ৰাজস্থান ৰয়েলছৰ৷ লক্ষণীয়ভাৱে এইবাৰ আই পি এলৰ গৰ্ৱনিং কাউঞ্চিলে প্ৰতিখন আই পি এল ভেন্যুত প্ৰথমখন মেচৰ পূৰ্বে উদ্বোধনী অনুষ্ঠানৰ আয়োজন কৰিছে৷ সেই অনুসৰি ২৬ মাৰ্চত বৰ্ষাপাৰা ষ্টেডিয়ামৰ উদ্বোধনী অনুষ্ঠানত অংশ ল’ব বলীউডৰ মোহময়ী অভিনেত্ৰী জেকুলিন ফাৰ্নাণ্ডেজে৷

ইফালে ২৬ মাৰ্চত হ’বলগীয়া মেচখনৰ বাবে দেওবাৰে গুৱাহাটীত আহি উপস্থিত হয় কলকাতা নাইট ৰাইডাৰ্ছৰ দলটো৷ দেওবাৰে বিয়লি ভাগত বিশেষ বিমান যোগে বৰঝাৰত আহি উপস্থিত হোৱা দলটোক কটকটীয়া নিৰাপত্তা বেষ্টনীৰ মাজেৰে মহানগৰীৰ ৰেডিচন ব্লু হোটেললৈ লৈ যোৱা হয়৷ সোমবাৰে বৰ্ষাপাৰাত কলকাতা নাইট ৰাইডাৰ্ছৰ ক্ৰিকেটাৰ সকলে অনুশীলন কৰিব৷ আনহাতে সোমবাৰে গুৱাহাটীত আহি উপস্থিত হ’ব ৰাজস্থান ৰয়েলৰ্ছৰ দলটোও৷ এই মেচখনক লৈ গুৱাহাটীবাসীৰ উৎকণ্ঠা দুগুণলৈ বৃদ্ধি পাইছে৷ লক্ষণীয়ভাৱে দেশী-বিদেশী ক্ৰিকেটাৰসকলৰ সন্মুখত কদৰ্য গুৱাহাটীৰ চিৰ পৰিচিত ছবিখন ঢাকি ৰখাৰ বাবে ৰাজ্য চৰকাৰে ভৰলুৰ ওপৰত নেট লগাই ঢাকি পেলোৱা দেখা গৈছে৷ চৰকাৰৰ এই কাৰ্যক লৈ বিভিন্নজনে সমালোচনা কৰাও দেখা গৈছে৷ ইফালে বি চি চি আইৰ সচিব দেৱজিৎ শইকীয়াই সংবাদ মাধ্যমৰ আগত গুৱাহাটীত ২৬ মাৰ্চৰ মেচৰ উদ্বোধনী অনুষ্ঠানত বি চি চি আইৰ তত্বাৱধানত বলীউড অভিনেত্ৰী জেকুলিন ফাৰ্নাণ্ডেজৰ লগতে আন কেইবাজনো শিল্পীয়ে ২০-২৫ মিনিটৰ অনুষ্ঠান পৰিৱেশন কৰিব বুলি জানিবলৈ দিয়ে৷ চলিত বৰ্ষত বৰ্ষাপাৰা ষ্টেডিয়ামত প্ৰথমবাৰলৈ টেষ্ট মেচ আৰু মহিলা বিশ্বকাপৰ মেচ অনুষ্ঠিত হ’ব৷