মুখৰ চৰ্বি কমাবলৈ কি কি কৰিব
মুখত অতিৰিক্ত মেদ জমা হ’লে সৌন্দৰ্যৰ লগতে ব্যক্তিত্বতো প্ৰভাৱ পৰে৷ মুখ বা গালত অথবা চকুৰ তলত চৰ্বি জমা হ’লে দেখিবলৈ আপচু লাগে৷ মুখৰ চৰ্বি বৃদ্ধি পালে ব্যক্তিত্বৰ ওপৰত সকলোতকৈ বেছি প্ৰভাৱ পৰে৷ সাধাৰণতে জেনেটিকছৰ বাবেই মুখত অতিৰিক্তভাৱে মেদ জমা হয়৷ তাৰোপৰি ওজন বৃদ্ধি পালে মুখত চৰ্বি বাঢ়ি যায়৷
কিভাৱে মুখৰ চৰ্বি কমাব পৰা যায়ঃ
মুখৰ চৰ্বি কমোৱাৰ বাবে কেইবাটাও উপায় আছে৷ যত্ন ল’লে মুখৰ লগতে চকুৰ তলত জমা হোৱা চৰ্বি সহজেই কমাব পাৰি৷
[১] ওজন কমাওকঃ সাধাৰণতে ওজন বৃদ্ধি পোৱাৰ লগত চৰ্বি বৃদ্ধিৰ সম্পৰ্ক আছে৷ সেইবাবে মুখ বা চকুৰ তলত জমা হোৱা চৰ্বি কমাবৰ বাবে শৰীৰৰ ওজন কমোৱাৰ ওপৰত গুৰুত্ব দিব লাগে৷
[২] নিয়মীয়া শৰীৰচৰ্চাঃ নিয়মীয়াকৈ যিসকলে শৰীৰ চৰ্চা কৰে সেইসকল মেদবহুলতাৰ পৰা হাত সাৰি থাকে৷ ব্যায়াম কৰিলে শৰীৰৰ কেলৰি আৰু ফেট হ্ৰাস পায়৷ মেদবহুলতাৰ উপৰি ব্যায়াম কৰিলে হৃদৰোগৰ আশংকাও যথেষ্টখিনি হ্ৰাস পায়৷ সপ্তাহত তিনিৰ পৰা পাঁচবাৰ ত্ৰিছ মিনিটকৈ কাৰ্ডিঅ’ ব্যায়াম কৰিলে মুখৰ চৰ্বি দ্ৰুতগতিত কমি যায়৷
[৩] গালঃ বহি থকা অৱস্থাত গালদুখন মুখৰ ভিতৰলৈ সুমুৱাই কেইবাৰমান উঠা-নমা কৰক৷ এইদৰে দিনটোত দহবাৰমান অনুশীলন কৰিলে গালত জমা হোৱা চৰ্বি হ্ৰাস পায়৷
[৪] ভ্ৰূঃ মুখৰ মেদ হ্ৰাস কৰাৰ বাবে ভ্ৰূ দুটা দহবাৰমান উঠা-নমা কৰিব লাগে৷ এই ব্যায়াম কৰাৰ ফলত মুখত জমা হোৱা মেদ লাহে লাগে কমি যায়৷
[৫] কপালঃ আঙুলিৰে কপালৰ মাজত এক মিনিটমান মালিচ কৰিলে ভাল ফল পাব পাৰি৷
[৬] খোৱাত সাৱধানতাঃ সাধাৰণতে যিসকল লোকে মদ্যপান কৰে সেইসকলে মেদবহুলতাৰ পৰা হাত সাৰিবলৈ সুৰাপান ত্যাগ কৰিব লাগিব৷ তদুপৰি নিয়মীয়াকৈ পানী খোৱাৰ অভ্যাস গঢ়ি তুলিব লাগিব৷ চৰ্বি কমাবৰ বাবে ভাল টোপনিৰ অতি প্ৰয়োজন৷ মুখৰ চৰ্বি কমাবলৈ হ’লে আইচক্ৰিম, ক’ল্ডড্ৰিংকছ, চীপ্ছ জাতীয় বস্তু একেবাৰেই নাখাব৷ ময়দাৰে প্ৰস্তুত কৰা খাদ্যও গ্ৰহণ কৰা উচিত নহয়৷ এই ধৰণে নিয়ম মানি চলিলেই মুখ আৰু চকুৰ তলত জমা হোৱা অতিৰিক্ত চৰ্বিৰ পৰা হাত সাৰিব পাৰি৷