অসমীয়া ভাষাত মেডিকেল শিক্ষা

... সম্পূৰ্ণ মাতৃভাষাত চিকিৎসা প্ৰদান কৰাটো সাম্প্ৰতিক সময়ত সম্ভৱপৰ নহ’ব৷ কিন্তু সংশ্লিষ্ট কতৃৰ্পক্ষ তথা চৰকাৰে যি প্ৰচেষ্টা হাতত লৈছে, সেই প্ৰচেষ্টাত মোৰ অভিমত এইটোৱে হ’ব যে ইংৰাজী মাধ্যমত পাঠদানৰ উপৰি আমাৰ মাতৃভাষাত চিকিৎসা বিজ্ঞানৰ শিক্ষাৰ্থীসকলক বুজাই দিয়াত কৃপণালি কৰিব নালাগে৷ উচ্ছতৰ মাধ্যমিকত পঢ়ি থকা শিক্ষাৰ্থীসকলক সুকীয়াভাৱে মাতৃভাষাতো পাঠদান কৰিব লাগিব, যাতে তেওঁলোকে  চিকিৎসা পাঠ্যক্ৰম বুজি পোৱাৰ

ক্ষেত্ৰত কোনো বাধা নহয় ...

অসম চৰকাৰে চৰকাৰী চিকিৎসা মহাবিদ্যালয় স্থাপন কৰাৰ ক্ষেত্ৰত যি আগভাগ লৈছে, সেয়া সঁচাকৈ প্ৰশংসনীয়৷ যোৱা কিছুবছৰ আগলৈকে অসমত মাত্ৰ তিনিখন চিকিৎসা মহাবিদ্যালয় আছিল৷ এতিয়া চিকিৎসাৰ ক্ষেত্ৰত বিশ্ববিদ্যালয় হ’ল আৰু বহুকেইখন নতুনকৈ চিকিৎসা মহাবিদ্যালয় স্থাপন কৰা হ’ল৷ এইটো আমাৰ বাবে বৰ সুখৰ বিষয়৷ অকল চিকিৎসালয় থাকিলে নহ’ব বা অকল চিকিৎসালয়ৰ আন্তঃগাঁথনি থাকিলে নহ’ব, এখন চিকিৎসালয় যেতিয়া আমি সৰ্বসাধাৰণ ৰাইজলৈ চিকিৎসাৰ বাবে আগবঢ়াই দিওঁ, তেতিয়া চিকিৎসালয়খন পূৰ্ণাংগ হয়, যদিহে আমি মানৱ সম্পদ  বিশেষকৈ চিকিৎসক, নাৰ্ছ, পেৰা-মেডিকেল ষ্টাফ আটাইখিনিয়েই চিকিৎসালয়খনত উপলব্ধ হয়৷ বিশ্বমানৰ চিকিৎসালয় নিৰ্মাণৰ কাম ইতিমধ্যে আৰম্ভ হৈছে৷ এইক্ষেত্ৰত মানৱ সম্পদৰ সংখ্যা বঢ়াব লাগিব৷ হাস্পতাল, হাস্পতালৰ আন্তঃগাঁথনি বঢ়োৱাৰ বাবে মানৱ সম্পদৰ সংখ্যা বঢ়াব লাগিব, যাতে আমি ৰাইজৰ মাজত আগবঢ়াব পাৰোঁ প্ৰকৃত মানৱ সম্পদ৷ তেতিয়াহে তেনে চিকিৎসালয় গঢ়িলে ৰাইজৰ সহায় হ’ব৷ এই মানৱ সম্পদ গঢ়াৰ ক্ষেত্ৰত আমাৰ থলুৱা ছাত্ৰ-ছাত্ৰীকো যদি গঢ় দিব পাৰোঁ আৰু তেওঁলোকৰ দ্বাৰাই আমাৰ নিজৰ ৰাজ্যৰ মানুহক চিকিৎসা কৰোৱাৰ ক্ষেত্ৰত আগুৱাই দিব পাৰোঁ, নিশ্চয় ই এটা সুন্দৰ পদক্ষেপ হ’ব৷ আমি দেখিবলৈ পাইছোঁ বহু মেধাৱী ছাত্ৰ-ছাত্ৰীয়ে সম্পূৰ্ণ প্ৰশিক্ষণ তথা উপযুক্ত পৰামৰ্শ নোপোৱাৰ বাবে চিকিৎসা বিজ্ঞানৰ ছাত্ৰ হোৱাৰ পৰা বঞ্চিত হয়৷ এইক্ষেত্ৰত আমি দেখিবলৈ পাইছোঁ যে বহু মেধাৱী ছাত্ৰ-ছাত্ৰীয়ে বিভিন্ন অঞ্চল, বিভিন্ন সংস্কৃতি আদিৰ পৰা আহে আৰু প্ৰায় ৬০-৭০ শতাংশ ল’ৰা-ছোৱালী গ্ৰামাঞ্চলৰ পৰা আহে, অধিকাংশ অসমীয়া মাধ্যমৰ৷ তেওঁলোক যিহেতু অসমীয়া মাধ্যমৰ পৰা চিকিৎসা বিজ্ঞানৰ শিক্ষাগ্ৰহণৰ বাবে আহে, গতিকে  ইংৰাজী মাধ্যমত এই পাঠ্যক্ৰম গ্ৰহণ কৰিলে বহু কথা ভালদৰে আয়ত্ত কৰিব নোৱাৰে৷ এশ শতাংশ অসমীয়া মাধ্যমত পঢ়ি অহা ছাত্ৰ-ছাত্ৰীয়ে এইধৰণৰ সমস্যাত ভোগে৷ অসমীয়া মাধ্যমত পঢ়া ল’ৰা-ছোৱালীয়ে মেডিকেল পাঠ্যক্ৰম পঢ়িবলৈ লওঁতে বহুসময়ত বহু সমস্যাৰ সন্মুখীন হ’বলগীয়া হয়৷  অসমীয়া মাধ্যমক গুৰুত্ব দি চিকিৎসাত পাঠদান দিলে ই নিশ্চয় প্ৰশংসনীয় পদক্ষেপ হ’ব৷ কিন্তু ব্যৱহাৰিক দিশত আমি হয়তো বহুতো সমস্যাৰ সন্মুখীন হ’ব লগা হ’ব পাৰে৷ গুৱাহাটী চিকিৎসা মহাবিদ্যালয় হাস্পতালৰ মই এজন প্ৰাক্তন অধ্যাপক হিচাপে এষাৰ কথা ন-দি ক’ব পাৰোঁ যে ছাত্ৰ-ছাত্ৰীক চিকিৎসা বিজ্ঞানৰ পাঠদান কৰাৰ ক্ষেত্ৰত যদিও সম্পূৰ্ণ ইংৰাজী মাধ্যমত পাঠদান কৰিব লাগে, অসমৰ বিভিন্ন গ্ৰামীণ অঞ্চলৰ পৰা যোৱা ল’ৰা-ছোৱালীক আমি ইংৰাজী মাধ্যমত পাঠদানৰ উপৰি অসমীয়া ভাষাতো পুংখানুপুংখভাৱে শিক্ষা উপলব্ধ কৰাত সহায় কৰোঁ, তেন্তে নিশ্চয় তেওঁলোক উপকৃত হ’ব৷ ইংৰাজী মাধ্যমত শিক্ষাদান কৰিব লাগিব এই কাৰণে যে আমাৰ চিকিৎসা বিজ্ঞানৰ যিমানবোৰ গ্ৰন্থ আছে সকলোবোৰ ইংৰাজী মাধ্যমৰ৷ গতিকে আমি ইংৰাজী মাধ্যমত পাঠদান কৰিব লাগিব, শিকিব লাগিব আৰু ইংৰাজী মাধ্যমত শিকাবও লাগিব৷ যিখিনি ছাত্ৰ-ছাত্ৰীয়ে ইংৰাজী ভাষা বুজি নাপায়, তেতিয়া কঠিন পাঠ্যক্ৰম বুজাৰ ক্ষেত্ৰত মাতৃভাষা সহায়ক হ’ব৷ সেইটোৱে যদি আমাৰ পদক্ষেপ হয়, তেতিয়াহ’লে এইটো প্ৰশংসনীয় পদক্ষেপ৷ সকলো চিকিৎসা সম্পৰ্কীয় গ্ৰন্থ অসমীয়াত অনুবাদ কৰাটো সম্ভৱ নহয়৷ যিহেতু ইংৰাজী মাধ্যমটো আমি আন্তঃৰাষ্ট্ৰীয় মাধ্যম হিচাপেও গ্ৰহণ কৰিছোঁ, ইংৰাজী মাধ্যমৰ শিক্ষাদানক আমি উলাই কৰিব নোৱাৰোঁ৷ ইংৰাজী মাধ্যমক আমি জানিব লাগিব, শিকিব লাগিব আৰু বুজিব লাগিব৷ উদাহৰণস্বৰূপে জাৰ্মান, জাপান, চীন আদি দেশত তেওঁলোকৰ নিজা ভাষাত চিকিৎসা বিজ্ঞানৰ গ্ৰন্থ উপলব্ধ৷ তেওঁলোকৰ ভাষাত পাঠদানৰ ক্ষেত্ৰত সেই দেশসমূহৰ ছাত্ৰ-ছাত্ৰীৰ বাবে একো অসুবিধা নহয়৷ যেতিয়ালৈকে আমাৰ মাতৃভাষাত চিকিৎসা বিজ্ঞানৰ গ্ৰন্থ উপলব্ধ নহ’ব, তেতিয়ালৈকে মাতৃভাষাত পাঠদান কৰাটো সহজলভ্য নহ’ব৷  গতিকে সম্পূৰ্ণ মাতৃভাষাত চিকিৎসা প্ৰদান কৰাটো সাম্প্ৰতিক সময়ত সম্ভৱপৰ নহ’ব৷ কিন্তু সংশ্লিষ্ট কতৃৰ্পক্ষ তথা চৰকাৰে যি প্ৰচেষ্টা হাতত লৈছে, সেই প্ৰচেষ্টাত মোৰ অভিমত এইটোৱে হ’ব যে ইংৰাজী মাধ্যমত পাঠদানৰ উপৰি আমাৰ মাতৃভাষাত চিকিৎসা বিজ্ঞানৰ শিক্ষাৰ্থীসকলক বুজাই দিয়াত কৃপণালি কৰিব নালাগে৷ উচ্ছতৰ মাধ্যমিকত পঢ়ি থকা শিক্ষাৰ্থীসকলক সুকীয়াভাৱে মাতৃভাষাতো পাঠদান কৰিব লাগিব, যাতে তেওঁলোকে  চিকিৎসা পাঠ্যক্ৰম বুজি পোৱাৰ ক্ষেত্ৰত কোনো বাধা নহয়৷ এই প্ৰচেষ্টা আমি আমাৰ চিকিৎসা মহাবিদ্যালয়ত কৰ্মৰত অৱস্থাতো অনানুষ্ঠানিকভাৱে কৰি আহিছিলোঁ, এইক্ষেত্ৰত কোনোধৰণৰ কৃপণালি কৰা নাছিলোঁ৷ মোৰ অভিজ্ঞতাৰ পৰা এই কথা ক’ব পাৰোঁ যে ল’ৰা-ছোৱালীক পঢ়োৱাৰ বাবে ভাষা এটা প্ৰাচীৰ হৈ থাকিব নোৱাৰে, ভাষা এটা অস্পৃশ্য হৈ থাকিব নোৱাৰে৷ ভাষাই আমাৰ জ্ঞানৰ ভেটি গঢ়াৰ ক্ষেত্ৰত উপযুক্ত প্ৰয়োগ; উপযুক্ত ব্যৱহাৰ সময়মতে কৰিলে নি(য় আমাৰ উঠি অহা প্ৰজন্মক জ্ঞানৰ সমল যোগোৱাৰ ক্ষেত্ৰত এক নতুন আশাৰ সঞ্চাৰ কঢ়িয়াই আনিব৷ কৰ্মৰত অৱস্থাত মই দেখিবলৈ পাইছোঁ– গ্ৰামাঞ্চলৰ পৰা বহু ল’ৰা-ছোৱালীয়ে তেওঁলোকৰ ইংৰাজী মাধ্যমৰ প্ৰতি থকা দুৰ্বলতা প্ৰত্যক্ষভাৱে দেখুৱাই দিব নোৱৰাৰ ফলত হীনমন্যতাত ভুগিবলগীয়া হয়৷ তেওঁলোকক আগবঢ়াই আনিব লাগিব, তেওঁলোকক আমাৰ এক গুৰুত্বপূৰ্ণ মানৱ সম্পদৰ অংগ হিচাপে ল’ব লাগিব৷ সামাজিক দায়বদ্ধতাৰ ক্ষেত্ৰত তেওঁলোককো অংশীদাৰ কৰিব লাগিব৷ এইটো কৰিলে চিকিৎসা বিজ্ঞানৰ প্ৰতি ধাউতি বাঢ়িব৷ তেওঁলোকে গাঁৱে-ভূঞে গৈ চিকিৎসা প্ৰদানত সহায় কৰাত অৰিহণা যোগাব পাৰিব৷ গতিকে মই একেষাৰে ক’ব বিচাৰিছোঁ যে প্ৰশংসনীয় প্ৰচেষ্টা ব্যৱহাৰিক দিশত কেনেকৈ আগবঢ়াই নিব পাৰোঁ, প্ৰয়োগ কৰিব পাৰোঁ, ব্যৱহাৰিক ক্ষেত্ৰত অসমীয়া ভাষা প্ৰয়োগত আলোচনা হ’ব লাগে৷  চৰকাৰৰ এই পদক্ষেপ সুস্থ পৰিৱেশ¸ গঢ়ি লৈ মানৱ সম্পদক এক আশা হিচাপে আগবঢ়াই নিয়াৰ ক্ষেত্ৰত প্ৰচেষ্টা অব্যাহত ৰাখিব লাগিব৷ এইক্ষেত্ৰত আলোচনাৰ প্ৰয়োজন আছে৷ এই আলোচনাৰ দ্বাৰাই এক ফলপ্ৰসূ নিৰপেক্ষ সমাধান উলিয়াব পৰা যায়৷ যাৰ দ্বাৰা ব্যৱহাৰিক ফলাফল উলিয়াব পৰা যাব৷ যাতে সমাজৰ প্ৰতিজন মেধাৱী ছাত্ৰ-ছাত্ৰীয়ে চিকিৎসা বিজ্ঞান গ্ৰহণৰ ক্ষেত্ৰত কোনো দ্বিধাবোধ কৰিবলগীয়া নহয়৷ সম্পূৰ্ণ চিকিৎসা বিজ্ঞানৰ জ্ঞানৰ দ্বাৰা নিজকে প্ৰস্তুত কৰি তোলাৰ উপৰি সামাজিক দায়বদ্ধতা, সামাজিকভাৱে সমাজৰ সেৱা কৰাৰ ক্ষেত্ৰত আগভাগ ল’ব পাৰে৷ এইটো কৰিলে নিজৰ লগতে সমাজৰো উন্নতি হ’ব, দেশো প্ৰগতিৰ পথত আগবাঢ়িব পাৰে৷ গতিকে আমি মানৱ সম্পদৰ উন্নয়নত গুৰুত্ব দিব লাগে, তেওঁলোকক অনুপ্ৰেৰিত কৰিব লাগে৷

ফোনঃ ৯৪৩৫০-১৪৭০১