বিশ্ববিদ্যালয়ৰ সংগীতানুষ্ঠানত ব্যাপক ভিৰত পদপিষ্ট হৈ ৪ শিক্ষাৰ্থীৰ মৃত্যু

ডিজিটেল ডেস্কঃ  কেৰালাৰ কোচিত সংঘটিত হৈছে এক ভয়ংকৰ ঘটনা। শনিবাৰে কেৰালাৰ কোচিন বিজ্ঞান আৰু প্ৰযুক্তিবিদ্যা বিশ্ববিদ্যালয়ৰ বাৰ্ষিক অনুষ্ঠানৰ সময়ত পদপিষ্ট হৈ ৪ জন শিক্ষাৰ্থীৰ মৃত্যু হোৱাৰ লগতে ৬০ জনতকৈ অধিক আহত হয়। 

জানিব পৰা মতে, বিশ্ববিদ্যালয়খনৰ কমপ্লেক্সটোৰ মুকলি প্ৰেক্ষাগৃহত আয়োজন কৰা নিকিতা গান্ধীৰ এক সংগীতানুষ্ঠানত সংঘটিত হয় এই দুৰ্ঘটনা। উল্লেখযোগ্য যে, কমেও ৬৪ গৰাকী আহত শিক্ষাৰ্থী বৰ্তমান বিভিন্ন চিকিৎসালয়ত চিকিৎসাধীন হৈ আছে। আহত আৰু ৪ জন শিক্ষাৰ্থীৰ অৱস্থা সংকটজনক বুলি জানিব পৰা গৈছে। ৰাজ্যখনৰ স্বাস্থ্য মন্ত্ৰী বীনা জৰ্জে এক প্ৰেছ বিজ্ঞপ্তিযোগে জনায় যে চাৰিজন শিক্ষাৰ্থীক মৃত অৱস্থাত কালামছেৰী মেডিকেল কলেজলৈ অনা হৈছিল।