‘আমাৰ অসম’ বিশেষ সেৱা, নতুন দিল্লী, ২১ এপ্ৰিলঃ আফ্ৰিকাৰ দেশ ছুডানত গৃহযুদ্ধই ভয়াৱহ ৰূপ ধাৰণ কৰাৰ সময়তে তাত থকা ভাৰতীয় লোকসকলৰ সুৰক্ষাৰ দিশটোক লৈও ভাৰত চৰকাৰ চিন্তিত হৈ পৰিছে৷ তেওঁলোকৰ সুৰক্ষাৰ বাবে ভাৰত চৰকাৰে আমেৰিকা, ব্ৰিটেইন, ছৌদি আৰব, সংযুক্ত আৰব এমীৰেটছৰ সৈতে সঘন যোগাযোগ অব্যাহত ৰাখিছে৷ ক্ষমতাৰ বাবেই ছুডানৰ সেনাৰ দুজন মুৰব্বী আৰু তেওঁলোকৰ অধীনত থকা সেনাৰ মাজত হোৱা যুদ্ধই এতিয়ালৈকে তিনিশৰো অধিক লোকৰ প্ৰাণ লৈছে আৰু প্ৰায় তিনি হাজাৰ সেনা-সাধাৰণ লোক আহত হৈছে৷ আকাশত বিকট শব্দ কৰি উৰা যুঁজাৰু বিমান, পথত ঘূৰি ফুৰা টেংক আৰু বোমা বিস্ফোৰণ-গুলীচালনাই ছুডানৰ ৰাজধানী খাৰ্টুম আৰু ইয়াৰ আশে-পাশে থকা স্থানৰ পৰিস্থিতি শোচনীয় কৰি তুলিছে৷ তেনে অৱস্থাত ৰাজধানী খাৰ্টুমৰ পৰা হাজাৰ হাজাৰ লোকে পলায়ন কৰিছে৷ খাৰ্টুমৰ বিমানবন্দৰ আৰু ষ্টেচনৰ লগতে গুৰুত্বপূৰ্ণ স্থান দখলৰ বাবে যুঁজ অব্যাহত আছে৷ কিন্তু তাৰ মাজতে ইয়াত থকা চাৰি হাজাৰৰো অধিক ভাৰতীয় আৱদ্ধ হৈ পৰিছে৷ মাত্ৰ ৫২ লাখ জনসংখ্যা থকা ছুডানৰ সৰ্ববৃহৎ চহৰ খাৰ্টুমত ভয়ংকৰ পৰিস্থিতিৰ মাজতে তাত আৱদ্ধ ভাৰতীয়সকলৰ সুৰক্ষাৰ কথাটোৱে ব্যাপক চৰ্চা লাভ কৰিছে৷ ভাৰত চৰকাৰে এই লোকসকলক উদ্ধাৰৰ বাবে চিন্তা-চৰ্চা আৰম্ভ কৰিছে যদিও পৰিস্থিতি ইমানেই ভয়ংকৰ যে তাত উদ্ধাৰ অভিযান চলোৱাটো সহজ নহয়৷ ছুডানত থকা ভাৰতীয় দূতাবাসে এই লোকসকলৰ নিৰাপত্তাৰ বাবে সকলো প্ৰকাৰে চেষ্টা অব্যাহত ৰাখিছে৷ অধিক ভাৰতীয় ছুডানৰ চাৰিখন চহৰত বাস কৰি আহিছে৷ কিন্তু এই চাৰিখন চহৰৰ পৰা এই ভাৰতীয়সকলক উদ্ধাৰ কৰাটো কোনোপধ্যেই সহজ নহয়৷ তদুপৰি প্ৰাণৰ মায়াত লুকাই থকা ভাৰতীয়সকলে খাদ্য আৰু বিদ্যুৎ অবিহনে সময় পাৰ কৰিবলগীয়া হৈছে৷