ডিজিটেল সংবাদ, গুৱাহাটীঃ "যুৱ প্ৰজন্মৰ জনপ্ৰিয় শিল্পী জুবিন গাৰ্গক নৱ প্ৰজন্মই অনুকৰণ কৰে। জনপ্ৰিয় শিল্পী জুবিন গাৰ্গক মঞ্চৰ পৰা মাইক্রফোন দলিয়াই দিয়াৰ দৰে আচৰণ নকৰিবলৈ আমি আহ্বান জনালোঁ৷" এইদৰে কয়, ছাউণ্ড ছিষ্টেম প্ৰভাইদ্বাৰছ এছ'চিয়েচন অৱ অসম (এছ এছ পি এ এ )ৰ সাধাৰণ সম্পাদক ফুকন আলীয়ে। দেওবাৰে দিছপুৰ প্ৰেছ ক্লাবত এছ'চিয়েচনৰ উদ্যোগত অনুষ্ঠিত এখন সংবাদ মেলত তেওঁ লগতে কয় যে জনপ্ৰিয়  শিল্পী জুবিন গাৰ্গ যাক অসমবাসী ৰাইজে হিয়াৰ আমঠু, নয়নৰ মণি বুলি সম্বোধন কৰে, তেওঁক আমি সদায় অশেষ মৰম আৰু সন্মান জনাই আহিছো। দুৰ্ভাগ্যবশত ৩ জুনত লখৰাত অনুষ্ঠিত হোৱা সাংস্কৃতিক অনুষ্ঠানত জনপ্ৰিয় শিল্পী জুবিন গাৰ্গে মঞ্চত অনুষ্ঠান পৰিৱেশন কৰি থাকোতে হঠাৎ সহঃশিল্পীগৰাকীৰ হাতৰ পৰা মাইক্রফোনটো কাঢ়ি আনি দৰ্শক ৰাইজৰ মাজলৈ দলিয়াই দিয়ে। এই কাৰ্যটোত আমি গভীৰ উদ্বেগ প্রকাশ কৰিছোঁ আৰু অসমৰ শব্দযন্ত্ৰৰ মালিকসকলে বৰ আঘাট পাইছে। মাইক্রফোনটো দলিয়াই নিদি যদি ভাল কৰি বা অন্য এটা দিবলৈ ক'লেহেঁতেন এটা মানৱতাৰ নিদৰ্শন দাঙি ধৰা হলহেঁতেন। মেচিনাৰী সামগ্ৰী যান্ত্ৰিক বিজুতি হোৱাটো স্বাভাবিক কথা। আমি যাত্ৰা কৰা গাড়ীখন যান্ত্ৰিক বিজুতি ঘটিব পাৰে, আমি ব্যৱহাৰ কৰা মোবাইল ফোনটোৱেও নেটৱৰ্ক নাপাবও পাৰে৷ সেইবাবে আমি দলিয়াই বা ভাঙি পেলাম নেকি?