আমাৰ অসম, ২২ জানুৱাৰীঃ জীৱন সিংহক জিৰণি লোৱাৰ পৰামৰ্শ দি কমতাপুৰৰ সপোনক সম্পূৰ্ণ ৰূপে চূৰমাৰ কৰিলে মুখ্যমন্ত্ৰী হিমন্ত বিশ্ব শৰ্মাই৷ শনিবাৰে জনতা ভৱনত এখন সংবাদ মেলত মুখ্যমন্ত্ৰী ড॰ শৰ্মাই কমতাপুৰক লৈ চৰকাৰী পৰ্যায়ত কোনো ধৰণৰ আলোচনা হোৱা নাই বুলি স্পষ্ট কৰি দিয়ে৷ মুখ্যমন্ত্ৰীৰ এই স্থিতিৰ পিছতে ধূলিসাৎ হৈ পৰিল কমতাপুৰ ৰাজ্য গঠনক কেন্দ্ৰ কৰি পশ্চিম অসমৰ কোচ-ৰাজবংশী জনগোষ্ঠীৰ ব্যক্তি বিশেষ আৰু একাংশ দল সংগঠনৰ আনন্দ-উল্লাস৷ জীৱন সিংহৰ আগমনৰ সমান্তৰালভাৱে ২৬ জানুৱাৰীৰ পূৰ্বে কেন্দ্ৰীয় চৰকাৰে কমতাপুৰ ৰাজ্য ঘোষণা কৰিব বুলি কোচ ৰাজবংশী জনগোষ্ঠীৰ একাংশ দল-সংগঠন আৰু নেতাই দৃঢ়তাৰে দাবী কৰি ৰাজহুৱা বিবৃতি পৰ্যন্ত দিছিলে৷ আনকি এইসকল নেতাই কোচ-ৰাজবংশী লোকসকল কোনো  কালে অসমীয়া নাছিল, বাধ্যত পৰিহে অসমত থকা বুলি কেতবোৰ বিভেদকামী মন্তব্য কৰিবলৈ আৰম্ভ কৰিছিল৷ কিন্তু সকলোৰে আশাত চেচা পানী ঢালি শনিবাৰে মুখ্যমন্ত্ৰী ড॰ শৰ্মাই স্পষ্ট কৰি দি কয়–ইমান বছৰ বাহিৰত থকাৰ পিছত কোনোবা এজন মানুহ আহিছে৷ তেওঁক চাহ খাবলৈ দিয়ক৷ অসমখন চাব দিয়ক৷ বুজিব দিয়ক৷ আলোচনা কৰা মানুহ আছে৷ তেওঁলোকে আলোচনা কৰি থাকিব৷ কেতিয়াবা বুজাবুজিৰ চুক্তি স্বাক্ষৰ হ’ব৷ জীৱন সিংহ বহুদিন মূৰ আহিছে৷ ইয়াত থাকিব৷ কথা বাৰ্তা পাতিব৷ তেওঁ যি ৰাজনৈতিক দাবী আছে ভাৰত চৰকাৰক জনাব৷ ভাৰত চৰকাৰে তেওঁৰ লগত আলোচনা কৰিব৷ তাৰ পিছত এদিন চুক্তি হ’ব৷ মোৰ লগত তেওঁ ভাইটি ভাইিট বুলি কথা পাতে৷ মই দাদা দাদা বুলি কথা পাতো৷ মই তেওঁৰ লগত ৰাজনৈতিক কথা কিয় পাতিম৷ এইটো ভাৰত চৰকাৰৰ বস্তু৷ কমতাপুৰক লৈ কোনেও আমাৰ লগত আলোচনা কৰা নাই৷ যেতিয়া আলোচনা হ’ব তেতিয়া সেই বিষয়ে কথা পাতিম৷ কোনেও কমতাপুৰক লৈ মুখ্যমন্ত্ৰী হিচাপে মোক এটা শব্দও কোৱা নাই৷ 

কিন্তু অসমৰ সংবাদ মাধ্যমে ২৬ জানুৱাৰীৰ পূৰ্বে কমতাপুৰ হ’ব বুলি ঘোষণা কৰি দিলে৷ কে এল অক গুৰুত্ব দিব নে ৰাজ্য চৰকাৰৰ কথাক গুৰুত্ব দিব৷ কিবা এটা হ’ব লাগিলে আলোচনা হ’ব লাগিব, ত্ৰিপাক্ষীক বৈঠক হ’ব লাগিব, কথা বতৰা হ’ব লাগিব৷ কিন্তু অসম চৰকাৰৰ লগত এনেকোৱা একো হোৱা নাই৷ আমি কমতাপুৰ স্বায়ত্ব শাসিত পৰিষদ দিছো৷ কৰ পৰা কমতাপুৰ আহিল মইয়ে নাজানো৷ মুখ্য সচিবক বহু বাৰ সুধিছো কিবা কাগজ আহিছে নেকি? একো নাই বুলি কৈছে৷ কিন্তু আমিতো ইয়াত কমতাপুৰ বনাইয়ে দি আছো৷ বহু মানুহ সাজু হৈ আছে যে ২৬ জানুৱাৰীৰ পুৱা কমতাপুৰ গঠনৰ কথা শুনা পাব বুলি৷ অসমখন বহু ভাষিক বহু জাতিৰ এখন ৰাজ্য৷ কেতিয়াবা হয়তো কমতাপুৰক লৈ আলোচনা হ’ব পাৰে৷ তেতিয়া আমি বড়োলেণ্ডৰ নেতা, ৰাভাৰ নেতা, উত্তৰ বংগৰ আন্দোলনকাৰীক আলোচনাৰ বাবে মাতিম৷ বিগত ১৫ দিন ধৰি বেংগলৰ এখন এখন পেপাৰ মই চাই আছো৷ কৰবাত কমতাপুৰৰ বাতৰি ওলাইছে নেকি৷ কিন্তু এটা শব্দও নাই৷ আমি কিয় এইবোৰ কৰি আছো আমিহে জানো৷ খৰ হলেহে মানুহে খুজোৱাই৷ খৰেই নাই তেতিয়া খুজুৱাম কিয়৷ যেতিয়াই বিষয়টো নাই অসম চৰকাৰে কমতাপুৰৰ বিষয়ে কি ক’ব? কমতাপুৰক লৈ অসমীয়া বাতৰি কাকতৰ মাজতে শংকা হৈছে৷ অসম চৰকাৰে এই বিষয়ে একো কথা পতা নাই৷ ভাৰত চৰকাৰে পাতিছে যদিও নাজনো৷ উত্তৰ বংগ যথেষ্ট ডাঙৰ অঞ্চল৷ তাৰ কাকতত কিবা এটা লাইন হ’লেও আহিলেহেঁতেন৷ জীবন সিংহ এতিয়া অসম চৰকাৰৰ অতিথি হৈ আছে৷