জাত্যভিমানৰ বিজ্ঞাপন

আমাৰ অসম, ২৪ অক্টোবৰঃ অসমীয়াৰ জাত্যভিমানৰ ওপৰত কুঠাৰাঘাত কৰি শিলচৰত সলনি কৰা হ’ল জলজীৱন মিছনৰ অসমীয়া হ’ৰ্ডিং৷ শুকুৰবাৰে নিশা কাছাৰ জিলা প্ৰশাসনে অসমীয়া ভাষাত লিখা জলজীৱন মিছনৰ হ’ৰ্ডিং আঁতৰাই তাৰ স্থানত বাংলা ভাষাত লিখা হ’ৰ্ডিং আঁৰি দিয়ে৷ ইয়াৰ পূৰ্বে জলজীৱন মিছনৰ অসমীয়া হ’ৰ্ডিঙৰ ওপৰত কাছাৰত সানি দিয়া হৈছিল ক’লা ৰং৷ ইয়াক কেন্দ্ৰ কৰি অসমৰ সৰ্বত্ৰ তীব্ৰ প্ৰতিক্ৰিয়াৰ সৃষ্টি হয়৷ উল্লেখ্য, শিলচৰ ৰে’ল ষ্টেচনত জিলা প্ৰশাসনে অসমীয়াত জলজীৱন মিছনৰ এখন হ’ৰ্ডিং আঁৰিছিল৷ কিন্তু ১৭ অক্টোবৰত অসমীয়া ভাষাত লিখা এই হ’ৰ্ডিংখনত বৰাক ডেম’ক্ৰেটিক য়ুথ ফ্ৰণ্ট [বিডিৱাইএফ] আৰু সদৌ বৰাক যুৱ-ছাত্ৰ সন্থা নামৰ অখ্যাত সংগঠন দুটাই ক’লা ৰং সানি ‘বাংলা লিখুন’ বুলি লিখি দিছিল৷ তাৰ পাছতেই এই ঘটনাক কেন্দ্ৰ কৰি সমগ্ৰ ৰাজ্যজুৰি তীব্ৰ বিতৰ্ক আৰু প্ৰতিক্ৰিয়াৰ সৃষ্টি হয়৷ কাছাৰৰ সমান্তৰালভাৱে কৰিমগঞ্জতো অসম চৰকাৰৰ উদ্যোগ আৰু বাণিজ্য কেন্দ্ৰত অসমীয়াত লিখা থকা ছাইনব’ৰ্ড বংগ সাহিত্য সন্মিলনী নামৰ সংগঠন এটাই তীব্ৰ হেঁচা প্ৰয়োগ কৰি কাৰ্যালয়টোৰ বিষয়া-কৰ্মচাৰীক ইয়াক আঁতৰাই দিবলৈ বাধ্য কৰায়৷ কাছাৰৰ ঘটনাৰ পাছতে স্থানীয় আৰক্ষীয়ে বিডিৱাইএফৰ মুখ্য উপদেষ্টা প্ৰদীপ দত্তৰয় আৰু আন এজন নেতাক গ্ৰেপ্তাৰ কৰে যদিও তেওঁলোকক গ্ৰেপ্তাৰৰ কিছুসময় পাছতেই জামিনত মুকলি কৰি দিয়ে৷ শিলচৰ ৰে’ল ষ্টেচনত থকা জলজীৱন মিছনৰ অসমীয়া হ’ৰ্ডিংখনত লিখা আছিল– ‘আপুনি ঘৰত ব্যৱহাৰ কৰা পানীখিনি খোৱাৰ উপযোগী হয়নে?’ কিন্তু শুকুৰবাৰে নিশা কাছাৰ জিলা প্ৰশাসনে এইখন হ’ৰ্ডিঙক সলনি কৰি বাংলা ভাষাত যিখন হ’ৰ্ডিং আঁৰি দিলে, তাত লিখা হয়– ‘ঘৰে ঘৰে খাওয়াৰ জল৷ আসুন, এই মিছনেৰ সুবিধা গ্ৰহণ কৰে ঘৰে ঘৰে খাওয়াৰ জলেৰ ব্যৱস্থা কৰুণ’৷ ৰাজ্যৰ সৰ্বত্ৰ এই ঘটনা দুটাৰ তীব্ৰ প্ৰতিক্ৰিয়া সৃষ্টি হোৱাৰ পাছতো কাছাৰ জিলা প্ৰশাসনে অসমীয়াৰ আৱেগ-অনুভূতিক মুঠেও গুৰুত্ব দিয়া পৰিলক্ষিত নহ’ল৷ যাৰ ফলত অসমীয়া হ’ৰ্ডিং আঁতৰাই নিশাটোৰ ভিতৰতে তাত আঁৰি দিলে বাংলা ভাষাৰ হ’ৰ্ডিং৷ স্থানীয় দুটা অখ্যাত সংগঠনৰ দাবীৰ ওচৰত সেও মানি কাছাৰ জিলা প্ৰশাসনে কৰা এনে কাৰ্যৰ দ্বাৰা আকৌ এবাৰ বৰাক উপত্যকাত অসমীয়া ভাষাৰ ওপৰত কুঠাৰাঘাত কৰা হ’ল৷ বৰাক উপত্যকাৰ একাংশ দল-সংগঠনে উপত্যকাটোৰ সকলো চৰকাৰী অনুষ্ঠান-প্ৰতিষ্ঠানৰ ছাইনব’ৰ্ড-হ’ৰ্ডিং বাংলা ভাষাত হ’ব লাগে বুলি যি দাবী উত্থাপন কৰি আছে, তাৰ ওচৰত যেন সেও মানিলে কাছাৰ জিলা প্ৰশাসনে৷ অসমীয়া ভাষাৰ জাত্যভিমানৰ ওপৰত কুঠাৰাঘাত কৰি কাছাৰ জিলা প্ৰশাসনে নিজৰ কাৰ্যৰ দ্বাৰা যেন অটুট ৰাখিলে বাঙালীৰ জাত্যাভিমানক৷ উল্লেখ্য, বৰাক উপত্যকাত সংঘটিত এই দুটা বিক্ষিপ্ত ঘটনাৰ পাশ্বৰ্ক্ৰিয়া হিচাপে ব্ৰহ্মপুত্ৰ উপত্যকাতো একাংশ দল-সংগঠনে বাংলা ভাষাত লিখা হ’ৰ্ডিং-ছাইনব’ৰ্ড আদিৰ ওপৰত ক’লা ৰং সানি প্ৰতিবাদ সাব্যস্ত কৰে যদিও কাছাৰ জিলা প্ৰশাসনৰ দৰে এইপৰ্যন্ত ব্ৰহ্মপুত্ৰ উপত্যকাৰ কোনো স্থানীয় প্ৰশাসনে বাংলা ভাষাত লিখা হ’ৰ্ডিং-ছাইনব’ৰ্ড আদি আঁতৰাই দিয়া পৰিলক্ষিত হোৱা নাই৷ আনহাতে, বৰাক উপত্যকাৰ ঘটনা সন্দৰ্ভত প্ৰতিক্ৰিয়া প্ৰকাশ কৰি মুখ্যমন্ত্ৰী হিমন্তবিশ্ব শৰ্মাই কয়– ‘বৰাক উপত্যকাত যদি কিবা কাৰণত দুখন অসমীয়া পোষ্টাৰ গ’ল, সেইটোত আমি বেয়া পাব নালাগে৷ আৰু ব্ৰহ্মপুত্ৰ উপত্যকাতো যদি ভুলক্ৰমে এখন পাঠ্যপুথি ছপাওঁতে বাংলাত ছপা হৈ যায়, তাত প্ৰতিক্ৰিয়া দিব নালাগে৷ ভাষাই মানুহক একত্ৰিত কৰে৷ ভাষাই যদি মানুহক দূৰলৈ ঠেলি দিয়ে তেতিয়া ভাষাৰ মূল্য ক’ত থাকিব৷ ভাষাই সমন্বয় সাধন কৰে৷ ভাষাই সম্প্ৰীতি সৃষ্টি কৰে৷ সেয়ে যিবিলাক কাম হৈছে বা যিবিলাক কাম কৰিব খুজিছে তেওঁলোকে দেখিছে যে চৰকাৰখনে সকলোকে লৈ এখন বৰঅসম নিৰ্মাণৰ কামত আগবাঢ়ি আছে৷ এইবিলাকক বাধা দিবলৈ দুই-এটা কাম হ’ব৷ এনে কামৰ বিৰুদ্ধে আমি মোকাবিলা কৰিম৷ যি ব্যৱস্থা ল’ব লাগে আমি ল’ম৷’ [হাইলাকান্দি আৰু শিলচৰৰ প্ৰতিনিধিৰ সহযোগত]

গুৱাহাটীত বাংলা ফলকত কলা ৰং সানিলে লাচিত সেনাই

বৰাকত অসমীয়া লিপিত আক্ৰমণৰ পাছত গুৱাহাটীত বঙালী ফলকত কলা ৰং সানিলে বীৰ লাচিত সেনাই৷ বীৰ লাচিত সেনাৰ গুৱাহাটী মহানগৰ কমিটিৰ উদ্যোগত শনিবাৰে এই কাৰ্যসূচী গ্ৰহণ কৰা হয়৷ এই কাৰ্যসূচীৰ জৰিয়তে বীৰ লাচিত সেনাৰ গুৱাহাটী মহানগৰ কমিটিৰ সদস্য সকলে গুৱাহাটীৰ বৰ্ষাপাৰা ষ্টেডিয়ামৰ এখন ফলকত বঙালী ভাষাৰে লিখা ‘সাৰদা পথ’ নামটোত কলা ৰং সানি দিয়াৰ লগতে ফটাশিল আমবাৰীৰ এখন দোকানত বঙালী ভাষাৰে লিখা নামৰ ওপৰত কলা ৰং সানি দিয়ে৷ সেইদৰে কালাপাহাৰ পেট্ৰ’ল পাম্পৰ ওচৰত থকা ‘ভাৰত সেৱাশ্ৰম’ৰ ফল বুধবাৰৰ ভিতৰত অসমীয়া ভাষাত লিখিবলৈ সকীয়াই দিয়ে৷ এই কাৰ্যসূচীৰ জৰিয়তে বীৰ লাচিত সেনাৰ গুৱাহাটী মহানগৰ কমিটিৰ মুখ্য সাংগঠনিক সম্পাদক কল্যাণ ভাগৱতীয়ে কয় ‘ ভাষিক আক্ৰমণক সহ্য কৰা নহ’ব৷  আমি ভাৰত সেৱাশ্ৰম’ ৰ ফলকত আজি কলা ৰং এই কাৰণে নাসানিলোঁ কাৰণ তাত ধৰ্মীয় অনুভূতি জড়িত হৈ আছে৷ আমি লগতে এই কাৰ্যসূচীৰ জৰিয়তে সকলোতে অসমীয়া ভাষাৰ ফলক লগাবলৈ দাবী জনাইছোঁ৷ বিগত বৰ্ষতো আমি এই কাৰ্যসূচী গ্ৰহণ কৰিছিলোঁ৷ বৰাকত অসমীয়া লিপিত কলা ৰং সানি বঙালী ভাষাত লিখিবলৈ কোৱাত আমি যি ধৰণৰ আঘাত পাইছোঁ সেই কথা তেওঁলোকে যাতে উপলব্ধি কৰে তাৰবাবে আমি এই কাৰ্যসূচী গ্ৰহণ কৰিছোঁ৷ পৰৱৰ্তী সময়ত আমাৰ অসম জুৰি এই প্ৰতিবাদী কাৰ্যসূচী অব্যাহত থাকিব৷ ‘ উল্লেখ্য, বৰাকত অসমীয়া ভাষাত লিখা চৰকাৰী ফলক এখনত কলা ৰং সানি দিয়াৰ লগতে বঙালী ভাষাত লিখিবলৈ লিখি থোৱা ঘটনাক কেন্দ্ৰ কৰি সমগ্ৰ ৰাজ্যজুৰি হোৱা তীব্ৰ প্ৰতিক্ৰিয়া শনিবাৰেও অব্যাহত আছে৷