সামগ্ৰী দানৰ শীৰ্ষত অসম

‘বিদ্যাঞ্জলি’লৈ সঁহাৰি

আমাৰ অসম, ২৬ ছেপ্টেম্বৰঃ শিক্ষানুষ্ঠানৰ উন্নয়নৰ বাবে প্ৰাক্তন শিক্ষাৰ্থী তথা বিভিন্ন ব্যক্তিৰ পৰা অনুদান সংগ্ৰহ কৰাৰ লক্ষ্যৰে প্ৰধানমন্ত্ৰী নৰেন্দ্ৰ মোদীয়ে আৰম্ভ কৰা ‘বিদ্যাঞ্জলি-২.০’ আঁচনিলৈ অসমৰ বিভিন্নজনে সহায়ৰ হাত আগবঢ়োৱা দেখা গৈছে৷ বিদ্যাঞ্জলি আঁচনিৰ জৰিয়তে প্ৰাক্তন ছাত্ৰ-ছাত্ৰীৰ পৰা অনুদান লোৱাৰ বাবে ৰাজ্যৰ শিক্ষানুষ্ঠানসমূহৰ মুৰব্বীলৈ শিক্ষা বিভাগে পত্ৰ প্ৰেৰণ কৰাক লৈ ব্যাপক প্ৰতিক্ৰিয়াৰ সৃষ্টি হৈছিল৷ ৰাজকোষত ধনৰ নাটনিৰ বাবেই চৰকাৰে এনেদৰে ৰাইজৰ পৰা দান বিচাৰি শিক্ষানুষ্ঠানৰ অভাৱ-সমস্যাৰ জোৰা-টাপলি মৰাৰ চেষ্টা চলাইছে বুলিও বিভিন্নজনে সমালোচনা কৰা দেখা গৈছিল৷ অৱশ্যে এনে সমালোচনাৰ পাছতো বিদ্যাঞ্জলি আঁচনিৰ জৰিয়তে শিক্ষানুষ্ঠানলৈ দান আগবঢ়োৱাৰ ক্ষেত্ৰত দেশৰ ভিতৰতে শীৰ্ষত আছে অসম৷ অসম চৰকাৰৰ শিক্ষা বিভাগে প্ৰকাশ কৰা তথ্য অনুসৰি বিদ্যাঞ্জলি প’ৰ্টেলত  দান দিয়াৰ বাবে আগ্ৰহ প্ৰকাশ কৰি বৰ্তমানলৈ অসমৰ ২৯,৬০২জন স্বেচ্ছাসেৱকে পঞ্জীয়ন কৰিছে৷ এইসকল স্বেচ্ছাসেৱকৰ পৰা বিভিন্ন চৰকাৰী তথা প্ৰাদেশীকৃত বিদ্যালয়ে ২৭,০২২খন চিলিংফেন দান লাভ কৰিছে৷ ইয়াৰোপৰি অন্যান্য ৯,২৩৯ বিধ সম্পত্তি তথা সামগ্ৰীও দান কৰিছে স্বেচ্ছাসেৱক সকলে৷ উল্লেখ্য, প্ৰধানমন্ত্ৰীয়ে বিদ্যাঞ্জলি আঁচনি আৰম্ভ কৰিলেও অসমত পূৰ্বৰে পৰা বিভিন্নজনে নিজেই পঢ়ি যোৱা শিক্ষানুষ্ঠান তথা স্থানীয় শিক্ষানুষ্ঠানক বিভিন্ন সামগ্ৰী অনুদান আগবঢ়াই আহিছে৷ অৱশ্যে বিদ্যাঞ্জলি আঁচনিৰ প্ৰতি ৰাইজৰ সঁহাৰি দেখি এইবাৰ সমাজ কল্যাণ বিভাগে বিভিন্ন ঠিকাদাৰৰূপী এন জি অ’ক অংগনৱাড়ী কেন্দ্ৰৰ আন্তঃগাঁথনি উন্নয়নৰ বাবে অনুদান বিচৰা দেখা গৈছে৷ ঠিকাদাৰৰ পৰা সমাজ কল্যাণ বিভাগে অনুদান বিচৰাত একাংশ ঠিকাদাৰে ক্ষোভ ব্যক্ত কৰিছে৷