য’ত তেণ্ডুলকাৰতকৈ আগস্থানত কোহলি

ভাৰতীয় ক্ৰিকেটৰ সৰ্বকালৰ শ্ৰেষ্ঠ বেটাৰ কোন বুলি প্ৰশ্ন কৰিলে নিঃসন্দেহে প্ৰথমে নাম আহিব শচীন তেণ্ডুলকাৰৰ৷ কেৱল ভাৰতৰে নহয়, তেওঁ হৈছে বিশ্ব ক্ৰিকেটৰ অন্যতম শ্ৰেষ্ঠ বেটাৰ৷ প্ৰায়েই টীম ইণ্ডিয়াৰ বৰ্তমানৰ সদস্য বিৰাট কোহলিক তেণ্ডুলকাৰৰ সৈতে তুলনা কৰা হয়৷  কিন্তু আন্তঃৰাষ্ট্ৰীয় ক্ৰিকেটত সৰ্বাধিক ৰান অথবা সৰ্বাধিক শতকৰ ক্ষেত্ৰত কোহলিতকৈ বহু আগত আছে তেণ্ডুলকাৰ৷ পাকিস্তান আৰু ইউনাইটেড আৰৱ এমীৰেটছত চলি থকা চেম্পিয়নছ ট্ৰফীৰ সময়তে ‘ষ্টাৰ স্প’ৰ্টছৰ এটা বিশেষ অনুষ্ঠানত প্ৰাক্তন ক্ৰিকেটাৰ আৰু বৰ্তমানৰ ক্ৰিকেট ধাৰাভাষ্যকাৰ সঞ্জয়  মঞ্জৰেকাৰে আকৌ এবাৰ কোহলিক তেণ্ডুলকাৰৰ সৈতে তুলনা কৰি কৈছিল যে তেণ্ডুলকাৰ যদিও বিশ্ব ক্ৰিকেটৰ অন্যতম শ্ৰেষ্ঠ বেটাৰ, এটা ক্ষেত্ৰত তেওঁতকৈ আগস্থানত থাকিব কোহলি৷ চেম্পিয়নছ ট্ৰফীৰ পূৰ্বে কোহলিৰ ফৰ্মক লৈ আশংকা কৰা হৈছিল৷ কিন্তু পাকিস্তানৰ বিৰুদ্ধে অনুষ্ঠিত গুৰুত্বপূৰ্ণ খেলখনত এদিনীয়া কেৰিয়াৰৰ ৫১সংখ্যক শতকীয় ইনিংছটো খেলি কিয় তেওঁক সাম্প্ৰতিক সময়ৰ অন্যতম শ্ৰেষ্ঠ বেটাৰৰ আখ্যা দিয়া হয়, তাৰ প্ৰমাণ দিয়ে ৩৬ বছৰীয়া বেটাৰজনে৷ কোহলিৰ এই ইনিংছটোৰ পাছত মঞ্জৰেকাৰে কৈছিল যে সফলতাৰে লক্ষ্য অনুসৰণ কৰাৰ ক্ষেত্ৰত কোহলিক সদায় তেণ্ডুলকাৰতকৈ আগস্থান দিব লাগিব৷ এই সন্দৰ্ভত মঞ্জৰেকাৰে কয়–‘তেণ্ডুলকাৰে প্ৰথমে বেটিং কৰিবলৈ পছন্দ কৰিছিল৷ তেওঁৰ ক্ষ্য আছিল নতুন বলত কেনেদৰে দীৰ্ঘ সময় আউট নোহোৱাকৈ থাকিব পাৰি৷ কিন্তু লক্ষ্য অনুসৰণ কৰি জয় সাব্যস্ত কৰাৰ ক্ষেত্ৰত তেণ্ডুলকাৰতকৈ আগস্থানত থাকিব কোহলি৷’ লগতে তেওঁ কয় যে কোহলি এজন মেচ উইনাৰ, সেই কথা স্বীকাৰ কৰিব লাগিব৷ বহু খেলত তেওঁ লক্ষ্য অনুসৰণ কৰি ভাৰতীয় দলৰ জয়ত গুৰুত্বপূৰ্ণ ভূমিকা লৈছে৷ দলক জয়ী কৰোৱাই তেওঁ খেলপথাৰ এৰিছে৷ কিন্তু তেণ্ডুলকাৰৰ ক্ষেত্ৰত সংখ্যাটো কিছু তাকৰ৷ সফলতাৰে লক্ষ্য অনুসৰণ কৰাৰ বিষয়টো বাদ দিলে নিঃসন্দেহে তেণ্ডুলকাৰ সদায় আগত থাকিব৷

দুটা প্ৰজন্মৰ বেটাৰ তেণ্ডুলকাৰ আৰু কোহলি৷ সেয়েহে হয়তো দুয়োজনৰ মাজত তুলনা হয়তো তেনেদৰে নহ’ব৷ কিন্তু যদি এদিনীয়া আন্তঃৰাষ্ট্ৰীয় ক্ৰিকেটত দুয়োজনৰ বেটাৰৰ পৰিসংখ্যালৈ চোৱা হয়, তেন্তে দেখা যাব যে লক্ষ্য অনুসৰণ কৰি জয়ী হোৱাৰ ক্ষেত্ৰত ৯৯টা ইনিংছত কোহলিৰ সংগ্ৰহ প্ত,৯১৩ ৰান, য’ত আছে ২৪টা শতক আৰু ২৫টা অৰ্ধশতক৷ ৰানৰ গড় ৮৯.৫৯৷ সেইক্ষেত্ৰত তেণ্ডুলকাৰৰ ১২৪টা ইনিংছত সংগ্ৰহ ৫,৪৯০ ৰান, ৰানৰ গড় ৫৫.৪৫৷ শতক আৰু অৰ্ধশতকৰ সংখ্যা ক্ৰমে ১৪ আৰু ৩১টা৷ উল্লেখ্য, এদিনীয়া ক্ৰিকেটত তেণ্ডুলকাৰৰ নামত আছে ১৮,৪২৬ ৰান৷ তাৰ বিপৰীতে কোহলিৰ নামত  আছে ১৪,০৮৫ ৰান৷