উল্লেখযোগ্য যে দীৰ্ঘদিন ধৰি কাব্যচৰ্চা কৰি অহা কবি জংকি শৰ্মাৰ বিভিন্ন কবিতাই ইতিমধ্যে পাঠক সমাজৰ সমাদৰ লাভ কৰিছে । হাইস্কুলীয়া দিনৰ পৰাই সাহিত্যচৰ্চাৰ লগত জড়িত জংকি শৰ্মাই ২০১৮ বৰ্ষত লাভ কৰিছিল নলবাৰী মহাবিদ্যালয়ৰ শ্ৰেষ্ঠ সাহিত্যিকৰ সন্মান । শিশু কাকত 'জিজ্ঞাস'ত প্ৰথম আত্মপ্ৰকাশ কৰা জংকি শৰ্মাৰ কবিতা পৰৱৰ্তীকালত দৈনিক অসম, জনমভূমি, গৰীয়সী, সাতসৰী, গণ অধিকাৰ, যাত্ৰা, সেউজী-সেউজী আদিত প্ৰকাশ পায় । ২০২০ বৰ্ষত প্ৰকাশ পায় জংকি শৰ্মাৰ প্ৰথমখন কবিতা সংকলন 'চহৰতো এখন আকাশ আছে'৷ ব্যতিক্ৰমী বক্তব্যৰ আৰু বিশেষকৈ টুকুৰা কবিতা (fragment poetry)ৰ বাবে জনপ্ৰিয় হোৱা কবি জংকি শৰ্মা আমন্ত্ৰিত হৈছিল আকাশবাণী, গুৱাহাটীৰ দ্বাৰা সম্প্ৰচাৰিত 'যুৱবাণী' অনুষ্ঠানলৈ ৷ অতি সচেতনভাৱে নতুন নতুন বিষয় আৱিষ্কাৰেৰে কবিতা লিখি থকা জংকি শৰ্মাৰ কবিতা ইতিমধ্যে বাংলালৈও অনূদিত হৈছে৷ ভূগোল বিজ্ঞান বিষয়ৰ স্নাতকোত্তৰ জংকি শৰ্মাই বৰ্তমান কবিতাত বিভিন্ন উত্তৰ আধুনিককালীন পৰীক্ষা-নিৰীক্ষাৰ বাবে পৰিকল্পনা কৰি আছে যি অসমীয়া কবিতালৈ এক ইতিবাচক সংকেত কঢ়িয়াই আনিছে বুলি ক'ব পৰা যায়৷