‘আমাৰ অসম’ৰ ষ্টাফ ৰিপ’ৰ্টাৰ, ১৩ জুনঃ প্ৰাপ্য বিচাৰি আন্দোলনৰ পথ লোৱাৰ কথা ঘোষণা কৰা শিক্ষকসকলক উদ্দেশ্যি পুনৰ তাচ্ছিল্যসূচক মন্তব্য কৰিছে শিক্ষামন্ত্ৰী ৰণোজ পেগুৱে৷ দাবী পূৰণ নহ’লে চাকৰি বাদ দিয়াৰ হুংকাৰ দিয়া শিক্ষকসকলে চাকৰি এৰি নিৰ্বাচন খেলা উচিত বুলি উপলুঙাসূচক মন্তব্য আগবঢ়াইছে শিক্ষামন্ত্ৰীয়ে৷ ৰাজনীতিৰ প্ৰতি আকৰ্ষিত শিক্ষকসকলক চাকৰি ইস্তফা দি প্ৰত্যক্ষ ৰাজনীতিত জড়িত হ’বলৈ ইতিকিংসূচক পৰামৰ্শ দিছে শিক্ষামন্ত্ৰীয়ে৷ সোমবাৰে গুৱাহাটীৰ দিছপুৰস্থিত নেডফি হাউচত এখন সংবাদমেল আয়োজন কৰি শিক্ষামন্ত্ৰী পেগুৱে কয়–ৰাজ্যৰ শিক্ষকসকলৰ সমস্যাক লৈ সকলো সজাগ৷ শিক্ষকৰ সমস্যা লৈ শিক্ষকসকলে চিন্তন বৈঠক অনুষ্ঠিত কৰিছে৷ কিন্তু ছাত্ৰ-ছাত্ৰীৰ সমস্যাক লৈ সৰৱ নহয় শিক্ষক সমাজ৷ শিক্ষকৰ সমস্যাক লৈ যদি চিন্তন বৈঠক অনুষ্ঠিত কৰা হয়, ছাত্ৰ-ছাত্ৰীৰ সমস্যাক লৈও চিন্তন বৈঠক অনুষ্ঠিত হ’ব লাগে৷ শিক্ষকসকলে যদি সঁচাকৈ ছাত্ৰ-ছাত্ৰীৰ কল্যাণ বিচাৰে তেনেহ’লে ছাত্ৰ-ছাত্ৰীৰ চিন্তন বৈঠকৰ নেতৃত্ব ল’ব লাগে শিক্ষক সমাজে৷ এচাম শিক্ষক ৰাজনীতিৰ প্ৰতি অধিক আকৰ্ষিক হোৱা দেখা গৈছে৷ তেওঁলোকে বিজেপিক ভোট নিদিও বুলি সিদ্ধান্ত লৈছে৷ তেওঁলোকে চাকৰি বাদ দি বিজেপি বিৰোধী দল গঠন কৰক বা আন বিৰোধী দলত যোগ দিয়ক৷ তাত কোনো বাধা নাই৷ কিন্তু চৰকাৰী চাকৰি কৰি থাকি ৰাজনীতি কৰি যাব এয়া হ’ব নোৱাৰে৷ তেওঁলোকে পদত্যাগ কৰি বিজেপি বিৰোধী দলত যোগদান কৰক৷ উল্লেখ্য, ৰাজ্যৰ ঠিকাভিত্তিক টেট্‌ শিক্ষকসকলে চাকৰি নিয়মীয়া নকৰিলে ইয়াৰে প্ৰতিবাদত পৰৱৰ্তী নিৰ্বাচনত বিজেপিক সমৰ্থন নকৰে বুলি ঘোষণা কৰিছিল৷ প্ৰতিবাদী টেট্‌ শিক্ষকসকলৰ এনে মন্তব্যৰ পাছত শিক্ষামন্ত্ৰী পেগুৱে শিক্ষকসকলক উপলুঙাসূচকভাৱে চাকৰি ইস্তফা দি নিৰ্বাচন খেলিবলৈ পৰামৰ্শ দিয়ে৷ ঠিকাভিত্তিক টেট্‌ শিক্ষকসকলে চাকৰি নিয়মীয়াকৰণৰ দাবীত দীৰ্ঘদিনে প্ৰতিবাদ কৰি আহিছে৷