‘আমাৰ অসম’ৰ বিশেষ প্ৰতিবেদন, ১১ আগষ্টঃ বেংকৰ পৰা ঋণ লৈ দেশ এৰি পলায়ন কৰা গুজৰাটী ব্যৱসায়ী নীৰৱ মোদীৰ নাম লৈ সদনৰ পৰা নিলম্বিত হ’ল কংগ্ৰেছ নেতা অধীৰ ৰঞ্জন চৌধুৰী৷ অৱশ্যে তেওঁ নীৰৱ মোদী প্ৰসংগত কোনো বক্তব্য উত্থাপন কৰা নাছিল, মণিপুৰ সন্দৰ্ভত প্ৰধানমন্ত্ৰীক তেওঁ ‘নীৰৱ মোদী’ বুলি মন্তব্য কৰিছিল৷ ফলত আশোভনীয় আচৰণৰ বাবে কংগ্ৰেছৰ লোকসভাৰ সংসদীয় দলৰ নেতা অধীৰ ৰঞ্জন চৌধুৰীক অধিৱেশনৰ প্ৰায় শেষ সময়ত, প্ৰধানমন্ত্ৰীৰ বক্তৃতাৰ অন্তত লোকসভাৰ পৰা নিলম্বিত কৰে৷ বৃহস্পতিবাৰে তেওঁ প্ৰধানমন্ত্ৰীক মণিপুৰ প্ৰসংগত নীৰৱ মোদী বুলি মন্তব্য কৰিছিল৷ অৱশ্যে সংসদীয় পৰিক্ৰমা মন্ত্ৰী প্ৰহ্লাদ যোশীয়ে উত্থাপন কৰা প্ৰস্তাৱত সেই কথা উল্লেখ নাই, বৰং দুৰ্বব্যৱহাৰৰ বাবে তেওঁক নিলম্বিত কৰিব লাগে বুলি প্ৰস্তাৱ উত্থাপন কৰে৷ যোশীৰ মতে কংগ্ৰেছৰ দলনেতাজনে চৰকাৰী পক্ষৰ বক্তাৰ বক্তৃতাৰ মাজত বহুসময়ত হস্তক্ষেপ কৰি আছিল৷ বিৰোধী শূন্য সদনত সেই প্ৰস্তাৱ বিনা বাধাই গৃহীত হয়৷ উল্লেখ্য, ইয়াৰ পূৰ্বে দেশৰ সংসদীয় ইতিহাসত কেতিয়াও কংগ্ৰেছৰ লোকসভাৰ দলপতিক নিলম্বিত কৰা হোৱা নাছিল৷ এতিয়া এই প্ৰস্তাৱ সদনৰ ‘প্ৰিভিলেজ কমিটী’লৈ প্ৰেৰণ কৰা হৈছে৷ যেতিয়ালৈকে ‘প্ৰিভিলেজে কমিটী’য়ে এই সন্দৰ্ভত সিদ্ধান্ত গ্ৰহণ নকৰে তেতিয়ালৈকে অধীৰ ৰঞ্জন চৌধুৰী নিলম্বিত হৈ থাকিব৷