অসমীয়া মানুহে চাকৰি পাইছে, বয়সক লৈ আপত্তি কিয়

‘আমাৰ অসম’ৰ গুৱাহাটীৰ প্ৰতিবেদক, ২৭ ছেপ্টেম্বৰঃ চতুৰ্থ বৰ্গৰ পদত জালুকবাৰী সমষ্টিৰ ৫৮ বছৰীয়া ব্যক্তিয়ে অন্যায়ভাৱে নিযুক্তি পোৱা বিষয়টোৰ উত্তৰ দিবলৈ গৈ মুখ্যমন্ত্ৰীয়ে অসত্য আৰু যুক্তিহীন কথাৰ অৱতৰণ কৰিছে৷ এজন মুখ্যমন্ত্ৰীয়ে এনে যুক্তিহীন, বেআইনী আৰু অসত্য কথাৰে নিযুক্তি প্ৰক্ৰিয়াত হোৱা চূড়ান্ত অনিয়মক ন্যাযতা প্ৰদান কৰিব বিচৰাটো অতি নিন্দনীয়৷ –এই মন্তব্য ভাৰতৰ  গণতান্ত্ৰিক যুৱ ফেডাৰেছন [ডি ৱাই এফ আই]ৰ৷ এটা বিবৃতিত ডি ৱাই এফ আইৰ সভাপতি ৰুস্তম আলী, সম্পাদক ৰিতু ৰঞ্জন দাসে কয়– মিথ্যাচাৰত লিপ্ত মুখ্যমন্ত্ৰী হিমন্ত বিশ্ব শৰ্মা৷ মুখ্যমন্ত্ৰীৰ আসনত বহি নিজৰ ক্ষুদ্ৰ স্বাৰ্থৰ বাবে আইন-কানুন উলংঘা কৰা কাৰ্যৰ পৰা আঁতৰি থাকক৷ মুখ্যমন্ত্ৰীৰ নিজ সমষ্টি জালুকবাৰী শুৱালকুছিত বয়স ফাকিৰে নিযুক্তি লোৱা অভিযোগৰ পাছত তেওঁ অসত্য আৰু যুক্তিহীন কথাৰে তাক ন্যাযতা প্ৰদান কৰিবলৈ বিচাৰিছে৷ জালুকবাৰীৰ বয়সে ভাটি দিয়া প্ৰাৰ্থীয়ে চাকৰি পোৱা প্ৰসংগত মুখ্যমন্ত্ৰীয়ে কৈছে যে – ‘অসমীয়া ল’ৰাই চাকৰি পোৱাত কিয় আপত্তি কৰিছে তেওঁ বুজি পোৱা নাই৷ প্ৰাৰ্থী সকলে স্কুলৰ পৰা প্ৰমাণ পত্ৰ আনিছে, গতিকে স্কুলৰ মুৰব্বীয়ে যি প্ৰমাণ পত্ৰ দিছে সেইখনকে শুদ্ধ বুলি ধৰি লৈছে আৰু চাকৰি পাইছে৷ ইয়াত একো দুৰ্নীতি হোৱা নাই৷’ প্ৰথম কথা হৈছে  ১২ লক্ষাধিক যুৱক-যুৱতীয়ে নিযুক্তি পৰীক্ষাত অৱতীৰ্ণ হৈছিল৷ এই সকলো প্ৰাৰ্থী অসমীয়াই আছিল৷ বাকী লাখ লাখ অসমীয়া প্ৰাৰ্থী চৰম অন্যায় কৰি অকল জালুকবাৰী অসমীয়া প্ৰাৰ্থীৰ প্ৰতি মুখ্যমন্ত্ৰীয়ে ইমান অনুকম্পা দেখুৱালে কিয়? দ্বিতীয় কথা হৈছে - প্ৰাৰ্থীৰ বয়সৰ বাবে জন্মৰ প্ৰমাণ পত্ৰ বাধ্যতামূলক৷ তেনেস্থলত স্কুলৰ পৰা দিয়া প্ৰমাণ পত্ৰকে একমাত্ৰ নিৰ্ভৰযোগ্য প্ৰমাণ পত্ৰ বুলি গণ্য কৰা হ’ল কিয়? যিসময়ত দিব্যাংগসকলৰ ক্ষেত্ৰত বাৰে বাৰে শাৰীৰিক পৰীক্ষা কৰি ৩১৬ জনৰ মাত্ৰ ৪ জনকহে যোগ্য ঘোষণা কৰা হৈছে৷ তৃতীয়তে কোনো বিদ্যালয়ৰ প্ৰধান শিক্ষকে নিজৰ অনুমানৰ ভিত্তিত প্ৰমাণ পত্ৰ দিব নোৱাৰে৷ পূৰ্বৰ নথিৰ ভিত্তিতহে তেওঁ প্ৰমাণ পত্ৰ দিব লাগিব৷ যদি সঁচাকৈয়ে স্কুলৰ প্ৰধান শিক্ষকে বয়স কমাই কোনো প্ৰাৰ্থীক প্ৰমাণ পত্ৰ দিছে তেন্তে এইক্ষেততো বৃহৎ দুৰ্নীতি হোৱাৰ প্ৰবল সম্ভাৱনা আছে৷  মুখ্যমন্ত্ৰীয়ে পাতল আৰু অসত্য কথাৰ পৰিৱেৰ্ত এই সমগ্ৰ ঘটনাৰ উচ্ছ পৰ্যায়ৰ তদন্ত দিয়ক৷ অন্যথা এটা কথা প্ৰমাণ হ’ব যে অসমৰ চাকৰি প্ৰাৰ্থীৰ যোগ্যতা হিচাপে শিক্ষাগত যোগ্যতাৰ উপৰি বিজেপি বা আৰ এছ এছৰ সদস্য হ’ব লাগিব আৰু জালুকবাৰী সমষ্টিৰ বাসিন্দা হ’লে বিশেষ অগ্ৰাধিকাৰ প্ৰদান কৰা হ’ব৷  এজনৰ পাছত এজনকৈ বিজেপি-আৰ এছ এছৰ নেতা চাকৰিৰ বিনিময়ত চাকৰি দিয়া গোচৰত গ্ৰেপ্তাৰ হৈছে অথচ এনে সময়তো মুখ্যমন্ত্ৰীয়ে দুৰ্নীতি অনিয়মকে ন্যাযতা প্ৰদান কৰিবলৈ অসত্য কথাৰ আশ্ৰয় লৈ ৰাজহুৱা ঘোষণা কৰিছে৷ মুখ্যমন্ত্ৰীৰ এনে নীতিহীন আৰু দুৰ্নীতিক পৰাশ্ৰয় দিয়া স্বজন-তোষণ নীতিৰ বিৰুদ্ধে প্ৰতিবাদ কৰিবলৈ অসমৰ যুৱ সমাজলৈ ডি ৱাই এফ আইয়ে আহ্বান জনাইছে৷