ডিজিটেল সংবাদ, গুৱাহাটীঃ  খাৰঘুলিত জাইকা প্ৰকল্পৰ অধীনত গেমন ইণ্ডিয়াই স্থাপন পানীৰ পাইপত মাত্ৰ চাৰিদিন মান আগতে জল বিস্ফোৰণৰ ঘটনা সংঘটিত হৈ এগৰাকী মহিলা নিহত আৰু দহজনৰো অধিক লোক আহত হৈ চিকিৎসাধীন হ'ব লগা হোৱা ঘটনাৰ ৰাজ্যজুৰি প্ৰতিক্ৰিয়া চলি থকাৰ মাজতে সোমবাৰে বিয়লি  মালিগাঁও চাৰিআলিৰ পিয়লি ফুকন চ'কৰ পাণ্ডু সংযোগী পথৰ জালুকবাৰী থানাৰ সন্মুখত পুনৰ গেমন ইণ্ডিয়াই এক দশক পূৰ্বে বহুওৱা পানীৰ পাইপ ফুটি হাহাকাৰ অৱস্থাৰ সৃষ্টি হয়। ফলত প্ৰায় এঘণ্টা ধৰি পাণ্ডু সংযোগী পথৰ যাতায়ত ব্যৱস্থা বন্ধ হৈ পৰাৰ লগতে  তীব্ৰ যান-জঁটৰ সৃষ্টি হয়। জানিব পৰা মতে জালুকবাৰী থানাৰ সন্মুখত পাণ্ডু সংযোগী পথত চলি থকা নিৰ্মীয়মান উৰণীয়া সেতুৰ তলত অইন দিনৰ দৰে সোমবাৰেও  দোকান-পোহাৰ, যান-বাহন চলাচলকে ধৰি পথচাৰীসকলে যাতায়ত কৰি আছিল। বিয়লি প্ৰায় ৩ মান বজাত হঠাৎ থানাৰ সন্মুখত পাইপ ফুটি প্ৰায় ২০ মিটাৰমান ওপৰলৈ পানীৰ ফোৱাৰা সৃষ্টি হয়। লগে লগে পাণ্ডু সংযোগী পথটো  জলমগ্ন হৈ পৰে  আৰু এক অভাৱনীয় পৰিস্থিতিৰ সৃষ্টি হয়।