কেঁচা জলকীয়াত থাকে ৰোগ প্ৰতিৰোধ ক্ষমতা বৃদ্ধিৰ উপাদান

আমাৰ অসম বিশেষঃ কৰ’না ভাইৰাছে সৃষ্টি কৰা আজিৰ এই জটিল সময়ত সকলোৱে নিজৰ ৰোগ প্ৰতিৰোধ ক্ষমতা বৃদ্ধিৰ ক্ষেত্ৰত সচেতনতা অৱলম্বন কৰিছে৷ ইয়াৰ বাবে বিভিন্নজনে বিভিন্ন দৰৱৰ আশ্ৰয় লৈছে৷ কিন্তু জানি আচৰিত হ’ব যে সকলোৰে বাবে সুলভ কেঁচা জলকীয়াত আছে ৰোগ প্ৰতিৰোধ ক্ষমতা বৃদ্ধিৰ প্ৰচুৰ উপাদান৷ আজিৰ শিতানত কেঁচা জলকীয়াৰ উপকাৰিতা সম্পৰ্কে উল্লেখ কৰা হ’ল–

[১] হৃদযন্ত্ৰ ভালে ৰাখেঃ নিয়মিত অন্ততঃ দুটা কেঁচা জলকীয়া খালে হৃদযন্ত্ৰৰ ক্ষতি হোৱাৰ আশংকা নাথাকে৷ কেঁচা জলকীয়াত থকা উপকাৰী উপাদানসমূহে তেজৰ অপ্ৰয়োজনীয় কলেষ্টেৰ’লৰ মাত্ৰা হ্ৰাস কৰে৷ ফলত হাৰ্ট এটেকৰ আশংকা কমে৷

[২] ৰোগ প্ৰতিৰোধ ক্ষমতা বঢ়ায়ঃ দৈনিক দুটা কেঁচা জলকীয়া খাব পাৰিলে যিকোনো ৰোগ সহজে নিৰাময় কৰিব পৰা যায়৷ ইয়াত থকা প্ৰচুৰ পৰিমাণৰ ভিটামিন ‘চি’, বিটা কেৰোটিন আৰু এণ্টিঅক্সিডেণ্টে দেহৰ ৰোগ প্ৰতিৰোধ ব্যৱস্থাক শক্তিশালী কৰি তোলে৷ কেচাঁ জলকীয়াত থকা ভিটামিন ‘চি’ আৰু এণ্টিঅক্সিডেণ্টে শৰীৰত ইমিউনিটী বৃদ্ধি কৰাৰ লগতে দৃষ্টিশক্তি বঢ়ায় আৰু ছাল সুন্দৰ কৰি তোলে৷

[৩] চাইনাছৰ সমস্যা কমায়ঃ কেঁচা জলকীয়াত থকা কেপচিচিন নামৰ উপাদান বিধৰ বাবে ই খুব জ্বলা হয়৷ পিছে কেপচিচিন শৰীৰৰ বাবে সাংঘাতিক উপকাৰী৷ কেপচিচিন নামৰ উপাদান বিধে তেজৰ সৰবৰাহ নিয়ন্ত্ৰণ কৰে৷ তদুপৰি এই উপাদান বিধৰ বাবে মিউকাছ মেমব্ৰেনৰ মাজত তেজৰ সৰবৰাহ বাঢ়ে৷ ফলত চাইনাছৰ পৰা হ’ব পৰা মূৰৰ বিষৰ সমস্যাৰ আশংকা নাথাকে৷ তদুপৰি কেঁচা জলকীয়াই তেজত শৰ্কৰাৰ মাত্ৰা নিয়ন্ত্ৰণ কৰি ৰাখে৷

[৪] কৰ্কট ৰোগৰ আশংকা কমায়ঃ কেঁচা জলকীয়াত থকা প্ৰচুৰ পৰিমাণৰ এণ্টিঅক্সিডেণ্টে শৰীৰত জমা হোৱা ক্ষতিকাৰক ট’ক্সিন নামৰ উপাদান বিধ উলিয়াই দিয়ে৷ ইয়াৰ ফলত দেহত কৰ্কট ৰোগৰ চেল সৃষ্টি হোৱাৰ আশংকা কমে৷