ম’বাইল ফোনৰ বিপদজনক ৰেডিয়েশ্বনৰ পৰা কিদৰে সাৰিব

ম’বাইল ফোনটো এতিয়া সকলোৰে দৈনন্দিন জীৱনৰ অপৰিহাৰ্য অংশ৷ কিন্তু ম’বাইল ফোনৰ পৰা নিৰ্গত হোৱা ৰেডিয়েশ্বন যে স্বাস্থ্যৰ বাবে মাৰাত্মক ক্ষতিৰ কাৰণ হ’ব পাৰে সেয়া বহুতেই নাজানে৷ ম’বাইল ফোনত কল কৰাৰ সময়ত অৰ্থাৎ সিটো মূৰৰ ফোনটো ৰিং হোৱাৰ সময়তে এই ৰেডিয়েশ্বন আটাইতকৈ বেছি নিৰ্গত হয়৷ পিছে, ম’বাইল ফোনৰ ৰেডিয়েশ্বনৰ মাৰাত্মক ক্ষতিৰ পৰা নিজকে ৰক্ষা কৰাৰ উপায়ো নথকা নহয়৷ উল্লেখ কৰা হ’ল ম’বাইল ফোনৰ ৰেডিয়েশ্বনৰ ক্ষতিৰ পৰা নিজকে ৰক্ষা কৰাৰ উপায়–

[১] কল ৰিচিভ কৰাৰ পাছতহে ম’বাইল ফোনটো কাণৰ ওচৰলৈ আনক৷ কথা পতাৰ সময়ত পাৰিলে হেডফোন বা ইয়াৰফোন ব্যৱহাৰ কৰক৷ এনে কৰিলে ৰেডিয়েশ্বনৰ ক্ষতিৰ পৰা কিছু হ’লেও ৰক্ষা পৰিব পাৰি৷ কথা পতাৰ সময়ত খোজ নাকাঢ়িব৷ দুৰ্বল নেটৱৰ্কত ৰেডিয়েশ্বন বেছি পৰিমাণে নিৰ্গত হয়৷ এনে সময়ত যিমান পাৰি কথা চমু কৰক৷

[২] শোৱাৰ সময়ত ম’বাইল ফোনটো মূৰৰ ওচৰত ৰাখিলে টোপনিৰ পৰিমাণ আৰু গভীৰতাত নেতিবাচক প্ৰভাৱ পৰে৷ সেয়ে শোৱাৰ সময়ত ফোনটো আঁতৰত ৰাখক৷

[৩] গাড়ীত বহি থকা অৱস্থাত ম’বাইল ফোনটোৰ ব্যৱহাৰ সীমিত কৰক৷ গাড়ীৰ ভিতৰত ৰেডিয়েশ্বনৰ মাত্ৰা অধিক বৃদ্ধি পায়৷ সময়মতে সাৰ পাবলৈ ম’বাইল ফোনত ‘এলাৰ্ম’ দিয়াটো বন্ধ কৰক৷ ইয়াৰ বাবে ঘড়ীত ‘এলাৰ্ম’ দিয়ক৷

[৪] আন্ধাৰত ম’বাইল ফোনৰ স্ক্ৰীনৰ পোহৰে যে অকল চকুৰ ক্ষতি কৰে তেনে নহয়, ই টোপনিৰ বাবে প্ৰয়োজনীয় হৰমনৰ নিঃসৰণত বাধা জন্মায়৷ সেয়ে আন্ধাৰত ম’বাইল ফোনৰ ব্যৱহাৰ বন্ধ কৰক৷ ৰাতি শোৱাৰ দুঘণ্টা পূৰ্বে ম’বাইল ফোন ব্যৱহাৰ কৰাৰ পৰা বিৰত থাকক৷

[৫] স্মাৰ্টফোনৰ বিভিন্ন ছাৰ্ভিচ যেনে– ওৱাইফাই, ব্লু-টুথ, জি পি এছ, ইণ্টাৰনেট সংযোগ আদিৰ প্ৰয়োজন শেষ হ’লে অফ কৰি থওক৷ এইবোৰৰ পৰা নিৰ্গত হোৱা ৰেডিয়েশ্বন শৰীৰৰ দীৰ্ঘম্যাদী ক্ষতিৰ কাৰণ হ’ব পাৰে৷

[৬] শোৱনি কোঠাত ওৱাইফাই ৰাউটাৰ নাৰাখিব৷ ৰাতি ওৱাইফাই ৰাউটাৰ বন্ধ কৰি ৰাখক৷ ফোনটো শিশুৰ পৰা আঁতৰত ৰাখক৷ ম’বাইল ফোনৰ টাৱাৰ থকা ঠাইৰ পৰা যিমান পৰা যায় আঁতৰত ঘৰ লওক৷

[৭] নিজৰ ঘৰত ভুলতো ম’বাইল ফোনৰ টাৱাৰ বহুৱাবলৈ নিদিব৷ ইয়াৰ বাবে আপোনাৰ আৰ্থিক ক্ষতি হ’লেও পৰিয়াল আৰু প্ৰতিৱেশীৰ স্বাস্থ্য ৰক্ষা হ’ব৷