কবি, অনুবাদক বিপুল কুমাৰ দত্তৰ অকাল বিয়োগ

'আমাৰ অসম'ৰ নলবাৰীৰ প্ৰতিবেদকঃ বন কৰা ছোৱালীৰ কবি বিপুল কুমাৰ দত্ত আৰু নাই। যোৱা নিশা গুৱাহাটীৰ এখন ব্যক্তিগত খণ্ডৰ চিকিৎসালয়ত চিকিৎসাধীন অৱস্থাত অকাল মৃত্যু ঘটে নলবাৰী জিলাৰ নিজ পকোৱা গাঁৱৰ নিবাসী কবি, অনুবাদক বিপুল কুমাৰ দত্তৰ। অসমীয়া আৰু বাংলা ভাষাত সমানে দখল থকা কবিগৰাকী অৱশেষত অজান দেশলৈ গুচি গ'ল। মৃত্যুৰ সময়ত তেওঁৰ বয়স আছিল ৫৫ বছৰ। উল্লেখ্য যে নলবাৰী জিলাৰ নিজ পকোৱা গাঁৱৰ পকোৱা হাইস্কুলৰ পৰা হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ হৈ পৰৱৰ্তী সময়ত টেক্সটাইল ইন্সটিটিউটৰ পৰা ডিপ্লমা লৈ হস্ততাঁত আৰু বস্ত্ৰ বিভাগত চাকৰিত যোগদান কৰা বিপুল কুমাৰ দত্ত আছিল সৰুৰে পৰা তীক্ষ্ণ বুদ্ধিসম্পন্ন। 

আহত পখীৰ গান, বাঁওফালৰ ফুটপাথ, বৰষুণৰ গান, আলোৰ বাতি, নতুন দিন, মানুহ, মাটি আৰু তৃতীয় বিশ্ব, শব্দৰ ভেলা, কবিৰ বেহেলা আদিৰ স্ৰষ্টা কবি বিপুল কুমাৰ দত্তই অসমীয়া কাব্য সাহিত্যৰ ভঁৰাল চহকী কৰি গৈছে। বিগত ২০১৭ চনত বাংলাদেশত 'কবিতা সংসদ সাহিত্য' পদক লাভ কৰিবলৈ সক্ষম হৈছিল এইগৰাকী কবি। কেইবাবাৰো বাংলাদেশৰ আন্তৰ্জাতিক কবি সন্মিলনলৈ আমন্ত্ৰিত হৈছিল কবি বিপুল কুমাৰ দত্ত। প্ৰগতিশীল কবি গৰাকীয়ে সহজ-সৰল চহা জীৱনক লৈ লিখিছিল কবিতা। এই গৰাকী কবিৰ অকাল বিয়োগত ম্ৰিয়মান হৈ পৰিছে নলবাৰীৰ কবিসমাজ। মৃত্যুৰ সময়ত তেওঁ পত্নীৰ লগতে একমাত্ৰ কন্যাসহ চাৰিজন জ্যেষ্ঠ ভ্ৰাতৃক ইহসংসাৰত এৰি থৈ যায়।