'আমাৰ অসম'ৰ খুমটাইৰ প্ৰতিবেদক, ২৩ জানুৱাৰীঃ গোলাঘাট জিলাৰ খুমটাইত বুধবাৰে এক বিশেষ অনুষ্ঠানত অংশ লৈ যোৰহাট সমষ্টিৰ সাংসদ গৌৰৱ গগৈয়ে ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মা আৰু বিজেপিক তীব্ৰ ভাষাৰে সমালোচনা কৰে ৷ সংবাদ মাধ্যমৰ সৈতে হোৱা সাক্ষাৎকাৰত সাংসদ গগৈয়ে সাম্প্ৰতিক ৰাজনৈতিক প্ৰেক্ষাপট সন্দৰ্ভত কেইবাটাও গুৰুত্বপূৰ্ণ মন্তব্য প্ৰদান কৰে৷ প্ৰথমে আগন্তুক পঞ্চায়ত নিৰ্বাচন সম্পৰ্কে সাংবাদিকে সোধা প্ৰশ্নৰ উত্তৰত তেওঁ কয় যে পঞ্চায়ত নিৰ্বাচন অনুষ্ঠিত হ’ব নে নাই তাক লৈ সন্দেহ আছে ৷ বিজেপিয়ে পঞ্চায়ত নিৰ্বাচন পিছুৱাই থকাৰ মূল কাৰণ হ’ল তেওঁলোকে সন্মুখত বিপদ দেখিছে আৰু তেওঁলোকৰ হৈ নিৰ্বাচনত প্ৰতিদ্বন্দ্বিতা আগবঢ়াবলৈ প্ৰাৰ্থী হ’বলৈ কোনেও বিচৰা নাই ৷ বিজেপি দলৰ হৈ গাঁৱৰ ভিতৰত প্ৰচাৰ কৰিবলৈ কোনেও সাহস কৰা নাই। জনসাধাৰণৰ বিভিন্ন প্ৰশ্নৰ উত্তৰ বিজেপিৰ ওচৰত নথকা বাবেই পঞ্চায়ত নিৰ্বাচন পিছুৱাই আছে ৷ গ্ৰামাঞ্চলত ভোট বিচাৰি গ’লেই মহিলা সকলে গছপুলি ৰোৱাৰ দহ হাজাৰ টকাৰ কথা ক’ব, সেয়ে সেইবোৰ প্ৰশ্ন উত্তৰ বিজেপিৰ হাতত নাই ৷ 

আনহাতে মণিপুৰত নীতিশ কুমাৰৰ JD(U) দলে বিজেপিৰ সংগ ত্যাগ কৰা সন্দৰ্ভত প্ৰতিক্ৰিয়া প্ৰকাশ কৰিলে সাংসদ গৌৰৱ গগৈয়ে ৷ নৰেন্দ্ৰ মোদী আৰু অমৃত শ্বাহৰ ব্যৰ্থ ভূমিকাৰ বাবেই মণিপুৰত শান্তি ঘূৰি অহা নাই বুলি মন্তব্য গৌৰৱৰ ৷ বিহাৰৰ নিৰ্বাচন আহি আছে আৰু দিল্লীত চলি আছে, দেশৰ ৰাজনীতিত মণিপুৰে ইয়াৰ আগতেই প্ৰভাৱ পেলালে বুলি মন্তব্য গৌৰৱৰ ৷ মণিপুৰৰ দৰেই নীতিশ কুমাৰে বিহাৰত বিজেপিৰ সৈতে মিত্ৰতা ভংগ কৰে নাই সেয়া চাই আছোঁ বুলি মন্তব্য কৰে ৷ লগতে তেওঁ কয় যে আম্বানি-আদানিক সহায় কৰিবলৈহে বিজেপিৰ ৰাজনীতি৷ গাঁও-পথাৰত কি চলি আছে, তাৰ পৰা আঁতৰত থাকে বিজেপি দল। বিজেপিৰ মন্ত্ৰী-বিধায়ক সন্তানৰ লগতহে ব্যস্ত ৷ বিধায়ক পুত্ৰৰ নাম HIT AND RUNত ওলোৱা পিছত তদন্ত নহওঁতেই সাংবাদিকক গ্ৰেপ্তাৰ কৰা সন্দৰ্ভত ক্ষোভ গৌৰৱ গগৈৰ৷ গুৱাহাটীত বিজেপিৰ বাঘা বাঘা নেতাৰ পুত্ৰই নিশা গাড়ী চলাই বহুতো দুৰ্ঘটনা সংঘটিত কৰিছে কিন্তু তেওঁলোকৰ বাবে কোনো ট্ৰেফিক আইন নাই, কেৱল জনসাধাৰণেহে এইসমূহত ভুগি আছে ৷ এনেদৰেই খুমটাইত সাংসদ গৌৰৱ গগৈয়ে চৰকাৰক তীব্ৰ ভাষাৰে সমালোচনা কৰিলে।