জোনাইত এজাক বৰষুণতে চপৰা-চপৰে খহি পৰিল কোটিটকীয়া মথাউৰি

'আমাৰ অসম'ৰ জোনাইৰ প্ৰতিবেদকঃ   বাৰিষা সমাগত৷ তেনে সময়তে সামান্য এজাক বৰষুণতে পুনৰ চপৰা-চপৰে খহি পৰিছে জোনাইৰ কেইবা কোটি টকীয়া মথাউৰি। বহু আবেদন-নিবেদন তথা দাবীৰ অন্তত জোনাইৰ বেৰা চাপৰিবাসী ৰাইজে লাভ কৰিছিল চিয়াং আৰু লালী নদীৰ কৃত্ৰিম বান আৰু গৰাখহনীয়া প্ৰতিৰোধৰ বাবে এটা মথাউৰি৷ কিন্তু কোটি টকা ব্যয় কৰি নিৰ্মাণ কৰা এই মথাউৰিটো এজাক বৰষুণতে কিয় খহিব ধৰিছে চপৰা চপৰে?  উল্লেখ্য যে জানিব পৰা মতে, জোনাইত লালী আৰু চিয়াং নদীৰ বান আৰু গৰাখহনীয়া প্ৰতিৰোধৰ লগতে জোনাইৰ পৰা মাজুলীলৈ সংযোগ কৰাৰ লক্ষ্যৰে শান্তিপুৰৰ পৰা নিৰ্মাণ কৰা কেইবা কোটি টকীয়া মথাউৰিটো পথৰ বিভিন্ন অংশত সামান্য এজাক বৰষুণতে চপৰা-চপৰে খহি পৰিছে৷ উল্লেখযোগ্য যে কেইবা কোটি টকা ব্যয় কৰি জোনাইৰ শান্তিপুৰ তিনিআলিৰ পৰা কেৰকেৰলৈকে প্ৰায় ৭ কিলোমিটাৰ দৈৰ্ঘ্যৰ নিৰ্মাণ কৰি থকা এই বৃহৎ মথাউৰিটো প্ৰায় দুবছৰৰ ভিতৰতে সামান্য এজাক বৰষুণতে বিভিন্ন অংশত জহি-খহি যোৱাত শংকিত হৈ পৰিছে  নৈপৰীয়া ৰাইজবাসী। 

আনহাতে মথাউৰিতো সম্পূৰ্ণ বালিৰে নিৰ্মাণ কৰাৰ বাবে নিৰ্মাণ কাৰ্য আৰম্ভ হোৱাৰ দিনৰে পৰাই সামান্য এজাক বৰষুণতে মথাউৰিৰ বিভিন্ন অংশ জহি খহি যোৱা বুলি অভিযোগ কৰিছে স্থানীয় ৰাইজে৷ এনেদৰে মথাউৰিৰ  বিভিন্ন অংশত খহনীয়া অব্যাহত থাকিলে চিয়াং নদীৰ বাঢ়নী পানীয়ে যিকোনো মুহুৰ্ততে মথাউৰি ভাঙি অঞ্চলটোৰ কুৰি খনতকৈও অধিক গাঁও বানত ডুব যোৱাৰ আশংকা কৰি শংকিত হৈ পৰিছে নৈ পৰীয়া ৰাইজবাসী৷  ইমানৰ পিছতো জলসম্পদ বিভাগে মথাউৰিটোৰ বিভিন্ন অংশত চপৰা-চপৰে খহি যোৱা ঠাই সমূহত সঠিকভাৱে মেৰামতি নকৰি নামমাত্ৰ কেইটামান বালিৰ বস্তা দি দায়িত্ব সামৰাৰ অভিযোগ কৰিছে স্থানীয় ৰাইজে৷  সেয়েহে কোটি  টকীয়া মথাউৰি নিৰ্মাণৰ নামত সংঘটিত হোৱা এনে ব্যাপক দুৰ্নীতি আৰু অনিয়মৰ লগত জড়িত থকা জোনাই জলসম্পদ বিভাগৰ চোৱা চিতাৰ দায়িত্বত থকা অভিযন্তা জৱাহৰলাল ৰয়ৰ লগতে ঠিকাদাৰ জনৰ ওপৰত উচ্চ পৰ্যায়ৰ তদন্ত কৰি বিহীত ব্যৱস্থা গ্ৰহণ কৰাৰ দাবী জনাইছে স্থানীয় ৰাইজে৷