'আমাৰ অসম'ৰ বিশেষ প্রতিবেদন, ১৮ মাৰ্চঃ নৰেন্দ্ৰ মোদী চৰকাৰে ৰাজনৈতিক দলৰ পুঁজি সংগ্ৰহৰ ব্যৱস্থাত স্বচ্ছতা আনিবলৈ ২০১৮ চনত প্ৰৱৰ্তন কৰা ইলেক্ট্র'বেল বণ্ডৰ জৰিয়তে ২০১৯ চনৰ নিৰ্বাচনৰ পূৰ্বেই কেন্দ্রত শাসনাধিষ্ঠিত বিজেপি দলে ৬৯৮৬.৫ কোটি টকাৰ 'দান' লাভ কৰিছিল। দেওবাৰে নির্বাচন আয়োগে নিজস্ব ৱেবছাইটত প্রকাশ কৰা তথ্যত এই পৰিসংখ্যা প্রকাশ পাইছে। নির্বাচন আয়োগক এই পৰিসংখ্যা প্রকাশ কৰিবলৈ উচ্চতম ন্যায়ালয়ে নির্দেশ দিছিল। নির্বাচন আয়োগে এই তথ্য দেওবাৰে বিয়লি নিজস্ব ৱেবছাইটত প্রকাশ কৰি জনাইছে যে তেওঁলোকে তথ্যসমূহ উচ্চতম ন্যায়ালয়ৰ ৰেজিষ্ট্ৰীৰ পৰা লাভ কৰিছে। এয়া ষ্টেট বেংকে তেওঁলোকক যোগান ধৰা তথ্য নহয়, বৰং এই তথ্য ৰাজনৈতিক দলসমূহে বন্ধ খামত উচ্চতম ন্যায়ালয়ত দাখিল কৰিছিল। উচ্চতম ন্যায়ালয়ে সেই খাম খোলাৰ পৰিৱৰ্তে খামত থকা তথ্য আৰু একে তথ্যৰ ডিজিটেল ৰূপ নির্বাচন আয়োগলৈ পঠিয়াই দি ৱেবছাইটত প্রকাশ কৰিবলৈ নিৰ্দেশ দিয়ে। নির্বাচন আয়োগে এই তথ্য কোন কোন চনৰ সেয়া উল্লেখ কৰা নাই। কিন্তু বিশ্বাস কৰা হৈছে, এই তথ্য ২০১৯ চনৰ ১২ এপ্রিল পর্যন্ত ইলেক্ট্র'ৰেল বণ্ডৰ জৰিয়তে লাভ কৰা ধনৰ হিচাপ। কিয়নো, ৰাজনৈতিক দলসমূহে ২০১৯ চনৰ ১২ এপ্ৰিললৈকে লাভ কৰা ইলেক্টৰেল বণ্ডৰ তথ্যৰ ধনৰ হিচাপহে উচ্চতম ন্যায়ালয়ত বন্ধ খামত দাখিল কৰিছিল।