‘আমাৰ অসম’ৰ গুৱাহাটীৰ প্ৰতিবেদক, ১২ মাৰ্চঃ ফুলকুমলীয়া শিশুৰ ওপৰত অভিভাৱকে পঢ়াৰ নামত জাপি দিয়া মানসিক বোজা হ্ৰাস কৰাৰ বাবে এইবাৰ কঠোৰ হৈ পৰিছে ৰাজ্যৰ শিক্ষা বিভাগ৷ একাংশ পিতৃ-মাতৃয়ে ৬ বছৰ নৌহওঁতেই সন্তানক প্ৰাথমিক স্কুলত নামভৰ্তি কৰোৱাই খেল-ধেমালিৰ মাজত ব্যস্ত থকাৰ সময়খিনিত অবুজ সন্তানক আনুষ্ঠানিক শিক্ষাৰ বোজা জাপি দি আহিছে৷ শিশুৰ ওপৰত চলোৱা এনে মানসিক হাৰাশাস্তিৰ পৰা পৰিত্ৰাণ দিয়াৰ লক্ষ্যৰে এতিয়াৰে পৰা প্ৰাথমিক বিদ্যালয়ৰ প্ৰথম শ্ৰেণীত ন্যূনতম ৬ বছৰ বয়স গৰকা শিশুকহে নামভৰ্তিৰ বাবে কঠোৰ নীতি-নিৰ্দেশনা জাৰি কৰিছে৷ ৰাষ্ট্ৰীয় শিক্ষানীতি-২০২০ আৰু শিশুৰ শিক্ষাৰ অধিকাৰ আইন-২০০৯১ অধীনত নতুন শিক্ষা বৰ্ষৰ পৰা প্ৰাথমিক বিদ্যালয়ৰ প্ৰথম শ্ৰেণীত নামভৰ্তিৰ বাবে সকলো শিশুৰে বয়স ৬ বছৰ বা তাতোধিক হ’ব লাগিব৷ কোনো কাৰণতে ৬ বছৰৰ তলৰ শিশুক গ্ৰেড-১ত (প্ৰথম শ্ৰেণী) নামভৰ্তি কৰোৱাব নোৱাৰিব৷ শেহতীয়াকৈ বিদ্যালয় শিক্ষা বিভাগৰ সচিব নাৰায়ণ কোঁৱৰে এটা নিৰ্দেশনাযোগে ২০২৪-২৫ শিক্ষাবৰ্ষৰ পৰা এই নিয়ম প্ৰযোজ্য হ’ব বুলিও স্পষ্ট কৰি দিছে৷ নামভৰ্তিৰ সময়ত বয়সৰ ক্ষেত্ৰত বিদ্যালয় কতৃৰ্পক্ষই এতিয়াৰে পৰা কঠোৰ হ’ব লাগিব বুলিও নিৰ্দেশনাটোত কোৱা হৈছে৷ উল্লেখ্য, শিক্ষা বিভাগৰ ৰোষত পৰাৰ ভয়ত বিদ্যালয়ৰ ছাত্ৰ-ছাত্ৰীৰ সংখ্যা বৃদ্ধি কৰাৰ নামত একাংশ চৰকাৰী প্ৰাথমিক বিদ্যালয়ে ৬ বছৰ বয়স নগৰকা কণ কণ শিশুক অভিভাৱকক হেঁচা প্ৰয়োগ কৰি প্ৰথম শ্ৰেণীত নামভৰ্তি কৰোৱাৰ উদাহৰণ আছে৷ আনহাতে, একাংশ ব্যক্তিগত খণ্ডৰ বিদ্যালয়েও লাভৰ আশাত ৬ বছৰ বয়স নোহোৱা শিশুকো প্ৰথম শ্ৰেণীত নামভৰ্তি কৰি মাছুল সংগ্ৰহ কৰি আহিছে৷ বিদ্যালয় শিক্ষা বিভাগৰ এই নিৰ্দেশনাৰ পাছত এতিয়াৰে পৰা ৬ বছৰ তলৰ কোনো শিশুকে প্ৰথম শ্ৰেণীত নামভৰ্তি কৰিব নোৱাৰিব৷