ডিজিটেল সংবাদ, গুৱাহাটীঃ মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত অসমক এখন সেউজ ৰাজ্যলৈ পৰিণত কৰা আৰু এক কোটি গছপুলি ৰোপণেৰে গীণিজ বুক অফ ৱৰ্ল্ড ৰেকৰ্ডছত স্থান লাভৰ লক্ষ্যৰে ৮ ছেপ্টেম্বৰৰ পৰা ৰাজ্যজুৰি চলি আছে অমৃত বৃক্ষ আন্দোলন। ১৭ ছেপ্টেম্বৰত সামৰণি পৰিবলগীয়া এই আন্দোলনৰ জৰিয়তে ৯ টা দিনত ৰোপণ, বিতৰণ আদিকে ধৰি মুঠ ৯ টা অভিলেখ গঢ়াৰ বাবে লক্ষ্য নিৰ্দ্ধাৰণ কৰা হৈছে। বৃহস্পতিবাৰ পৰ্যন্ত ৬ দিনত ইতিমধ্যে ৬ টা অভিলেখ স্থাপন কৰা হৈছে। 

ইফালে ৰাজ্যজুৰি চলি থকা এই অভিযানত গুৱাহাটীৰ নাগৰিকেও যাতে ১৭ ছেপ্টেম্বৰত গছপুলি ৰোপণ অভিযানত ভাগ লব পাৰে তাৰ বাবে বন বিভাগৰ গুৱাহাটী আঞ্চলিক বন বিষয়াৰ কাৰ্যালয়ে ব্যাপক তৎপৰতা আৰম্ভ কৰা পৰিলক্ষিত হৈছে। ইয়াৰ বাবে কামৰূপ মহানগৰ জিলা প্ৰশাসনৰ সহযোগত নাগৰিকৰ মাজত বিতৰণৰ বাবে জিলাখনৰ সকলো চক্ৰ বিষয়াৰ কাৰ্যালয়, খণ্ড উন্নয়ন বিষয়াৰ কাৰ্যালয় আৰু গাঁও পঞ্চায়তৰ কাৰ্যালয়, বিভিন্ন শিক্ষা প্ৰতিষ্ঠানসহ ৩২ টা বিতৰণ কেন্দ্ৰ স্থাপন কৰা হৈছে। 

বন বিভাগৰ সূত্ৰই সদৰি কৰা অনুসৰি গুৱাহাটী মহানগৰীত ১৭ ছেপ্টেম্বৰত  ১.১৭ লাখ টা গছপুলি ৰোপণৰ লক্ষ্য নিৰ্দ্ধাৰণ কৰা হৈছে। মুঠ ৩২ টা কেন্দ্ৰত গছপুলি যোগানৰ বাবে জালুকবাৰীস্থিত অসম বন বিদ্যালয়, খানামুখ খণ্ড বন বিষয়া আৰু চন্দ্ৰপুৰ খণ্ড বন বিষয়া কাৰ্যালয়ত গছপুলি মজুতকৰণৰ ব্যৱস্থা কৰা হৈছে। বুধবাৰ আৰু বৃহস্পতিবাৰে অৰ্থাৎ দুটা দিনত এই ৩২ টা কেন্দ্ৰলৈ ৩৯,৫০০ টাৰো অধিক গছপুলি যোগান ধৰা হয়। তাৰ ভিতৰত ২৫,১৪৮ টা অগৰু, ১২,৮১৪ টা মেহগণি আৰু ১,৮৫৮ টা বগীপমা গছপুলি যোগান ধৰা হয়। উল্লেখযোগ্য যে মুখ্যমন্ত্রী ড০ হিমন্ত বিশ্ব শর্মাই কিছুদিন পূর্বে এক কোটি বাণিজ্যিক গছপুলি ৰোপণ অভিযানত ভাগ লৈ এগৰাকী সেউজ সেনানী হ'বলৈ ৰাজ্যবাসীক আহ্বান জনাইছিল। সেই আহ্বানৰ প্ৰতি সহাৰি জনাই ৰাজ্যৰ বিভিন্ন প্ৰান্তৰ ৪৭.৩৯ লাখৰো অধিক লোকে নির্দিষ্ট পৰ্টেলত নাম পঞ্জীয়ন কৰিছিল।