অষ্ট্ৰেলিয়াৰ ব্যৱসায়ীৰ পৰা ৫০০ কোটি লৈ পলাল অসমৰ প্ৰৱঞ্চক

আমাৰ অসম, ২০ ফেব্ৰুৱাৰীঃ অষ্ট্ৰেলিয়াত ভাৰতৰ প্ৰধানমন্ত্ৰী গ্ৰাম চড়ক যোজনাৰ নামত সংঘটিত হোৱা এক বৃহৎ কেলেংকাৰি ধৰা পৰিছে৷  আৰু এই অপৰাধ সংঘটিত কৰিছে শিলচৰৰ বাসিন্দা অস্বৰ্জিত এণ্ডো ওৰফে ৰণিয়ে৷  এই ঘটনা পোহৰলৈ আহিছে অষ্ট্ৰেলিয়াৰ আগশাৰীৰ বাতৰি কাকত ‘দ্য ছিডনী মৰ্নিং হেৰাল্ড’ আৰু ‘দ্য এজ’ যোগে৷  প্ৰকাশিত তদন্তৰ প্ৰতিবেদন অনুসৰি অস্বৰ্জিতে ভাৰত চৰকাৰৰ গ্ৰাম্য পথ প্ৰকল্প ৰূপায়ণৰ বাবে আনুষংগিক বণ্ড ক্ৰয় কৰাৰ প্ৰতিশ্ৰুতি দি    দেশত ধন সংগ্ৰহ কৰিছিল৷  তেওঁ ছিডনীৰ প্ৰায় ৬০জন প্ৰথম স্তৰৰ বিনিয়োগকাৰীৰ পৰা বিপুল পৰিমাণৰ ধন আদায় কৰিছিল৷ ছমাহৰ ভিতৰত ৪০ শতাংশ পৰ্যন্ত লাভৰ প্ৰতিশ্ৰুতি দিছিল৷  কিছু মাহৰ ভিতৰত প্ৰায় ৬ কোটি ডলাৰ [ভাৰতীয় মুদ্ৰাত প্ৰায় ৪৯৭ কোটি টকা] সংগ্ৰহ কৰি যোৱা বছৰৰ ডিচেম্বৰ মাহত অস্বৰ্জিতে ছিডনীৰ পৰা পলায়ন কৰিছিল৷  বিষয়টো পোহৰলৈ অহাৰ পিছতে বিনিয়োগকাৰীৰ মাজত আলোড়নৰ সৃষ্টি হয়৷  ইতিমধ্যে বহুতে ছিডনীৰ নিউ চাউথ ৱেলছ আৰু ভিক্টোৰিয়া আৰক্ষীত জালিয়াতিৰ গোচৰ ৰুজু কৰিছে৷  ৰাজ্য দুখনৰ আৰক্ষীয়ে তদন্ত চলাই বহু তথ্য সংগ্ৰহ কৰে৷ খবৰ অনুসৰি, শিলচৰৰ অস্বৰ্জিত ওৰফে ৰনিয়ে ছিডনীত ইনফ’ছিছৰ বিশ্লেষক হিচাপে নিজৰ কেৰিয়াৰ আৰম্ভ কৰিছিল৷  ২০০৮ চনত অষ্ট্ৰেলিয়াৰ আগশাৰীৰ পৰামৰ্শদাতা আৰু একাউণ্টিং প্ৰতিষ্ঠান ডেলয়টত জ্যেষ্ঠ পৰামৰ্শদাতা  আৰু অংশীদাৰ হিচাপে যোগদান কৰে৷  তাত ১৩ বছৰ কাম কৰাৰ ফলত তেওঁ দেশৰ শ্ৰেষ্ঠ বিনিয়োগকাৰীৰ সংস্পৰ্শলৈ আহিছিল৷  অৱশ্যে ডেলয়টত থকাৰ সময়তে অস্বৰ্জিতে নিজৰ জালিয়াতিৰ ফান্দ পাতে৷  তেওঁ নিজাকৈ এটা কোম্পানী ‘এণ্ডো ফেমিলি কেপ ট্ৰাষ্ট’ গঠন কৰিছিল৷  ২০২১ চনত  ডেলয়ট এৰি আন এটা কোম্পানী ছেয়াৰ্ছ গ্ৰুপত যোগদান কৰে৷  কিন্তু তাৰ পৰা ছমাহৰ পাছত চাকৰি এৰি তথাকথিত ভাৰত চৰকাৰৰ বণ্ড ক্ৰয় কৰিবলৈ ভুৱা আঁচনি সৃষ্টি কৰিলে৷  ইয়াৰ মাজতে তেওঁৰ পুৰণি কোম্পানী দুটাৰ পৰাও কিছু বিখ্যাত আৰু বিশ্বাসযোগ্য বিনিয়োগকাৰী লাভ কৰিছিল৷  অস্বৰ্জিতৰ সংগঠনতো তেওঁলোকে ধন বিনিয়োগ কৰিছিল৷  ভাৰত চৰকাৰৰ উন্নয়নমূলক প্ৰকল্পত বিনিয়োগ কৰিলে অৱশেষত লাভ হ’ব বুলি সকলোৱে বিশ্বাস কৰিছিল৷ গতিকে অস্বৰ্জিতৰ এই প্ৰস্তাৱত আৰু প্ৰধানমন্ত্ৰী প্ৰকল্পত ধন বিনিয়োগ কৰিবলৈ বহুতেই সন্মতি দিলে৷  পিছত অস্বৰ্জিতে সেই  ডেলয়টত নেতা আৰু আনৰ নাম ভাঙি সমগ্ৰ অষ্ট্ৰেলিয়াৰ পৰা ধন সংগ্ৰহ কৰিবলৈ আৰম্ভ কৰিলে৷ ‘দ্য ছিডনী মৰ্নিং হেৰাল্ড’ আৰু ‘দ্য এজ’ৰ বাতৰি অনুসৰি এই ঘটনাৰ তদন্তৰ অন্তত অস্বৰ্জিতৰ বিৰুদ্ধে বিভিন্নধৰণৰ জালিয়াতিৰ প্ৰমাণ পোৱা গৈছে৷  তেওঁ বিনিয়োগকাৰীক সম্পূৰ্ণ ৰিস্কমুক্ত আৰু বিশাল পৰিমাণৰ ৰিটাৰ্ণৰ প্ৰতিশ্ৰুতিৰে প্ৰলোভিত কৰিছিল৷ ২০১৯ চনত অস্বৰ্জিতৰ এটা প্ৰফাইলত তেওঁ উল্লেখ কৰে যে ভাৰতত তেওঁৰ পাৰিবাৰিক ব্যৱসায় অতি ভাল চলি আছে৷  প্ৰধানমন্ত্ৰী গ্ৰাম চড়ক যোজনাৰ বাবে দেশৰ প্ৰথম তিনিজন ঠিকাদাৰৰ ভিতৰত অন্যতম৷  মুঠতে তেওঁ বিভিন্নধৰণে প্ৰতিষ্ঠা কৰিলে যে এই প্ৰকল্পত বিনিয়োগ কৰিলে কোনো বিপদ নাই৷  অস্বৰ্জিতে বিনিয়োগকাৰীক আকৰ্ষণীয় ৰিটাৰ্ণৰো সুবিধা প্ৰদান কৰে৷  প্ৰফাইলটোৰ মতে, যিসকলে ৫০ হাজাৰ ডলাৰ দিব তেওঁলোকে ছমাহৰ পাছত ২০.১২ শতাংশ হাৰত সকলো ধন ঘূৰাই পাব৷  যিসকলে এক চতুৰ্থাংশ মিলিয়ন ডলাৰতকৈ অধিক বিনিয়োগ কৰে তেওঁলোকৰ বাবে তেওঁ ৩৯.০২ শতাংশ লাভৰ নিশ্চয়তা দিয়ে৷  আৰু সকলো লেনদেন অষ্ট্ৰেলিয়াৰ চাৰিটা বৃহৎ বেংকৰ জৰিয়তে কৰা হয়৷  সমগ্ৰ ঘটনা পোহৰলৈ অহাৰ পিছত অভিযোগৰ প্ৰতি লক্ষ্য ৰাখি ছিডনী আৰক্ষীয়ে তদন্ত আৰম্ভ কৰে৷  আনহাতে, একাংশ বৃহৎ বিনিয়োগকাৰীয়ে ব্যক্তিগত তদন্তকাৰী প্ৰতিষ্ঠান ‘ডাস্কটন হিল’ক এই গোচৰৰ তদন্ত আৰু অস্বৰ্জিতৰ পৰা হেৰাই যোৱা ধনৰ সন্ধান উলিয়াবলৈ নিযুক্তি দিছিল৷ ডাস্কটন হিলৰ এগৰাকী বিষয়াই সংবাদ মাধ্যমৰ আগত কয় যে, অস্বৰ্জিতে ইতিমধ্যে দেশৰ চাৰিটা বেংকৰ পৰা সকলো ধন ট্ৰেন্সফাৰ কৰিছে৷  আনকি গোটেই অষ্ট্ৰেলিয়াতো তেওঁক পোৱা নাযায়৷  ইতিমধ্যে অষ্ট্ৰেলিয়া চৰকাৰে এই বিষয়ত ভাৰত চৰকাৰৰ পৰা সহায় বিচাৰিছে৷ ছিডনীৰ পৰা অস্বৰ্জিত নিৰুদ্দেশ হোৱাৰ পাছত তদন্তকাৰী বিষয়াসকলে কেইবাটাও তথ্য জানিবলৈ পায়৷  তেওঁৰ বিলাসী জীৱনশৈলী স্পষ্ট আছিল৷  অস্বৰ্জিতে কোৰিয়ান পত্নী মিনহি এণ্ডো আৰু দুটা সন্তানৰ সৈতে ছিডনীৰ ডেল্টা গুডৰেমৰ ওচৰৰ ছিডনী এপাৰ্টমেণ্টত বাস কৰিছিল৷  ক’লা ৰঙৰ পৰ্ছে এখনো আছিল৷ অস্বৰ্জিতৰ প্ৰৱঞ্চনা কেৱল অষ্ট্ৰেলিয়াতে সীমাবদ্ধ নাছিল৷  সেই জাল তেওঁ ভাৰততো বিয়পাই দিছিল৷  নতুন দিল্লীৰ বাসিন্দা মেহেৰজিৎ শ্বাহ নামৰ এগৰাকী গৃহিণীয়ে ছ’চিয়েল মিডিয়াত অস্বৰ্জিতৰ বিৰুদ্ধে প্ৰচাৰ চলাইছে৷ বিভিন্ন পোষ্টত তেওঁ লিখিছে, ‘শিলচৰৰ অস্বৰ্জিত এণ্ডো নামৰ এজন ব্যক্তিৰ বিষয়ে এটা আমনিদায়ক কাহিনী শ্বেয়াৰ কৰিব বিচাৰিছো৷  তেওঁৰ ডাকনাম ৰনি৷  অষ্ট্ৰেলিয়াত ভুৱা প্ৰজেক্ট চলাই মানুহৰ পৰা ৬ কোটি ডলাৰ চুৰি কৰিছিল৷  ময়ো ভুক্তভোগীৰ ভিতৰত এজন৷ অস্বৰ্জিতে প্ৰধানমন্ত্ৰী গ্ৰাম সড়ক যোজনাত বিনিয়োগ কৰিবলৈ প্ৰস্তাব দিয়ে৷  এই কেলেংকাৰি এতিয়াও চলি আছে৷  গতিকে অস্বৰ্জিত আৰু তেওঁৰ পত্নী মিনহিৰ বিষয়ে আপোনালোকক সকীয়াই দিব বিচাৰিছো৷  কোনেও তেওঁলোকক বিশ্বাস কৰি টকা বিনিয়োগ নকৰে৷  মোক সিহঁতক ধৰিবলৈ সহায় কৰক৷  যদি কোনোবাই ছবিখন চিনি পায়, বা ক’ৰবাত দেখা পাইছে, তেন্তে অনুগ্ৰহ কৰি এটা বাৰ্তা দিব৷’ প্ৰসংগক্ৰমে অস্বৰ্জিত বা ৰনি ৰটাৰী ক্লাব শিলচৰ শাখাৰ অন্যতম নেতা অৰিজিত এণ্ডোৰ পুত্ৰ৷  যোৱা ডিচেম্বৰ মাহত ছিডনীৰ পৰা পলায়ন কৰি পৰিয়ালৰ সৈতে পোনে পোনে শিলচৰলৈ গুচি আহে৷  শেহতীয়া খবৰ অনুসৰি ইয়াত কিছু দিন কটাই তেওঁ শিলচৰ আৰু গুৱাহাটীত আত্মগোপন কৰি আছে৷  বহুতে নিজৰ গৃহভূমিৰ পৰা চৰকাৰী সম্পত্তি বিক্ৰী কৰি আছে৷ সেয়া হয়তো স্বাভাৱিক পৰিঘটনা৷  কিন্তু অস্বৰ্জিতে বহিঃৰাজ্যত বহিঃভাৰত চৰকাৰৰ প্ৰকল্প বিক্ৰী কৰি বিপুল পৰিমাণৰ ধন আত্মসাৎ কৰিছিল৷  সেই টকা হজম কৰিব পাৰি নে নাই সেয়া সময়ে ক’ব৷