ড॰ হিমন্ত বিশ্ব শৰ্মা নেতৃত্বতাধীন এবছৰীয়া অসম মন্ত্ৰীসভাৰ সম্প্ৰসাৰণ হ’ব ৯ জুনত৷ আজি এই কথা মুখ্যমন্ত্ৰী শৰ্মাই কাৰ্বি আংলং জিলাৰ ধনশিৰিত ঘোষণা কৰে৷ সাংবাদিকৰ প্ৰশ্নৰ উত্তৰত মুখ্যমন্ত্ৰী শৰ্মাই কয় যে পাহাৰৰ পৰা ৯ জুনত এজন বিধায়কক মন্ত্ৰীসভাত অন্তৰ্ভুক্ত কৰা হ’ব৷ কিন্তু তেওঁ কোন মন্ত্ৰী হ’ব পাৰে তাৰ কোনো ইংগিত নিদিলে৷ সাংবাদিকে মহিলাৰ পৰা মন্ত্ৰী হ’ব নেকি বোলা প্ৰশ্নৰ কোনো উত্তৰ নাদি মাথোঁ কয় পাহাৰৰ ৫ জন বিধায়কৰ ভিতৰত এজনক ৯ জুনত মন্ত্ৰীসভাত অন্তৰ্ভুক্ত কৰা হ’ব৷  উল্লেখ্য যে, ডিফুৰ বিধায়ক বিদ্যাছিং ইংলেং চতুৰ্থবাৰৰ বাবে বিধায়ক হৈছে৷ তিনিবাৰ কংগ্ৰেছৰ বিধায়ক হৈয়ো তেওঁ মন্ত্ৰী হোৱা নাছিল৷ এইবাৰ তেওঁ বিজেপি দলৰ বিধায়ক৷  পাঁচবাৰকৈ তেওঁ কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য আছিল৷ সেয়ে জ্যেষ্ঠতা আৰু অভিজ্ঞতাৰ ফালৰ পৰা তেওঁ হ’ব লাগে পাহাৰৰ মন্ত্ৰী৷ কিন্তু তেওঁ মন্ত্ৰী হ’লে মুখ্য কাৰ্যবাহী সদস্যজনতকৈ শক্তিশালী হৈ পৰাৰ ভয়ত তেওঁ পথত বাধা হ’ব পাৰে৷ হিমন্ত বিশ্ব শৰ্মাৰ মন্ত্ৰীসভাত মহিলা মন্ত্ৰী আছে কেৱল অজন্তা নেওগ৷ মহিলাক সন্মান দিয়া দল বুলি কোৱা বিজেপিত মহিলাৰ মন্ত্ৰী এগৰাকী৷ সেয়ে হাফলঙৰ বিধায়ক নন্দিতা গৰ্লোচা হ’ব পাৰে মন্ত্ৰী৷ উচ্ছ শিক্ষিত আৰু কৰ্মথ মহিলা বিধায়কৰূপে পৰিচিত নন্দিতা৷ সেয়ে নন্দিতা গাৰ্লোচাক ৰাজ্যিক মন্ত্ৰী হিচাবে শৰ্মাৰ মন্ত্ৰী সভাত স্থান দিয়া হ’ব পাৰে৷