![image](https://aamarasom.com/uploads/posts/পাশ্বৰ্ক্ৰিয়াৰ ভয় নকৰিব, ভেকচিন লওক.jpg1621783070.jpg)
পাশ্বৰ্ক্ৰিয়াৰ ভয় নকৰিব, ভেকচিন লওক
আমাৰ অসম বিশেষঃ বিশ্বত্ৰাস ক’ভিডৰ পৰা নিস্তাৰ পাবলৈ মানব জাতিয়ে বিভিন্ন ধৰণে চেষ্টা অব্যাহত ৰাখিছে যদিও সম্পূৰ্ণৰূপে সফল হ’ব পৰা নাই৷ সম্প্ৰতি ক’ভিডৰ দ্বিতীয় ঢৌৱে কাঢ়ি নিছে শত সহশ্ৰজনৰ প্ৰাণ৷ মানবজাতিৰ সন্মুখত এক প্ৰত্যাহ্বান ৰূপত ধৰা দিছে ক’ভিড-১৯৷ ক’ভিড প্ৰতিৰোধৰ ক্ষেত্ৰত চৰকাৰে বিভিন্ন ধৰণে চেষ্টা অব্যাহত ৰাখিছে৷ ইয়াৰ মাজতে ৪০ উদ্ধৰ্ৰ তথা শেহতীয়াকৈ ১৮ বছৰ উদ্ধৰ্ৰ লোকসকলৰ ভেকচিনেচনৰ ব্যৱস্থা কৰিছে৷ কিন্তু একাংশই এই ভেকচিনৰ পৰা নিজকে আঁতৰাই ৰখা দেখা গৈছে৷ বিভিন্ন উৰাবাতৰিয়ে তেওঁলোকৰ মন মগজুত এনেদৰে ক্ৰিয়া কৰিছে যে তেওঁলোকে ভেকচিন ল’লেহে ক’ভিডত আক্ৰান্ত হ’ব বুলি যুক্তি দৰ্শাইছে ৷ এনে পৰিস্থিতিত নেশ্বনেল ইনষ্টিটিউট অব্ বায়’লজিকেলছ’ৰ অধ্যক্ষ ডাঃ অনুপ আনৱীকাৰৰ ভেকচিন সম্পৰ্কীয় এক সাক্ষাৎকাৰ আগবঢ়োৱা হ’ল——-
প্ৰশ্নঃ- ভেকচিন কোনসকল ব্যক্তিয়ে ল’ব পাৰে আৰু কোনে নোৱাৰে ৷
অ আ :— ইতিমধ্যে ৪০ বছৰ উৰ্ধৰ ব্যক্তিসকলৰ বাবে ভেকচিনেচনৰ ব্যৱস্থা কৰা হৈছে ৷ শেহতীয়াকৈ ১৮ বছৰ উৰ্ধৰ সকলৰ বাবেও ইয়াক মুকলি কৰি দিয়া হৈছে ৷ ভেকচিন লোৱাৰ পূৰ্বে সকলোৱে নিজৰ নাম ৰেজিষ্টাৰ কৰিব লাগিব ৷ তেওঁলোকক নিৰ্দিষ্ট সময়ত ভেকচিন দিয়াৰ বাবে যোগাযোগ কৰা হ’ব ৷ ভেকচিন সকলোৱে ল’ব পাৰে যদিও গৰ্ভৱতী মহিলা, যিকোনো মেডিচিন অথবা ভেকচিনৰ এলাৰ্জি থকা লোক , ক’ভিডৰ লক্ষণ থকা ব্যক্তি আদিয়ে এই ভেকচিন ল’ব নোৱাৰে ৷
প্ৰশ্নঃ- কভিশীল্ড নে ক’ভাক্সিন কোনটো ভেকচিন লোৱা উচিত ?
অ.আ — দুয়োটা ভেকচিনেই আমাৰ দেহত একেই কাম কৰে ৷ যিটো উপলব্ধ সেইটোৱে লোৱা উচিত৷ দুয়োটা সমানেই নিৰাপদ আৰু সমানেই কাম কৰে ৷
প্ৰশ্নঃ-ভেকচিন লোৱাৰ পিছত আমি কি কি সাৱধানতা বা কেয়াৰ লোৱা উচিত ?
অ.আ— ভেকচিন লোৱাৰ পিছত আধাঘণ্টাৰ বাবে ইমিউনাইজেশ্বন টীমে আপোনাক পৰ্যবেক্ষণ কৰিব ৷ সেই সময়ছোৱাত যদি কিবা পাশ্বৰ্ক্ৰিয়া হয় তেনেহলে আপুনি তেওঁলোকক জনাব লাগিব ৷ এটা অত্যন্ত গুৰুত্বপূৰ্ণ কথা হৈছে ভেকচিন লোৱাৰ পিছত যাতে কোনেও এইটো ভাবি নলয় যে এতিয়া আৰু চিন্তা কৰাৰ প্ৰয়োজন নাই৷ বা সাৱধানতা মানি নচলিলেও হ’ব ৷ মোৰ আৰু ক’ভিড নহয় ৷ তেনেকৈ ভাবিলে নিজৰ বিপদ মাতিহে আনিব ৷ সেয়ে ভেকচিন লোৱাৰ পিছতো মাস্ক ব্যৱহাৰ তথা দূৰত্ব বিধি মানি চলাতো অত্যন্ত আৱশ্যক ৷
প্ৰশ্নঃ- ভেকচিন ল’লেও ক’ভিড-১৯ হ’ব পাৰে নেকি ?
অ.আ : ভেকচিন লোৱাৰ পিছত আপোনাৰ দেহত প্ৰতিৰোধ ক্ষমতা বৃদ্ধি পায় ৷ যি ভাইৰাছৰ বিৰুদ্ধে যুঁজ দিয়ে ৷ ইয়াত দুটা কথা আছে— ইনফেক্শ্বন আৰু ডিজিজ ৷ ইনফেকশ্বন হৈছে ভাইৰাছৰ আপোনাৰ দেহত প্ৰৱেশ কৰা ৷ ভেকচিন ল’লেও সেই প্ৰৱেশক আপুনি বাধা দিব নোৱাৰে ৷ কিন্তু ডিজিজ হৈছে সেই ভাইৰাছৰ ফলত হোৱা বেমাৰ ৷ যি ভেকচিন লোৱাৰ ফলত দেহত ভাইৰাছে প্ৰৱেশ কৰিলেও বেমাৰ গুৰুতৰ হোৱাত বাধা দিব ৷ আপুনি ভাইৰাছৰ দ্বাৰা আক্ৰান্ত হ’ব পাৰে কিন্তু সেইয়া গুৰুতৰ বেমাৰত পৰিণত নহয় ৷
প্ৰশ্নঃ- ভেকচিনৰ দুয়োটা ড’জ লোৱাৰ পিছত ক’ভিড পজিটিভ হ’ব পাৰে নেকি ?
অ.আ - নিশ্চয় পাৰে ৷ কিয়নো ভেকচিনে ভাইৰাছৰ প্ৰৱেশ বন্ধ কৰিব নোৱাৰে ৷ কিন্তু ভাইৰাছৰ প্ৰবেশৰ ফলত যাতে গুৰুতৰ বেমাৰ নহয় তাত ভেকচিনে বাধা দিয়ে ৷
প্ৰশ্নঃ- ভেকচিন ল’ব নিবিচৰা সকলৰ বাবে কিবা পৰামৰ্শ ?
অ.আ: ভেকচিন স্বেচ্চামূলক, বাধ্যতামূলক নহয় ৷ কিন্তু আজিৰ তাৰিখত ক’ভিডৰ কোনো মেডিচিন নাই ৷ সেয়ে নিজৰ আৰু সমাজৰ স্বাৰ্থত ভেকচিন লোৱা উচিত ৷ ভেকচিনৰ পৰা একো লোকচান নহয়, বৰঞ্চ লাভহে হ’ব ৷ ক’ভিড ৰোধৰ একমাত্ৰ অস্ত্ৰ হৈছে ভেকচিন।