ডিজিটেল ডেস্কঃ নদীৰ পানী ভাগ-বতৰা কৰাক লৈ প্ৰতিবাদৰ সৃষ্টি হৈছে৷ এই প্ৰতিবাদ সৃষ্টি হৈছে কৰ্ণাটকত ৷ তামিলনাডুলৈ কাবেৰী পানী এৰি দিয়াক লৈ কৰ্ণাটকত তীব্ৰ প্ৰতিবাদ সাব্যস্ত কৰিছে কানাড়া আৰু কৃষক সংগঠনৰ প্ৰমুখ 'কানাড়া ওক্কুটা' সংঘই৷ পুৱা ৬ বজাৰ পৰা সন্ধিয়া ৬ বজালৈ ১২ ঘণ্টীয়া কৰ্ণাটক বন্ধৰ আহ্বান জনাইছিল সংগঠনটোৱে৷ এই বন্ধৰ সৰ্বাধিক প্ৰভাৱ পৰা দেখিবলৈ পোৱা গৈছে বেংগালুৰত৷  প্ৰতিবাদৰ বাবে বেংগালুৰুৰ সকলো শৈক্ষিক প্ৰতিষ্ঠান বন্ধ ৰখা হৈছে।

কৰ্ণাটক বন্ধৰ আহ্বানে ব্যাহত কৰিছে সাধাৰণ জনজীৱন৷ প্ৰতিবাদৰ বাবে বেংগালুৰু আন্তঃৰাষ্ট্ৰীয় বিমানবন্দৰৰ পৰা প্ৰস্থান কৰিবলগা ৪৪ খনকৈ বিমান বাতিল কৰা হৈছে। প্ৰতিবাদৰ মাজতে পাঁচজন কানাড়া পন্থী সমৰ্থকে বেংগালুৰু বিমানবন্দৰত প্ৰৱেশ কৰি বিশৃংখল পৰিস্থিতিৰ সৃষ্টি কৰে৷ পাছত পাঁচোজন প্ৰতিবাদকাৰীক আটক কৰা হয়৷  জানিব পৰা মতে আটক কৰা লোককেইজনৰ পৰা বিমানবন্দৰত প্ৰৱেশৰ টিকট পোৱা গৈছে।  প্ৰতিবাদকাৰীসকলে টিকট কাটি বিমানবন্দৰত প্ৰৱেশ কৰিবলৈ চেষ্টা কৰিছিল আৰু তাৰ পিছত বিশৃংখল পৰিস্থিতিৰ সৃষ্টিৰ অপচেষ্টা চলাইছিল৷ কিন্তু তাৰ পূৰ্বেই তেওঁলোকক আটক কৰা হয়৷

কৰ্ণাটকত বন্ধৰ সৰ্বাধিক প্ৰভাৱ পৰিছে বেংগালুৰু আৰু ৰাজ্যখনৰ দক্ষিণ অংশত৷ ৰাজ্যখনৰ কেইবাটাও স্থানত ১৪৪ ধাৰা জাৰি কৰা হৈছে৷ যিকোনো অপ্ৰীতিকৰ ঘটনা প্ৰতিহত কৰিবলৈ বেংগালুৰু চহৰ, ৰামনগৰ আৰু হাছান জিলাকে ধৰি কেইবাখনো জিলাত ১৪৪ ধাৰা জাৰি কৰা হৈছে। এই চহৰসমূহত শৈক্ষিক প্ৰতিষ্ঠানসমূহ সম্পূৰ্ণৰূপে বন্ধ ৰখা হৈছে।