এতিয়া  চজিনাৰ বতৰ৷ কোমল চজিনা সৰিয়হ দি  খাবলৈ বৰ তৃপ্তিদায়ক৷  এই চজিনাৰ ফুল,ফল ,পাত, চাল আদি সকলো অংশই  ঔষধি গুণৰে ভৰপূৰ৷  ভিটামিন, মিনাৰেলেৰে ভৰপূৰ চজিনাই মধুমেহ নিয়ন্ত্ৰণ, তেজ  পৰিষ্কাৰ, শাৰীৰিক ক্ষমতা, হাড় মজবুত কৰে৷ তদুপৰি চজিনাই কেন্সাৰ ৰোগৰ কোষসমূহ  ধবংস কৰে৷  চজিনা বসন্ত ৰোগৰ মহৌষধ বুলি বিশেষজ্ঞসকলে  কয়৷ আয়ুৰ্বেদত চজিনাৰ বহুতো ঔষধি গুণৰ কথা উল্লেখ আছে৷

-  এতিয়া বসন্ত ৰোগৰ সময়৷ চজিনাৰ ফুল ভাজি খালে ইয়াৰ পৰা হাত সাৰিব পাৰি৷ বিশেষকৈ সৰু ল’ৰা-ছোৱালীক চজিনাৰ ফুল খাবলৈ দিব লাগে৷ কৃমি হ’লে চজিনাৰ ফুল ভাজি খাব লাগে, নতুবা  কুমলীয়া পাত ভাজি খাব লাগে৷  বিশেষকৈ সৰু ল’ৰা-ছোৱালীৰ ক্ষেত্ৰত৷  অসহ্যকৰ মূৰৰ বিষত শিপা খুন্দি  ৰস উলিয়াই লগাব লাগে৷

-  চজিনাৰ ছেঁই শুকুৱাই গুড়ি কৰি,  তাৰ লগত নিমখ মিহলাই খালে হাইপাৰ টেনচন, অতিৰিক্ত কলেষ্টেৰল কমায়৷ চকু ৰঙা পৰিলে, চকু খচখচালে, আৰু মধুমেহ ৰোগীৰ চকুৰ দৃষ্টি  শক্তি কমিলে  এমুঠি  চজিনাৰ পাত লৈ ৰস উলিয়াই দুয়োটা চকুতে  দিলে সুফল পোৱা যায়৷

-  চজিনাৰ ফুল জালুক দি ভাজি খালে মুখলৈ ৰুচি ঘূৰি আহে৷  চজিনাৰ ফুল শুকুৱাই অকণমান ঘিঁউত ভাজি  জালুক আৰু নিমখ দি গৰ্ভৱতী মহিলাক খাবলৈ দিব লাগে৷  পাত শুকুৱাই গুড়ি কৰি পানীৰ লগত মিলাই খালে ছালৰ বিভিন্ন সমস্যাৰ পৰা ৰক্ষা পাব পাৰি৷

-  চজিনাৰ পাত পিচি নেমু ৰসৰ লগত মিহলাই লগালে শালমনৰ সমস্যা দূৰ হয়৷ শৰীৰৰ  বিভিন্ন  অংশ  ফুলিলে এইবিধ গছৰ চাল পিচি বান্ধি  থব  লাগে৷ চজিনা গছৰ চাল পিচি ৰস উলিয়াই খালে অসহ্যকৰ গাৰ বিষ নাইকিয়া কৰে৷

-  শৰীৰ জ্বলা- পোৰা কৰিলে  পাত  পিচি লগাব লাগে৷ হ্লশিপা উতলাই সেই পানী খালে জ্বৰ উপশম হয়৷  টনচিল হ’লে চজিনা পাত সিজাই  সেই পানীৰে গাৰগল কৰিব লাগে৷ ৰক্তহীনতাত ভোগা  লোকক চজিনা আৰু  চজিনা পাত নিয়মীয়াকৈ খাবলৈ দিব লাগে৷  চালৰ পৰা তৈয়াৰ কৰা  ৰসে ঘা আদি  শুকুৱাত সহায় কৰে৷ মৃগী ৰোগীক  শিপা উতলোৱা পানী খাবলৈ দিব লাগে৷ 

-  তদুপৰি চজিনাৰ পৰা তৈয়াৰ কৰা  চুপ লিভাৰ, অগ্নাশয়, মধুমেহৰ কাৰণে অতি  উপকাৰী ৷  চজিনাৰ পাত শুকুৱাই গুড়ি কৰা চাহে উচ্ছ ৰক্তচাপ নিয়ন্ত্ৰন কৰে ৷ দালিত কুমলীয়া পাত দি, নতুবা আঞ্জা  খোৱাৰ অভ্যাস কৰিব লাগে ৷