নিজকে প্ৰশংসা কৰি ট্ৰ’লৰ সন্মুখীন অভিনেত্ৰী কংগনা

মেৰিল ষ্টিপৰ সৈতে তুলনা কৰিলে বলীউড কুইনে

আমাৰ অসম, ১১ ফেব্ৰুৱাৰীঃ প্ৰতিদিনেই একাধিক বিস্ফোৰক মন্তব্য কৰি ছ’চিয়েল মিডিয়াত চৰ্চাত থাকে অভিনেত্ৰী কংগনা৷ মঙলবাৰে নিজকে ‘নাৰ্চিচাচ’ৰ দৰে প্ৰশাংসা কৰি ব্যাপক ট্ৰ’লৰ সন্মুখীন হয় বলীউডৰ ‘কুইন’ খ্যাত কংগনা ৰাণাৱট৷ অভিনেত্ৰীগৰাকীয়ে দেওবাৰে নিজৰ টুইটাৰত আগন্তুক দুখন ছবি ‘ধাকড়’ আৰু ‘থালাইভি’ৰ নতুন লুক শ্বেয়াৰ কৰি তেওঁ লিখিলে যে ‘দুনিয়াৰ সকলো অভিনেত্ৰীতকৈ তেওঁৰ খিতাপ বেছি৷’ তেওঁ আনকি নিজকে বিশ্বখ্যাত অভিনেত্ৰী মেৰিল ষ্টিপ, গাল গ্যাডোটেৰ সৈতেও তুলনা কৰিলে৷ তেওঁ চেলেঞ্চ কৰি লিখিলে যে এই দুনিয়াত তেওঁৰ সমান চৰিত্ৰ ৰূপায়ন কৰা শিল্পী নাই আৰু তেওঁৰ সমান গুণমান, শিল্পীমনৰ পৰিচয়ৰ শিল্পী নাই৷ মেৰিল ষ্টিপৰ দৰে কিংবদন্তি অভিনেত্ৰীৰ সৈতে কংগনাই নিজকে তুলনা কৰা দেখি একাংশৰ হজম নহ’ল৷ ব্যাপকভাৱে ছ’চিয়েল মিডিয়াত ট্ৰ’লৰ সন্মুখীন হ’ল কংগণা৷ বলীউডৰ ‘কণ্টোভাৰ্ছি কুইন’ আখ্যা দি কংগনাক মংগলগ্ৰহৰ অভিনেত্ৰী বুলি ট্ৰ’ল কৰিলে৷ কোনোৱে ক’লে– যি নিজকে প্ৰশংসা কৰে, সি নিজেই নিজৰ ঢোল বজায়৷