লুইতৰ পাৰত বায়ুসেনাৰ এয়াৰ শ্ব’

আমাৰ অসম, ২৮ ছেপ্টেম্বৰঃ গুৱাহাটীৰ লাচিত ঘাট৷ আকাশমাৰ্গত বৰ্ণময় পৰিৱেশ, তলত উৎকণ্ঠিত বহুজন৷ ভাৰতীয় বায়ুসেনাই বিশেষভাৱে আয়োজন কৰা এটা বিশেষ এয়াৰ শ্ব’ক কেন্দ্ৰ কৰি মঙলবাৰে গুৱাহাটীৰ লাচিত ঘাটত উৎসৱমুখৰ পৰিৱেশৰ সৃষ্টি হয়৷ লাচিত ঘাটৰ আকাশমাৰ্গত ভাৰতীয় বায়ুসেনাৰ সূৰ্য কিৰণ এৰ’বেটিক টীমে প্ৰদৰ্শন কৰে বিশেষ কলা-কৌশল৷ প্ৰায় ৩০ মিনিটত ধৰি চলা এই বিশেষ অনুষ্ঠানত বায়ুসেনাৰ ৯খন হ’ক এম কে-১৩২ বিমানে দুঃসাহসিক কাৰ্যকলাপ প্ৰদৰ্শন কৰি সকলোকে মন্ত্ৰমুগ্ধ কৰে৷ এই বিশেষ অনুষ্ঠানত অন্যান্যসকলৰ লগতে উপস্থিত থাকে মুখ্যমন্ত্ৰী হিমন্তবিশ্ব শৰ্মাও৷ অনুষ্ঠানত সংবাদ মাধ্যমক সম্বোধন কৰি মুখ্যমন্ত্ৰীয়ে কয় এনেধৰণৰ কাৰ্যক্ৰমসমূহে অসমৰ উঠি অহা প্ৰজন্মক ভাৰতীয় বায়ু সেনা তথা আন প্ৰতিৰক্ষা বাহিনীসমূহত যোগদান কৰিবলৈ অনুপ্ৰেৰণা যোগাব৷ তেওঁ লগতে ভাৰতীয় বায়ু সেনা বাহিনীক গুৱাহাটীত সূৰ্য কিৰণৰ এই দুসাহসিক প্ৰদৰ্শনী অনুষ্ঠিত কৰাৰ বাবে কৃতজ্ঞতা জ্ঞাপন কৰে৷ ১৯৯৬ চনত প্ৰতিষ্ঠা হোৱা সূৰ্য কিৰণ এৰ’বেটিক টীম হ’ল ভাৰতীয় বায়ু সেনাৰ ৫২ সংখ্যক স্কোৱাড্ৰণৰ এক অংশ৷ উল্লেখ্য ৯খন বা ততোধিক বিমানৰ দ্বাৰা এনে দুঃসাহসিক কাৰ্যকলাপ প্ৰদৰ্শন কৰিবলৈ সক্ষম হোৱা বিশ্বৰ মাত্ৰ কেইটামান দলৰ ভিতৰত সূৰ্য কিৰণ এৰ’বেটিক টীম হৈছে অন্যতম৷ এই অনুষ্ঠানত অসমৰ ৰাজ্যপাল জগদীশ মুখিৰ সহধৰ্মিনী প্ৰেম মুখি, এয়াৰ মাৰ্শ্বাল [ইষ্টাণ ৰ্এয়াৰ কামাণ্ড] বি কে পাটনায়ক, মুখ্য সচিব পৱন কুমাৰ বৰঠাকুৰ আৰু অসামৰিক তথা প্ৰতিৰক্ষা বিভাগৰ বিষয়াবৃন্দ প্ৰমুখ্যে কেইবা শতাধিক লোক উপস্থিত থাকে৷