ৰুশ্বডি সংকটমুক্ত, প্ৰাণ হেৰুৱাইছিল ভাৰ্ছেজৰ একাধিক অনুবাদকে
আমাৰ অসম, ১৬ আগষ্টঃ আততায়ীৰ ভয়ংকৰ আক্ৰমণৰ সন্মুখীন হৈ মৃত্যুৰ দুৱাৰদলিৰ পৰা উভতি অহা ভাৰতীয় বংশোদ্ভৱ প্ৰখ্যাত ঔপন্যাসিক ছলমান ৰুশ্বডি ক্ৰমাৎ সুস্থ হৈ উঠিছে৷ শুকুৰবাৰে আক্ৰমণৰ সন্মুখীন হোৱা ছলমান ৰুশ্বডিৰ প্ৰথম দুই দিন ভেণ্টিলেটৰত থাকিলেও দেওবাৰে তেওঁৰ শৰীৰৰ পৰা চিকিৎসকে ভেণ্টিলেটৰ ব্যৱস্থা আঁতৰাইছে৷ তেওঁ আঘাত উপশম নোহোৱালৈ আৰু কেইবাদিনো চিকিৎসালয়ত থাকিব লাগিব বুলি তেওঁৰ সতীৰ্থ লেখক আটিছ তাছিৰে টুইট কৰিছে৷ তাছিৰে জনোৱা মতে ভেণ্টিলেটৰ আঁতৰাই দিয়াৰ পাছত ৰুশ্বডিয়ে ঘনিষ্ঠ লোকৰ সৈতে কথাবতৰা পতাৰ লগতে চিকিৎসালয়ৰ বিছনাত শুই থকা অৱস্থাৰ পৰাই দুই-এটা কৌতুকো কৰিছে৷ ৰুশ্বডিৰ এজেণ্ট এণ্ড্ৰু উইলিয়ে তেওঁৰ স্বাস্থ্য সম্পৰ্কত প্ৰায় একেখিনি তথ্যই প্ৰকাশ কৰিছে আৰু তাতকৈ অধিক জনোৱাৰ পৰা বিৰত আছে৷
ইপিনে আক্ৰমণকাৰী হাডি মাতাৰে আদালতত নিজকে নিৰ্দোষী বুলি মন্তব্য কৰিছে৷ শনিবাৰে তেওঁক স্থানীয় আদালতত হাজিৰ কৰোৱা হয় আৰু চৰকাৰী অধিবক্তাই হাডি মাতাৰৰ বিৰুদ্ধে হত্যাৰ প্ৰচেষ্টাৰ অভিযোগ উত্থাপন কৰে৷ চৰকাৰী অধিবক্তাই আদালতক জনোৱা মতে ঘাতকৰ এই আক্ৰমণ পূৰ্ব-পৰিকল্পিত আছিল৷ ইয়াৰ বিপৰীতে হাডি মাতাৰৰ এটৰ্ণিয়ে নিউয়ৰ্কৰ আদালতত দাবী কৰে যে তেওঁৰ মক্কেল নিৰ্দোষী৷ আদালতত হাডি মাতাৰক উপস্থিত কৰোৱা হয়৷ বিচাৰকে তেওঁক এই আক্ৰমণ সন্দৰ্ভত প্ৰশ্ন কৰাত তেওঁ নিজকে নিৰ্দোষী বুলি মন্তব্য কৰে৷ বগা আৰু ক’লা ষ্ট˜াইপ থকা এটা জামছ্যুট পৰিধান কৰি আক্ৰমণকাৰী আদালতত উপস্থিত হৈছিল৷ তদন্তকাৰীয়ে এতিয়াও ১৯৮৯ চনত ইৰানৰ ধৰ্মীয় আৰু ৰাষ্ট˜প্ৰধান আয়াতোল্লা খোমেইনিয়ে জাৰি কৰা ফটোৱাৰ বাবেই হাডি মাতাৰে ছলমান ৰুশ্বডিক হত্যাৰ বাবে প্ৰয়াস চলাইছিল নেকি সেয়া এতিয়াও নিশ্চিত কৰিব পৰা নাই তদন্তকাৰীয়ে৷ তেওঁ কঢ়িয়াই অনা বেগটোত থকা সামগ্ৰী তদন্তকাৰীয়ে পৰীক্ষা কৰি আছে৷ বেগত ভিতৰৰ পৰা এটা ইলেক্টªনিক যন্ত্ৰ উদ্ধাৰ কৰিলেও সেই যন্ত্ৰৰ কাম কি বা কি উদ্দেশ্যত তেওঁ আনিছিল সেয়া নিৰ্দ্ধাৰণ কৰিব পৰা নাই৷ কিন্তু তেওঁৰ ইৰানৰ ইছলামিক ৰিভ’লিউচনেৰী গাৰ্ড নামৰ সংগঠনটোৰ প্ৰতি সমৰ্থন আছিল৷ আক্ৰমণকাৰীৰ ছ’চিয়েল মিডিয়া একাউণ্টৰ পৰা তেওঁ সেই সংগঠনৰ প্ৰতি দুৰ্বল বুলি জানিব পৰা গৈছে৷ আক্ৰমণৰ পিছদিনা হাডি মাতাৰ ইৰান বংশোদ্ভৱ বুলি প্ৰকাশ পালেও তেওঁৰ পিতৃ-মাতৃ প্ৰকৃততে লেবাননৰহে৷ লেবানীজ পিতৃ-মাতৃৰ সন্তান হাডি মাতাৰৰ জন্ম আমেৰিকাতে হৈছিল৷ হাডি মাতাৰৰ জন্ম হৈছিল আমেৰিকাৰ নিউজাৰ্ছিৰ ফেয়াৰভিউ নামৰ চহৰখনত৷ৰৰ এপ্ৰিলৰ পৰা তেওঁ স্থানীয় ষ্টেট্ অব ফিটনেছ বক্সিং ক্লাৱৰ মেনেজাৰ হিচাপে কাম কৰি আছিল৷ কিছুদিন পূৰ্বে তেওঁ সেই কাম ত্যাগ কৰে আৰু কেইবাদিনৰ বাবে ফিটনেছ ক্লাৱটোত উপস্থিত থাকিব নোৱাৰিব বুলি কতৃৰ্পক্ষলৈ ই-মেইল প্ৰেৰণ কৰে৷ তাৰ পাছতে শুকুৰবাৰে হাডি মাতাৰে ৰুশ্বডিৰ ওপৰত আক্ৰমণ সংঘটিত কৰে৷
উল্লেখযোগ্য, শুকুৰবাৰে আমেৰিকাৰ নিউয়ৰ্ক প্ৰদেশৰ একেবাৰে দক্ষিণ-পশ্চিমৰ চাট’কুৱা ইনষ্টিটিউটৰ মঞ্চত বক্তৃতা প্ৰদান কৰিবলৈ লোৱাৰ সময়তে দৰ্শকৰ মাজৰ পৰা এজন যুৱক উঠি গৈ ছলমান ৰুশ্বডিক চুৰিৰে কেইবাবাৰো আঘাত কৰে৷ সেই সময়ত এজন সাংবাদিকে মঞ্চৰ ওপৰতে ৰুশ্বডিৰ সাক্ষাৎকাৰ লৈ আছিল৷ কেইচেকেণ্ডমানৰ ভিতৰতে যুৱকজনে ৰুশ্বডিক চুৰিৰে ডিঙি, পেট আৰু মুখমণ্ডলত ১৫-২০বাৰ আঘাত কৰে৷ লগে লগে তেওঁ মঞ্চতে বাগৰি পৰে৷ উপস্থিত দৰ্শকে আক্ৰমণকাৰীক কৰায়ত্ব কৰাৰ লগতে দৰ্শকৰ মাজত থকা এজন চিকিৎসকে ৰুশ্বডিক প্ৰাথমিক চিকিৎসা প্ৰদান কৰে৷ নিউয়ৰ্ক আৰক্ষীয়ে ততালিকে আক্ৰমণকাৰী যুৱকজনক গ্ৰেপ্তাৰ কৰে আৰু বেছ পলমকৈ আক্ৰমণকাৰীৰ নাম হাডি মাতাৰ বুলি প্ৰকাশ কৰে৷ আক্ৰমণৰ কাৰণ স্পষ্ট নহ’লেও ধাৰণা কৰা হৈছে, ছলমান ৰুশ্বডি ৰচিত বিতৰ্কিত উপন্যাস ‘দ্য ছাটানিক ভাৰ্ছেছ’ৰ কাৰণেই ৭৫ বছৰীয়া লেখকজনৰ ওপৰত এই আক্ৰমণ সংঘটিত কৰা হয়৷ ১৯৮৮ চনত প্ৰকাশিত এই উপন্যাসখনত ইছলাম ধৰ্মৰ প্ৰতি নিন্দাসূচক বক্তব্য থকাৰ অভিযোগত ছলমান ৰুশ্বডিৰ বিৰুদ্ধে তেতিয়াৰ ইৰানৰ ৰাষ্ট্ৰপ্ৰধান আয়াতোল্লা খোমেইনিয়ে ১৯৮৯ চনত ফটোৱা জাৰি কৰি তেওঁক হত্যা কৰিলে ৩ নিযুত মাৰ্কিন ডলাৰ বা প্ৰায় ২৫ কোটি টকাৰ পুৰষ্কাৰ ঘোষণা কৰিছিল৷ সেই ফটোৱা ঘোষণাৰ ৩৩ বছৰ পাছত ছলমান ৰুশ্বডিৰ ওপৰত সংঘটিত এই প্ৰায় প্ৰাণঘাতী আক্ৰমণৰ ঘটনাই সকলোকে আচৰিত কৰি তুলিছে৷ কিয়নোকেইবাবছৰ পূৰ্বে ইৰান চৰকাৰে নিজকে এই ফটোৱাৰ পৰা নিলগাই নিছিল আৰু ২৪ বছৰীয়া আক্ৰমণকাৰীৰ জন্ম হৈছিল বিতৰ্কিত উপন্যাসখন প্ৰকাশৰ প্ৰায় এটা দশক পাছত৷
বিতৰ্কিত উপন্যাস দ্য ছাটানিক ভাৰ্ছেছ ছলমান ৰুশ্বডিৰ চতুৰ্থ গ্ৰন্থ৷ তেওঁৰ প্ৰথম উপন্যাসখনৰ নাম আছিল গ্ৰিমাছ৷ ১৯৭৫ চনত প্ৰথম উপন্যাস প্ৰকাশ হোৱাৰ ৬ বছৰ পাছত ৰুশ্বডিয়ে তেওঁৰ দ্বিতীয় উপন্যাস মিডনাইট ছিলড্ৰেন লিখি উলিয়াইছিল৷ সেই উপন্যাসৰ জৰিয়তে তেওঁ লাভ কৰিছিল বুকাৰ বঁটা৷ পিছে তেওঁ চৰম বিতৰ্ক কঢ়িয়াই আনে নিজৰ চতুৰ্থখন উপন্যাসৰ জৰিয়তে৷ নিশাৰ ভিতৰতে বিতৰ্কৰ চূড়া স্পৰ্শ কৰা উপন্যাসৰ বাবে তেওঁৰ বিৰুদ্ধে ধৰ্মদ্ৰোহৰ অভিযোগ উত্থাপন কৰে অসংখ্য মৌলবাদী সংগঠনে৷ বিশ্বৰ প্ৰায় সকলো মুছলিম ৰাষ্ট্ৰত এই উপন্যাসখন নিষিদ্ধ কৰা হৈছিল৷ কমেও ২৩ খন ৰাষ্ট্ৰত এতিয়াও দ্য ছাটানিক ভাৰ্ছেছ নিষিদ্ধ৷ পিছে ৰুশ্বডিয়ে বাৰে বাৰে দাবী কৰি আহিছে, তেওঁৰ উপন্যাখনৰ ভুল ব্যাখ্যা কৰা হৈছে৷ ইতিপূৰ্বে তেওঁ ভুল স্বীকাৰ কৰি সেই উপন্যাসখনৰ বক্তব্যৰ বাবে ৰাজহুৱাকৈ ক্ষমাভিক্ষা কৰিছিল৷ হজৰত মহম্মদে কোৰাণৰ পৰা প্ৰত্যাহাৰ কৰা দুটা পদ্যৰ আধাৰত ৰচিত হৈছিল ছলমান ৰুশ্বডিৰ ছয়তানৰ পদ্যাৱলী বা দ্য ছাটানিক ভাৰ্ছেছ৷ হজৰত মহম্মদে বিশ্বাস কৰিছিল, সেই পদ্য দুটা চয়তানৰ দ্বাৰা প্ৰভাৱিত হৈ ৰচিত হৈছিল৷ সেয়ে তেওঁ সেই পদ্য দুটা কোৰাণৰ পৰা প্ৰত্যাহাৰ কৰিছিল৷ ৰুশ্বডিৰ উপন্যাসৰ দুটি নাৰী চৰিত্ৰৰ নাম আছিল হজৰত মহম্মদৰ পত্নীৰ নামেৰে৷ উপন্যাসত বৰ্ণিত এই দুই নাৰী চৰিত্ৰ আছিল বাৰবণিতা বা দেহোপজীৱিনী৷ মুছলিম সমাজ আৰু ইছলামিক ৰাষ্ট্ৰৰ আপত্তিৰ কাৰণ আছিল সেয়াই৷ দ্য ছাটানিক ভাৰ্ছেছ নামৰ উপন্যাসখন ইছলাম ধৰ্মৰ বাবে নিন্দাসূচক বক্তব্যৰে ভৰা বুলি চৰ্চা হৈছিল আৰু বিতৰ্কৰ সূচনাতে বিশ্বৰ ভিতৰত প্ৰথম ভাৰততে ছলমান ৰুশ্বডিৰ চতুৰ্থ উপন্যাসখন প্ৰথমে নিষিদ্ধ কৰা হৈছিল৷
প্ৰসংগতঃ ইতিপূৰ্বে দ্যা ছাটানিক ভাৰ্ছেছৰ জাপানী ভাষাৰ অনুবাদকাৰী হিত’শ্বি ইগাৰ’শ্বিক তেওঁ অধ্যাপনা কৰা শ্বুকুবা বিশ্ববিদ্যালয়ৰ কাৰ্যালয়ৰ ভিতৰতে হত্যা কৰা হৈছিল আৰু ইটালিয়ান ভাষাৰ অনুবাদকাৰী ইতৰি কেপ্ৰিঅল’ক তেওঁৰ বাসভৱনৰ ভিতৰতে চুৰিকাঘাত কৰি হত্যাৰ প্ৰচেষ্টা চলোৱা হৈছিল৷ ইটালিয়ান ভাষাৰ অনুবাদকাৰীৰ প্ৰাণ ৰক্ষা পৰিছিল যদিও তেওঁ চিৰদিনলৈ ঘূণীয়া হৈছিল৷ মাজৰ এই সময়ছোৱাত ছলমান ৰুশ্বডি ৯ বছৰ সম্পূৰ্ণৰূপে অজ্ঞাতবাস আৰু সামগ্ৰিকভাৱে ১৩ বছৰ ছদ্মনাম লৈ গোপনে জীয়াই থাকিবলগীয়া হৈছিল৷ ২০০০ চনৰ পৰা আমেৰিকাত থাকিবলৈ লোৱা ছলমান ৰুশ্বডি প্ৰায় ২০ বছৰ পূৰ্বেই মুকলিলৈ ওলাই আহিছিল যদিও তেওঁ সততে নিৰাপত্তা বেষ্টনীৰ মাজত আছিল৷ প্ৰথম ১৩টা বছৰ ব্ৰিটিছ আৰক্ষীৰ পূৰ্ণ নিৰাপত্তাৰ বেষ্টনীত আত্মগোপন কৰি থকা ছলমান ৰুশ্বডিৰ নিত্য-নৈমিত্তিক জীৱনত অৱশ্যে এতিয়াও কঠোৰ নিৰাপত্তা অব্যাহত আছিল৷ নিৰাপত্তাৰ বেহুত থাকিলেও ২০০০ চনৰ পৰা আমেৰিকাত থাকিবলৈ লোৱাৰ পৰা তেওঁ বেছ মুকলিমুৰীয়াকৈ আছিল৷ সম্ভৱতঃ তেওঁ নিজেও পাহৰি গৈছিল এই ফটোৱাৰ কথা৷ ছলমান ৰুশ্বডিৰ জীৱনৰ প্ৰতি ইতিপূৰ্বে একাধিকবাৰ হত্যাৰ প্ৰচেষ্টা চলিছিল৷ সৌভাগ্যবশতঃ সেই আটাইবোৰ প্ৰচেষ্টা ব্যৰ্থ হৈছিল আৰু তেওঁৰ কলমৰ পৰা ওলাই আছিল ইখনৰ পাছত সিখনকৈ মুঠতে ১৪খন উপন্যাস৷