দ্ৰাৱিড়ক অতিক্ৰমৰ সুযোগ কোহলিৰ সন্মুখত

নতুন দিল্লী, ১৯  নৱেম্বৰ : আসন্ন ব’ৰ্ডাৰ-গাভাস্কাৰ ট্ৰফীত বৰ্ণাঢ্য  কেৰিয়াৰত আন এক মাইলৰ খুঁটিত উপনীত হোৱাৰ সুযোগ পাব বিৰাট  কোহলিয়ে৷ ব’ৰ্ডাৰ-গাভাস্কাৰ ট্ৰফীৰ প্ৰথম টেষ্ট আৰম্ভ  হ’ব ২২ নৱেম্বৰৰ পৰা পাৰ্থত৷ অষ্ট্ৰেলিয়াৰ বিৰুদ্ধে টেষ্টত কোহলিৰ  সংগ্ৰহ ২,০৪২ ৰান৷  অষ্ট্ৰেলিয়াৰ বিৰুদ্ধে টেষ্টত সৰ্বাধিক ৰান কৰা ভাৰতীয় খেলুৱৈৰ  তালিকাত প্ৰাক্তন তাৰকা ৰাহুল দ্ৰাৱিড়ক অতিক্ৰম  কৰাৰ বাবে কোহলিক প্ৰয়োজন আৰু ১০২ ৰানৰ৷ অষ্ট্ৰেলিয়াৰ বিৰুদ্ধে ৩২ খন টেষ্টত দ্ৰাৱিড়ৰ সংগ্ৰহ  ২,১৪৩ ৰান৷

অষ্ট্ৰেলিয়াৰ বিৰুদ্ধে টেষ্টত সৰ্বাধিক ৰান কৰা ভাৰতীয় খেলুৱৈৰ তালিকাত  দ্ৰাৱিড় আছে তৃতীয় স্থানত৷ কোহলি আছে  পঞ্চম স্থানত৷ অষ্ট্ৰেলিয়াৰ বিৰুদ্ধে কোহলিয়ে ২৫খন টেষ্টত (দেশ  আৰু বিদেশত) অংশ লৈছে৷  তেওঁৰ  গড় ৪৭.৪৮৷ অষ্ট্ৰেলিয়াৰ বিৰুদ্ধে টেষ্টত কোহলিৰ নামত আছে সৰ্বাধিক আঠটা শতক  আৰু পাঁচটা অৰ্ধশতক৷ এই তালিকাৰ চতুৰ্থ স্থানত  আছে  চেটেশ্বৰ পূজাৰা৷ ২৫খন টেষ্টত  তেওঁৰ সংগ্ৰহ ২,০৭৪ ৰান৷  দ্বিতীয় স্থানত  আছে প্ৰাক্তন তাৰকা ভি ভি এছ লক্ষ্মণ৷ ২৯ খন টেষ্টত লক্ষ্মণৰ সংগ্ৰহ ২,৪৩৪ ৰান৷ গড় ৪৯.৬৭৷ ৩৯খন টেষ্টত ৩,৬৩০ ৰান সংগ্ৰহেৰে এই তালিকাৰ শীৰ্ষত  আছে  শচীন তেণ্ডুলকাৰ৷ গড় ৫৫৷ অষ্ট্ৰেলিয়াৰ বিৰুদ্ধে টেষ্টত  তেণ্ডুলকাৰৰ নামত আছে ১১টা শতক আৰু ১৬টা  অৰ্ধশতক৷