মুখ্যমন্ত্ৰী ড॰ হিমন্ত বিশ্ব শৰ্মাই বাল্য বিবাহ বন্ধ কৰাৰ উদ্দেশ্যে কঠোৰ স্থিতি গ্ৰহণ কৰি নিষিদ্ধ বয়সত বিবাহপাশত আবদ্ধ হোৱাসকলক গ্ৰেপ্তাৰ কৰি শাস্তি বিহিবলৈ আৰক্ষী বিভাগক নিৰ্দেশ দিছে৷ মুখ্যমন্ত্ৰী ড॰ শৰ্মাৰ নিৰ্দেশ পোৱাৰ পাছতে আৰক্ষী বিভাগ এনে লোকৰ বিৰুদ্ধে সষ্টম হৈ পৰে আৰু ৰাজ্যত আৰক্ষী বিভাগৰ ফালৰ পৰা এনে লোকৰ বিৰুদ্ধে গোচৰ ৰুজু কৰাৰ ধুম উঠিছে৷ ৰাজ্যৰ আৰক্ষী সঞ্চালকপ্ৰধান জি পি সিঙে শুকুৰবাৰে প্ৰকাশ কৰা অনুসৰি মাত্ৰ দুটা দিনত বাল্য বিবাহ সন্দৰ্ভত ৪,০৭৪টা গোচৰ পঞ্জীয়ন হৈছে আৰু এই গোচৰসমূহত ৮ হাজাৰ অপৰাধীৰ নাম সন্নিবিষ্ট হৈছে৷ আৰক্ষী সঞ্চালকপ্ৰধানজনে জনোৱা মতে, ২০২০, ২০২১ আৰু ২০২২ বৰ্ষৰ ভিতৰত হোৱা বাল্য বিবাহ সন্দৰ্ভত গাঁওবুঢ়া, ৰাইজ আৰু পৰিয়ালৰ লোকে দিয়া গোচৰৰ ভিত্তিত অপৰাধীক আৰক্ষীয়ে গ্ৰেপ্তাৰ কৰে৷ বাল্য বিবাহ প্ৰতিৰোধ আইন অনুসৰি অপৰাধীক দুবছৰ জে’ল আৰু জৰিমনা বিহাৰ নিৰ্দেশ আছে৷ মুখ্যমন্ত্ৰী ড॰ হিমন্ত বিশ্ব শৰ্মাই দিয়া নিৰ্দেশ অনুসৰি ১৪ বছৰ তলৰ ছোৱালীক বিয়া কৰোৱা লোকক শিশুৰ বিৰুদ্ধে যৌন অপৰাধ আইনৰ অধীনত যাৱজ্জীৱন কাৰাদণ্ড বিহিব৷ আনহাতে, ১৪-১৮ বছৰ বয়সৰ ছোৱালীক বিয়া কৰোৱা লোকক দুবছৰ জে’ল আৰু জৰিমনা বিহাৰ নিৰ্দেশ দিছে৷ উল্লেখ্য, বাল্য বিবাহ হোৱাৰ বাবেই অসমত জনসংখ্যা অনিয়ন্ত্ৰিত হাৰত বৃদ্ধি পাইছে৷ বিভিন্ন ইছ্যুত যিদৰে বিভিন্ন সময়ত গণআন্দোলন হৈছে, তেনে আন্দোলন যদি বাল্য বিবাহ ৰোধ কৰাৰ ক্ষেত্ৰত হ’লহেঁতেন, তেন্তে অসমত আজি জনসংখ্যা বৃদ্ধিৰ হাৰ অনিয়ন্ত্ৰিত নহ’লহেঁতেন৷ বাল্য বিবাহৰ বাবে ৰাজ্যত নৱজাতক আৰু প্ৰসূতিৰ মৃত্যুৰ হাৰ উদ্বেগজনক৷ নেচনেল ফেমিলী হেল্‌থ ছাৰ্ভে-৫১ প্ৰতিবেদনত প্ৰকাশ পোৱা অনুসৰি, অসমত ১১.৭ শতাংশ ছোৱালীয়েই কম বয়সত মাতৃত্বৰ বোজা ল’বলগীয়া হয়৷ দেশত ছোৱালীৰ বিয়াৰ বয়স ১৮ বছৰ যদিও অসমত ৩১.৮ শতাংশ ছোৱালীয়েই নিষিদ্ধ বয়সত বিবাহপাশত আবদ্ধ হয়৷ মূলতঃ দুখীয়া পৰিয়ালৰ লোকে ছোৱালীক বোজা বুলি গণ্য কৰি বিয়া দি সেই বোজাৰ পৰা মুক্তি পাব বিচাৰে৷ এনে বিয়াৰ ক্ষেত্ৰত প্ৰকৃততে দোষী অভিভাৱক আৰু বিয়া পতা পৰিয়াল৷ সাধাৰণতে শিক্ষা-দীক্ষাত পিছপৰা অঞ্চল, অৰ্থনৈতিকভাৱে দুৰ্বল লোক, চৰ-চাপৰি, জনগোষ্ঠীয় আৰু চাহ বাগিচা অঞ্চলত বাল্য বিবাহৰ ঘটনা অধিক৷ বহু লোকে আকৌ জাল জন্মৰ প্ৰমাণ-পত্ৰ উলিয়াই বয়স ১৮ বছৰৰ অধিক হোৱা বুলি কৈও বিবাহপাশত আবদ্ধ হয়৷ এনে ক্ষেত্ৰত জাল প্ৰমাণ-পত্ৰ দিয়া সংশ্লিষ্ট লোকসকল অধিক দায়ী৷ এইসকল লোককো গ্ৰেপ্তাৰ কৰি কাৰাবাস খাটিবলৈ দিলে হয়তো এনে অপকৰ্ম ৰোধ কৰিব পৰা যাব৷ দেশত শিশুৰ বিৰুদ্ধে যৌন অপৰাধ আইন আৰু বাল্য বিবাহ প্ৰতিৰোধ আইন ২০০৬ থকাৰ পাছতো বাল্য বিবাহ সমাজত হৈয়েই আছে৷ তদুপৰি প্ৰায়বোৰ সমাজতে বাল্য বিবাহৰ ঘটনা দেখিও সমাজৰ লোকসকলে চকু মুদা কুলিৰ ভাও ধৰি থাকে৷ বাল্য বিবাহ ৰোধ কৰিবৰ বাবে চৰকাৰ আৰু আৰক্ষী কঠোৰ হ’লেই ইয়াক ৰোধ কৰা সম্ভৱ নহ’ব, যদিহে জনসাধাৰণ এইক্ষেত্ৰত সজাগ নহয় আৰু অপৰাধীৰ পক্ষ লয়৷ বাল্য বিবাহ ৰোধ কৰাৰ বাবে মুখ্যমন্ত্ৰী ড॰ হিমন্ত বিশ্ব শৰ্মাই যি পদক্ষেপ গ্ৰহণ কৰিছে, সেয়া নিশ্চয় আদৰণীয়৷ বাল্য বিবাহ ৰোধ হ’লেহে আবাদী নিয়ন্ত্ৰিত হ’ব৷ ইয়াৰ লগতে ছোৱালীক উন্নতমানৰ শিক্ষা দিয়াৰ ব্যৱস্থা কৰি আত্মনিৰ্ভৰশীল হোৱাত সহায়ক কৰি তুলিলেহে বাল্য বিবাহ ৰোধ কৰিব পৰা যাব৷