‘আমাৰ অসম’ৰ ষ্টাফ ৰিপ’ৰ্টাৰ, ১২ জানুৱাৰীঃ 'ভাৰত জোড়ো ন্যায় যাত্ৰা'ৰ কাৰ্যসূচী লৈ ৰাহুল গান্ধী সদলবলে অসমত উপস্থিত হোৱাৰ সময়তে কেন্দ্ৰীয় গৃহমন্ত্ৰী অমিত শ্বাহো বিস্তৃত কাৰ্যসূচীৰে অসমলৈ আহিব৷ এইপৰ্যন্ত চৰকাৰীভাৱে অমিত শ্বাহৰ কাৰ্যসূচী ঘোষণা কৰা হোৱা নাই যদিও ১৯ জানুৱাৰীৰ নিশা তেওঁ গুৱাহাটীত উপস্থিত হোৱাৰ কথা৷ ২০ জানুৱাৰীত অমিত শ্বাহৰ গুৱাহাটীত বহুকেইটা কাৰ্যসূচী আছে৷ ইয়াৰে ভিতৰত বিয়লি ৪ বজাত শংকৰদেৱ কলাক্ষেত্ৰত লাচিত বৰফুকনৰ ওপৰত অৰূপ কুমাৰ দত্তই ইংৰাজীত লিখা গ্ৰন্থৰ ২৪টা ভাৰতীয় ভাষালৈ অনুবাদ উন্মোচন কৰিব কেন্দ্ৰীয় গৃহমন্ত্ৰীজনে৷ ইয়াৰ পূৰ্বে তেওঁ কাছাৰীঘাটত ব্ৰহ্মপুত্ৰ নদীমুখ সৌন্দৰ্যবদ্ধৰ্ন প্ৰকল্প উদ্বোধন কৰাৰ উপৰি অসম আৰক্ষীৰ কামাণ্ডোৰ পাৰ্ছ আউট পেৰেডত অংশ লোৱাৰ কথা৷ ২০ জানুৱাৰীত অমিত শ্বাহে ঢেকীয়াজুলিত বড়ো জনগোষ্ঠীৰ ধৰ্মীয় কাৰ্যসূচীতো অংশ ল’ব৷ অসমত থকাৰ সময়ত কেন্দ্ৰীয় গৃহমন্ত্ৰীজনে নিৰ্বাচনী ৰণকৌশলক লৈ দলৰ ৰাজ্যিক নেতৃত্বৰ সৈতেও বৈঠকত মিলিত হ’ব৷ অমিত শ্বাহক লৈ ৰাজ্য প্ৰশাসন ব্যস্ত থকাৰ সময়তে অসমত প্ৰৱেশ কৰিব ৰাহুল গান্ধী৷ ১৮ জানুৱাৰীত ৰাহুল গান্ধী নাগালেণ্ডৰ পৰা শিৱসাগৰ জিলাৰ আমগুৰিয়েদি অসমত প্ৰৱেশ কৰাৰ পাছতে যোৰহাট হৈ মাজুলীলৈ যাব৷ মাজুলীৰ পৰা গৈ গোগামুখত তেওঁ সদলবলে নিশা কটাই ১৯ জানুৱাৰীত ইটানগৰলৈ যাব৷ ২০ জানুৱাৰীত 'ভাৰত জোড়ো যাত্ৰা' ইটানগৰৰ পৰা আহি গহপুৰত উপস্থিত হ’ব৷ ২১ জানুৱাৰীত কলিয়াবৰত ৰাহুল গান্ধীৰ বিশাল জনসভা অনুষ্ঠিত হ’ব৷ ২৩ জানুৱাৰীত ৰাহুল গান্ধীৰ গুৱাহাটীত একাধিক কাৰ্যসূচী আছে৷ ইয়াৰে ভিতৰত দলৰ নিৰ্বাচনী ইস্তাহাৰ সন্দৰ্ভত সমাজৰ বিভিন্ন ক্ষেত্ৰৰ বিশিষ্ট লোকৰে আলোচনা, জ্যেষ্ঠ সাংবাদিকৰে মত বিনিময়, যুৱক-যুৱতীৰে বাৰ্তালাপ আদি অন্যতম৷ ইফালে, ৰাহুল গান্ধীৰ এই যাত্ৰাক বিফল কৰিবলৈ উঠিপৰি লাগিছে বিজেপি দল আৰু চৰকাৰ৷ মুখ্যমন্ত্ৰী মহিলা উদ্যমিতা অভিযানৰ অধীনত ৪০ লাখ গ্ৰাম্য মহিলা উদ্যোগীলৈ ৩৫ হাজাৰ টকাকৈ দিয়াৰ যি আঁচনি মুখ্যমন্ত্ৰীয়ে ঘোষণা কৰে তাৰ প্ৰ-পত্ৰ ১৮ জানুৱাৰীৰ পৰা পঞ্চায়তে পঞ্চায়তে দিয়া হ’ব৷ হিতাধিকাৰীয়ে প্ৰ-পত্ৰ কেৱল নিৰ্ধাৰিত তাৰিখতহে সংগ্ৰহ কৰিব পাৰিব৷ ১৮ জানুৱাৰীত উজনি অসমৰ প্ৰতিটো পঞ্চায়তত এই প্ৰ-পত্ৰ দিয়া হ’ব৷ সেইদিনাখনে প্ৰ-পত্ৰ সংগ্ৰহ কৰিব লাগিব৷ পিছত আৰু এই প্ৰ-পত্ৰ সংগ্ৰহ কৰিব নোৱাৰিব৷ বিজেপি দল আৰু চৰকাৰে অতি কৌশলেৰে মহিলা সমাজক ৰাহুল গান্ধীৰ 'ভাৰত জোড়ো ন্যায় যাত্ৰা'ৰ পৰা দূৰত ৰখাৰ বাবে উজনি অসমৰ পৰা আৰম্ভ কৰিছে এই আঁচনিৰ কাম৷ ২৫ জানুৱাৰীলৈ অব্যাহত থাকিব প্ৰ-পত্ৰ বিতৰণৰ প্ৰক্ৰিয়া৷ প্ৰতিগৰাকী হিতাধিকাৰীয়ে নিজে পঞ্চায়ত কাৰ্যালয়লৈ গৈ সংগ্ৰহ কৰিব লাগিব এই প্ৰ-পত্ৰ৷ ১৮ জানুৱাৰীত ৰাহুল গান্ধীৰ শিৱসাগৰ, যোৰহাট, মাজুলী আৰু ধেমাজি জিলাত কাৰ্যসূচী চূড়ান্ত হৈছে৷ এতিয়া সময়েহে ক’ব বিজেপি দল আৰু চৰকাৰৰ এই ৰণকৌশল ৰাহুল গান্ধীৰ 'ভাৰত জোড়ো ন্যায় যাত্ৰাক কিমানদূৰ ক্ষতি কৰিব৷ ৰাহুল গান্ধী অহাৰ দিনা বিজেপি দল আৰু চৰকাৰে ৰাজ্যৰ মহিলা সমাজক ব্যস্ত ৰখাৰ ক্ষেত্ৰত গ্ৰহণ কৰা নতুন নতুন কৌশলৰ শেহতীয়া উদাহৰণ হ’ল প্ৰ-পত্ৰ বিতৰণৰ এই এদিনীয়া কাৰ্যসূচী৷ ইয়াৰ বাবে মুখ্যমন্ত্ৰী মহিলা উদ্যমিতা অভিযানক অস্ত্ৰ হিচাপে ব্যৱহাৰ কৰিছে মহিলা হিতাধিকাৰীৰ মাজত নগদ ধন বিতৰণৰ জৰিয়তে৷