![image](https://aamarasom.com/uploads/posts/হিমন্তৰ হাতত ‘গান’, ভূপেনৰ মুখত কবিতা.jpg1643380845.jpg)
হিমন্তৰ হাতত ‘গান’, ভূপেনৰ মুখত কবিতা
আমাৰ অসম, ২৮ জানুৱাৰীঃ ইজনৰ পাছত সিজনকৈ প্ৰভাৱশালী নেতা দলৰ পৰা আঁতৰি যোৱাৰ ধাৰাবাহিক প্ৰক্ৰিয়া এই পৰ্যন্ত অব্যাহত আছে৷ দলৰ ভিতৰত থাকিয়ে চৰকাৰখনক সমৰ্থন দি যাব বুলি দলৰ বিধায়কে মুকলিভাৱে ঘোষণা কৰিছে৷ বহু কেইজন বিধায়ক যিকোনো মুহূৰ্তত দল ত্যাগ কৰিবলৈ সাজু হৈ আছে৷ উপ-নিৰ্বাচন, স্বায়ত্তশাসিত পৰিষদৰ নিৰ্বাচনত দলে অভাৱনীয় বিপৰ্যয়ৰ সন্মুখীন হৈছে৷ প্ৰতিপক্ষ বিজেপি দল আৰু চৰকাৰে অভাৱনীয় আগ্ৰাসী স্থিতি গ্ৰহণ কৰিছে৷ মিত্ৰদল বিপিএফ, এআইইউডিএফ আদিয়ে ইতিমধ্যে সংগ ত্যাগ কৰিছে৷ কিন্তু ইয়াৰ পাছতো যেন কবিতা লিখিহে প্ৰতিপক্ষক প্ৰতিহত কৰিব বিচাৰিছে প্ৰদেশ কংগ্ৰেছৰ সভাপতি ভূপেন বৰাই৷ আন্তঃদলীয় কন্দল আৰু ধাৰাবাহিক খহনীয়াত বিপৰ্যস্ত হৈ পৰা কংগ্ৰেছক উদ্ধাৰ কৰাৰ অস্ত্ৰ হিচাপে ভূপেন বৰাই গ্ৰহণ কৰিছে ‘কবিতা’ক৷ দলৰ ভিতৰত সভাপতি বৰাৰ এনে কাৰ্যকাণ্ডক কেন্দ্ৰ কৰি সৃষ্টি হৈছে তীব্ৰ প্ৰতিক্ৰিয়াৰ৷ উল্লেখ্য যে, ৰাজীৱ ভৱনত গণৰাজ্য দিৱসৰ পতাকা উত্তোলন কৰি সভাপতি ভূপেন বৰাই মুখ্যমন্ত্ৰী ড॰ হিমন্ত বিশ্ব শৰ্মাৰ বক্তব্যৰ প্ৰত্যুত্তৰ দিবলৈ গৈ মই ‘ফায়াৰ ব্ৰিগেড’ নামৰ স্বৰচিত কবিতা এটা পাঠ কৰে৷
মই ফায়াৰ ব্ৰিগেড’
বজাৰত জ্বলিছে জুই, চৰকাৰ আছে শুই৷
নিবনুৱাৰ বুকুতো জ্বলিছে জুই,
বুলেট খাই কীৰ্তিকমল আছে শুই৷
দুখীয়াৰ পেটতো জ্বলিছে জুই,
শুদা চাউল এমুঠি খাই আমিও আছোঁ শুই৷
পুলিচ পিটিকা হ’ব অপৰাধী ধৰিলে,
সংবাদ সোপা দিব ৰাজমাতাৰ খবৰ ছপালে৷
মিজো সীমান্ততো জ্বলি আছে জুই,
দেখিছিলো তাত চকুৰ পানীৰ নৈ৷
জাতি-মাটি-ভেটি এৰি দিব গৈ,
মেঘালয়ে আদৰিব বৰপীৰা লৈ৷
গণতন্ত্ৰ তোমাৰ মন্ত্ৰ,
ন্যায়, সমতা, স্বাধীনতা আৰু ভ্ৰাতৃত্ব
আজিৰ অসমত সকলো লাঞ্চিত-বঞ্চিত৷
ছেম, দীপাঞ্জল, বিজেন্দ্ৰ, আলিম আৰু
ঈশ্বৰেও দেখিলে জুই,
তেজে ধোৱা পঞ্চ-ছহিদ
দেশমাতৃৰ কোলাত আছে শুই৷
খৰি ফলাদি জাতিক ফালিছে,
দাউদাউকৈ যেন জ্বলিছে জুই,
জাতিৰ মূৰত জ্বলিছে
হূদয়তো জাতিৰ একুৰা জুই৷
চৰকাৰ তই জ্বলাইছ,
মই নুমুৱাম,
ময়েই ‘ফায়াৰ ব্ৰিগেড’ হৈ পানী ছটিয়াম,
মই জুই নুমুৱাম৷৷
এই কবিতাটোৰ জৰিয়তে মুখ্যমন্ত্ৰীক আক্ৰমণ কৰিবলৈ গৈ এতিয়া বিজেপি দলৰ আক্ৰমণৰ লক্ষ্য হৈ পৰিছে বৰা৷ উল্লেখ্য যে এনকাউণ্টাৰ সম্পৰ্কত ক’বলৈ গৈ অসমত পুলিচীৰাজ চলিব বুলি দৃঢ়তাৰে ঘোষণা কৰিছিল মুখ্যমন্ত্ৰীয়ে৷ মুখ্যমন্ত্ৰী ডঃ শৰ্মাই কৈছিল– মই মুখ্যমন্ত্ৰী থকালৈকে অসমত অপৰাধীৰ ওপৰত একশ্বন হৈয়ে থাকিব৷ এইটোত কোনো কথা নাই৷ পুলিচীৰাজ চলিব৷ মিলিটাৰীৰাজ চলিব৷ পুলিচে ৰাইজৰ দৰমহা লয়৷ এনকাউণ্টাৰ সন্দৰ্ভত মুখ্যমন্ত্ৰীৰ ভাষ্যক কবিতাৰে প্ৰত্যুত্তৰ দিয়াৰ পাছত মন্ত্ৰী পীয়ূষ হাজৰিকাই প্ৰদেশ কংগ্ৰেছৰ সভাপতিজনক কটাক্ষ কৰি কয়– তেওঁ পানী নথকা ফায়াৰ ব্ৰিগেড৷ পানী নথকা ফায়াৰ ব্ৰিগেডৰ কিবা কাম আছে নেকি? আনহাতে প্ৰদেশ বিজেপিৰ সভাপতি ভৱেশ কলিতাক কটাক্ষ কৰি কয়– ভূপেন বৰাই অসম সাহিত্য সভাত মনোনিৱেশ কৰক৷ আমি ৰাজনৈতিক নেতাহে, সাহিত্যিক নহয়৷ ভূপেন বৰাই সাহিত্য সভাত কবিতা আবৃত্তি কৰক৷ সভাপতি বৰাই নিজকে কবিতাৰ মাজত আবদ্ধ কৰি ৰখাৰ বিপৰীতে ৰাজ্যসভাৰ আগন্তুক নিৰ্বাচনক লৈ অধিক তৎপৰ হৈ পৰিছে শাসনাধিষ্ঠ বিজেপি দল৷ সংখ্যা বৃদ্ধিৰ বাবে কংগ্ৰেছৰ মিত্ৰ দল বিপিএফক বিধানসভাৰ মজিয়াত মিত্ৰদল হিচাপে ঘোষণা কৰিছে মুখ্যমন্ত্ৰীয়ে৷ ৰাজ্যসভাৰ দুয়োখন আসনে বিজেপিয়ে লাভ কৰিব বুলি ইতিমধ্যে দৃঢ়তাৰে ঘোষণা কৰিছে মুখ্যমন্ত্ৰীয়ে৷