এআইইউডিএফৰ সভাপতি মৌলানা বদৰুদ্দিন আজমলক পৰৱৰ্তী নিৰ্বাচনত জয়ী হ’বলৈ বাংলাদেশলৈ প্ৰেৰণ কৰাৰ বাবে আন্তঃৰাষ্ট্ৰীয় হিন্দু পৰিষদ আৰু ৰাষ্ট্ৰীয় বজৰংগ দলৰ প্ৰতিষ্ঠাপক প্ৰবীণ ভাই টোগাড়িয়াই মতপোষণ কৰিছে৷ বৰাক উপত্যকালৈ তিনিদিনীয়া ভ্ৰমণসূচীৰে শনিবাৰে শিলচৰত উপস্থিত হৈ এখন সংবাদ মেলত তেওঁ কয় যে, বদৰুদ্দিন আজমলে হিন্দু জাতিক অপমান কৰিছে৷  বদৰুদ্দিন আজমলক গাধৰ পিঠিত উটুৱাই বাংলাদেশলৈ পঠিয়াব লাগে৷  লগতে তেওঁৰ ঘৰত বুলডজাৰ চলাব লাগে৷  টোগাড়িয়াই কয়, লাভ জেহাদৰ বিৰুদ্ধে সংগঠনে সমগ্ৰ দেশতে কাম কৰি আছে৷ হিন্দু যুৱতী যাতে লাভ জেহাদৰ বলি নহয় তাৰ প্ৰতি বিশেষ মনোযোগ দিয়া হৈছে৷  ১৯৫১ চনৰ পাছত বাংলাদেশ আৰু পাকিস্তানৰ পৰা অহা মুছলমানক বিচাৰি উলিয়াই বাংলাদেশলৈ ঘূৰাই পঠিয়াই ৪৯ লাখ মুছলমান বাংলাদেশীৰ হাতৰ পৰা অসমক ৰক্ষা কৰাটো কেন্দ্ৰীয় আৰু ৰাজ্য চৰকাৰৰ কৰ্তব্য বুলি উল্লেখ কৰে তেওঁ৷ টোগাড়িয়াই কয়, ভাৰত এখন হিন্দু দেশ, আৰু ইয়াত হিন্দুৰ প্ৰাধান্য থাকিব৷ বীৰ লাচিত বৰফুকনৰ দৰে শত্ৰুৰ বুকুত ভৰি দিয়া বিজয়ীসকলৰ দৰে অসমকে ধৰি সমগ্ৰ দেশতে হিন্দুসকলে বাস কৰিব৷  মৌলানা বদৰুদ্দিন আজমলৰ কথা পুনৰ উল্লেখ কৰি তেওঁ কয় যে, এবাৰ মোগলে মা কামাখ্যাৰ অসমক অপমান কৰিবলৈ চেষ্টা কৰিছিল৷ সেই সময়ত সাহসী বীৰ লাচিত বৰফুকনে তেওঁলোকৰ বিৰুদ্ধে থিয় দি মোগলক অসম ৰাজ্যৰ পৰা পৰাজিত কৰি পঠাইছিল৷  এতিয়া আকৌ বদৰুদ্দিন আজমলে হিন্দুক অপমান কৰিছে, এই বদৰুদ্দিন আজমলক গাধৰ পিঠিত উটুৱাই বাংলাদেশলৈ পঠিয়াব লাগে৷ লগতে তেওঁৰ ঘৰত বুলডজাৰ চলাই বীৰ লাচিত বৰফুকনক-২১ পুনৰাবৃত্তি কৰিবলৈ উল্লেখ কৰে তেওঁ৷  অসমীয়া আৰু হিন্দু বাঙালী ভাৰতীয় নাগৰিক৷ অসমকে ধৰি সমগ্ৰ দেশতে বাস কৰা এজন হিন্দুও বিদেশী নহয়৷ ইয়াৰ বাবে হিন্দুক ডি ভোটাৰ কৰি আইনৰ বিৰুদ্ধে কাম নকৰিবলৈ চৰকাৰক আবেদন জনায় তেওঁ৷  লগতে ১৯৫১ চনৰ পাছত ভাৰতত প্ৰৱেশ কৰা মুছলমান বাংলাদেশীসকলক বিচাৰি উলিয়াই ডিটেনচন কেম্পত ৰাখি বাংলাদেশলৈ ঘূৰাই পঠিয়াবলৈও চৰকাৰক আহ্বান জনায়৷  সংবাদ মেল সম্বোধন কৰি টোগাড়িয়াই হিন্দুসকলৰ সুৰক্ষা, স্বাস্থ্য আৰু অধিকাৰসম্পৰ্কীয় বিষয়সমূহৰ ওপৰত আলোচনা কৰে৷