ছাত্ৰ আন্দোলনৰ পৰিণতিত চৰকাৰ গঠন, ছাৰ্বিয়াত আলেকজেণ্ডাৰ ভুচিচৰ দীৰ্ঘদিনীয়া ৰাজনৈতিক আধিপত্যৰ অৱসান

Published Date: 27 October, 2026

ছাত্ৰ আন্দোলনৰ পৰিণতিত চৰকাৰ গঠন, ছাৰ্বিয়াত আলেকজেণ্ডাৰ ভুচিচৰ দীৰ্ঘদিনীয়া ৰাজনৈতিক আধিপত্যৰ অৱসান

'আমাৰ অসম’ৰ বিশেষ প্ৰতিবেদন, ২৬ অক্টোবৰঃ ইউৰোপৰ বলকান অঞ্চলৰ দেশ ছাৰ্বিয়াত ছাত্ৰ আন্দোলনে দেশখনৰ ৰাজনীতিত এক গুৰুত্বপূৰ্ণ পৰিৱৰ্তনৰ সূচনা কৰিছে। প্ৰায় দুবছৰ ধৰি চলা দুৰ্নীতিবিৰোধী ছাত্ৰ আন্দোলনৰ সমৰ্থনত গঠিত নিৰ্বাচনী মঞ্চ ‘ষ্টুডেণ্ট লিষ্ট’ৰ হাতত পৰাজয় স্বীকাৰ কৰিছে দেশখনৰ ৰাজনীতিত দীৰ্ঘদিন ধৰি আধিপত্য বিস্তাৰ কৰি অহা আলেকজেণ্ডাৰ ভুচিচে। ২৫ অক্টোবৰত অনুষ্ঠিত আগতীয়া সংসদীয় নিৰ্বাচনৰ প্ৰাৰম্ভিক ফলাফলত ছাত্ৰ-সমৰ্থিত প্ৰাৰ্থীসকলৰ স্পষ্ট অগ্ৰগতিৰ পাছত দেওবাৰে নিশা ভুচিচে পৰাজয় স্বীকাৰ কৰে। সোমবাৰে প্ৰকাশিত নিৰ্বাচন আয়োগৰ তথ্য অনুসৰি, ‘ষ্টুডেণ্ট লিষ্ট’ৰ ভোটৰ হাৰ ৫২.৬৫ শতাংশ। ইয়াৰ বিপৰীতে ভুচিচৰ নেতৃত্বাধীন ‘ইউনাইটেড ছাৰ্বিয়া’ৰ ভোটৰ হাৰ ৩৯.২২ শতাংশ। এই ফলাফলে দেশখনৰ ২৫০খন আসনবিশিষ্ট সংসদত নতুন ৰাজনৈতিক শক্তিৰ চৰকাৰ গঠনৰ পথ মুকলি কৰিছে।

ছাৰ্বিয়াৰ এই ৰাজনৈতিক পৰিৱৰ্তনৰ আঁৰত আছে এক শোকাৱহ দুৰ্ঘটনা, তাৰ পিছত গঢ় লৈ উঠা জনৰোষ আৰু চৰকাৰৰ জবাবদিহি দাবী কৰি ছাত্ৰ-ছাত্ৰীসকলে আৰম্ভ কৰা দীৰ্ঘদিনীয়া আন্দোলন। ২০২৪ চনৰ ১ নৱেম্বৰত দেশখনৰ নোভি ছাদ চহৰৰ ৰে’ল ষ্টেচনৰ কংক্ৰিটৰ ছাউনি খহি পৰাৰ ফলত ১৬জন লোকৰ মৃত্যু হৈছিল। এই ঘটনাই দেশজুৰি শোক আৰু ক্ষোভৰ সৃষ্টি কৰিছিল। দুৰ্ঘটনাটোৰ কাৰণ, নিৰ্মাণকাৰ্যৰ মান, তদাৰকী ব্যৱস্থা আৰু সম্ভাব্য প্ৰশাসনিক গাফিলতিক লৈ প্ৰশ্ন উত্থাপন হৈছিল। ঘটনাটোৰ স্বচ্ছ তদন্ত আৰু দায়ীসকলৰ বিৰুদ্ধে ব্যৱস্থা গ্ৰহণৰ দাবীৰে আৰম্ভ হোৱা প্ৰতিবাদ ক্ৰমাৎ দুৰ্নীতি, ৰাজনৈতিক পৃষ্ঠপোষকতা আৰু চৰকাৰী প্ৰতিষ্ঠানসমূহৰ জবাবদিহিৰ বৃহত্তৰ আন্দোলনলৈ ৰূপান্তৰিত হয়। নোভি ছাদৰ দুৰ্ঘটনাৰ পাছত বিশ্ববিদ্যালয়ৰ ছাত্ৰ-ছাত্ৰীসকলে শ্ৰেণীকোঠা আৰু শিক্ষানুষ্ঠানৰ চৌহদৰ পৰা ৰাজপথলৈ ওলাই আহে। বহু শিক্ষানুষ্ঠানত পাঠদান বন্ধ কৰি প্ৰতিবাদী কাৰ্যসূচী গ্ৰহণ কৰা হয়। ছাত্ৰ-ছাত্ৰীসকলে দুৰ্ঘটনাটোৰ তদন্তৰ নথি ৰাজহুৱা কৰা, দায়ী ব্যক্তিসকলক চিনাক্ত কৰা, প্ৰতিবাদকাৰীৰ বিৰুদ্ধে গ্ৰহণ কৰা ব্যৱস্থাৰ তথ্য প্ৰকাশ কৰা আৰু চৰকাৰী প্ৰতিষ্ঠানসমূহৰ স্বচ্ছতা নিশ্চিত কৰাৰ দাবী উত্থাপন কৰে। প্ৰথমাৱস্থাত ৰে’ল ষ্টেচনৰ দুৰ্ঘটনাৰ ন্যায় বিচাৰি আৰম্ভ হোৱা আন্দোলন পৰৱৰ্তী সময়ত ছাৰ্বিয়াৰ শাসন ব্যৱস্থাৰ বিৰুদ্ধে বৃহত্তৰ প্ৰতিবাদলৈ ৰূপান্তৰিত হয়। আন্দোলনকাৰীসকলে অভিযোগ কৰে যে দুৰ্নীতি, ৰাজনৈতিক আনুগত্যৰ ভিত্তিত নিযুক্তি আৰু চৰকাৰী প্ৰতিষ্ঠানসমূহৰ ওপৰত শাসকীয় দলৰ প্ৰভাৱে জনসাধাৰণৰ আস্থা দুৰ্বল কৰিছে। তেওঁলোকে ন্যায়পালিকাৰ স্বাধীনতা, সংবাদ মাধ্যমৰ স্বাধীনতা আৰু চৰকাৰৰ জবাবদিহি নিশ্চিত কৰাৰ দাবীও উত্থাপন কৰে। চৰকাৰৰ বিৰুদ্ধে উত্থাপিত দুৰ্নীতি আৰু ক্ষমতাৰ অপব্যৱহাৰৰ অভিযোগসমূহ ভুচিচ আৰু তেওঁৰ দলে অস্বীকাৰ কৰি আহিছে।

প্ৰতিবাদৰ পৰিসৰ বৃদ্ধি পোৱাৰ লগে লগে আন্দোলনটোৱে ছাত্ৰ-ছাত্ৰীৰ মাজতে সীমাবদ্ধ নাথাকি শিক্ষক, অধ্যাপক, চিকিৎসক, কৃষক, সাংস্কৃতিক কৰ্মী আৰু বিভিন্ন বৃত্তিৰ লোকৰ সমৰ্থন লাভ কৰে। ৰাজধানী বেলগ্ৰেডকে ধৰি দেশখনৰ বিভিন্ন চহৰত বৃহৎ প্ৰতিবাদী সমাৱেশ অনুষ্ঠিত হয়। এইদৰে ২০২৪ চনৰ নৱেম্বৰত এটা নিৰ্মাণজনিত দুৰ্ঘটনাৰ পিছত আৰম্ভ হোৱা আন্দোলনে ক্ৰমাৎ চৰকাৰৰ ৰাজনৈতিক বৈধতা আৰু প্ৰশাসনিক জবাবদিহিৰ প্ৰশ্নক কেন্দ্ৰ কৰি এক ৰাষ্ট্ৰজোৰা গণ আন্দোলনৰ ৰূপ লয়। আলেকজেণ্ডাৰ ভুচিচ ছাৰ্বিয়াৰ ৰাজনীতিৰ অন্যতম প্ৰভাৱশালী নেতা। তেওঁৰ ছাৰ্বিয়ান প্ৰগ্ৰেছিভ পাৰ্টিয়ে ২০১২ চনত ক্ষমতালৈ অহাৰ পাছৰে পৰা দেশখনৰ ৰাজনীতিত প্ৰধান ভূমিকা পালন কৰি আহিছে। ভুচিচে ২০১৪ চনৰ পৰা প্ৰধানমন্ত্ৰী আৰু ২০১৭ চনৰ পৰা ৰাষ্ট্ৰপতি হিচাপে কাৰ্যনিৰ্বাহ কৰিছিল। ৰাষ্ট্ৰপতি হিচাপে তেওঁৰ কাৰ্যকালত দেশখনত আন্তঃগাঁথনি উন্নয়ন, পথ নিৰ্মাণ আৰু অৰ্থনৈতিক বিকাশৰ ওপৰত গুৰুত্ব দিয়া হৈছিল। তেওঁৰ সমৰ্থকসকলে এইবোৰক চৰকাৰৰ উল্লেখযোগ্য সাফল্য হিচাপে উপস্থাপন কৰি আহিছে। ইয়াৰ বিপৰীতে, বিৰোধী দল আৰু চৰকাৰৰ সমালোচকসকলে সংবাদ মাধ্যম, ন্যায়পালিকা আৰু অন্যান্য চৰকাৰী প্ৰতিষ্ঠানৰ স্বাধীনতাক লৈ প্ৰশ্ন উত্থাপন কৰিছিল। তেওঁলোকৰ অভিযোগ আছিল যে দীৰ্ঘদিনীয়া শাসনৰ ফলত ক্ষমতা ক্ৰমাৎ কেন্দ্ৰীভূত হৈছে আৰু ৰাজনৈতিক প্ৰতিযোগিতাৰ ক্ষেত্ৰত অসমতা বৃদ্ধি পাইছে। ভুচিচৰ চৰকাৰে অৱশ্যে এই সমালোচনাসমূহৰ বহু অভিযোগ অস্বীকাৰ কৰি আহিছে। ছাত্ৰ আন্দোলনে এই অসন্তুষ্টিসমূহক এক উমৈহতীয়া ৰাজনৈতিক মঞ্চত একত্ৰিত কৰে। ২০২৬ চনৰ ছেপ্টেম্বৰত আন্দোলনৰ চাপৰ মাজতে আগতীয়া সংসদীয় নিৰ্বাচনৰ পথ মুকলি হয়। অৱশেষত ২৫ অক্টোবৰত অনুষ্ঠিত নিৰ্বাচনটো ভুচিচৰ নেতৃত্বাধীন শাসকীয় শক্তি আৰু ছাত্ৰ-সমৰ্থিত নিৰ্বাচনী মঞ্চৰ মাজত প্ৰত্যক্ষ ৰাজনৈতিক প্ৰতিদ্বন্দ্বিতালৈ পৰিণত হয়। ২৫ অক্টোবৰত ছাৰ্বিয়াৰ ২৫০খন আসনবিশিষ্ট ৰাষ্ট্ৰীয় সংসদৰ নিৰ্বাচনত ভোটদান অনুষ্ঠিত হয়। ২৬ অক্টোবৰত প্ৰকাশিত দেশখনৰ নিৰ্বাচন আয়োগৰ তথ্য অনুসৰি, ৮,১৩৫টা ভোটকেন্দ্ৰৰ তথ্যৰ ভিত্তিত ‘ষ্টুডেণ্ট লিষ্ট’ই ২২,৪৬,৪২৩টা ভোট লাভ কৰে। এয়া মুঠ ভোটৰ ৫২.৬৫ শতাংশ। আনহাতে, আলেকজেণ্ডাৰ ভুচিচৰ নেতৃত্বাধীন ‘ইউনাইটেড ছাৰ্বিয়া’ই লাভ কৰে ১৬,৭৩,২৪১টা ভোট, অৰ্থাৎ ৩৯.২২ শতাংশ। নিৰ্বাচন আয়োগৰ প্ৰকাশিত তথ্য অনুসৰি, মুঠ ৪২,১১,৯৫৭জন ভোটাৰে ভোটদান কৰে আৰু ভোটদানৰ হাৰ আছিল ৬৮.৭৮ শতাংশ। এই ফলাফলে ছাত্ৰ-সমৰ্থিত মঞ্চখনক সংসদত সংখ্যাগৰিষ্ঠতা লাভৰ দিশত স্পষ্ট সুবিধা প্ৰদান কৰে। প্ৰাৰম্ভিক আসন-অনুমান অনুসৰি, ‘ষ্টুডেণ্ট লিষ্ট’ই ১৩৫ৰ পৰা ১৪০খন আসন লাভ কৰিব পাৰে। চৰকাৰ গঠনৰ বাবে ২৫০খন আসনৰ সংসদত ১২৬খন আসনৰ প্ৰয়োজন। অৱশ্যে, আসনৰ চূড়ান্ত সংখ্যা নিৰ্বাচন আয়োগৰ সম্পূৰ্ণ ফলাফলৰ ওপৰত নিৰ্ভৰশীল।

‘ষ্টুডেণ্ট লিষ্ট’ৰ অৰ্থ এইটো নহয় যে নিৰ্বাচনত কেৱল ছাত্ৰ-ছাত্ৰীয়েহে প্ৰাৰ্থিত্ব আগবঢ়াইছিল। ছাত্ৰ আন্দোলনৰ সমৰ্থনত গঠিত এই নিৰ্বাচনী মঞ্চত বিশ্ববিদ্যালয়ৰ অধ্যাপক, চিকিৎসক, কৃষক আৰু নাগৰিক সমাজৰ বিভিন্ন ক্ষেত্ৰৰ প্ৰতিনিধি আছে। আন্দোলনৰ সামূহিক চৰিত্ৰ অক্ষুণ্ণ ৰাখিবলৈ ইয়াৰ নেতৃত্বই এজন নিৰ্দিষ্ট ৰাজনৈতিক নেতাক কেন্দ্ৰ কৰি প্ৰচাৰ চলোৱাৰ পৰিৱৰ্তে বিভিন্ন ক্ষেত্ৰৰ প্ৰতিনিধিক একত্ৰিত কৰাৰ কৌশল গ্ৰহণ কৰিছিল।

দেওবাৰে নিশা প্ৰাৰম্ভিক নিৰ্বাচনী ফলাফল স্পষ্ট হোৱাৰ পিছত ভুচিচে টেলিভিছনত দিয়া ভাষণত পৰাজয় স্বীকাৰ কৰে। তেওঁ কয় যে নিৰ্বাচনত ‘ষ্টুডেণ্ট লিষ্ট’ জয়ী হৈছে আৰু তেওঁৰ শিবিৰে নিৰ্বাচনত পৰাজয় বৰণ কৰিছে। ভুচিচৰ এই স্বীকাৰোক্তিৰ পিছত ৰাজধানী বেলগ্ৰেডকে ধৰি বিভিন্ন চহৰত ছাত্ৰ-ছাত্ৰী আৰু সমৰ্থকসকলে ৰাজপথলৈ ওলাই আহি উদ্‌যাপন কৰে। পথত সমবেত জনতাই শ্ল’গান দিয়ে, বাহনৰ হৰ্ণ বজায় আৰু বিভিন্ন স্থানত আনন্দ প্ৰকাশ কৰে। এই ফলাফলক ছাৰ্বিয়াৰ ৰাজনীতিত এক উল্লেখযোগ্য পৰিৱৰ্তন হিচাপে দেখা হৈছে। অৱশ্যে, নিৰ্বাচনত জয়লাভ কৰাটো আৰু চৰকাৰ গঠন কৰি প্ৰতিশ্ৰুতি ৰূপায়ণ কৰাটো দুটা পৃথক প্ৰত্যাহ্বান। ছাত্ৰ আন্দোলনৰ সমৰ্থনত গঠিত মঞ্চখনৰ বাবে এতিয়া দুৰ্নীতিৰ বিৰুদ্ধে ব্যৱস্থা গ্ৰহণ, চৰকাৰী প্ৰতিষ্ঠানৰ স্বচ্ছতা বৃদ্ধি, শিক্ষা ব্যৱস্থাৰ উন্নতি আৰু জনসাধাৰণৰ আস্থা পুনৰ প্ৰতিষ্ঠাৰ দৰে দাবীসমূহ বাস্তৱায়িত কৰাটো হ’ব পৰৱৰ্তী পৰীক্ষা।

নিৰ্বাচনী জয়ৰ পাছতো ছাৰ্বিয়াৰ পৰৱৰ্তী চৰকাৰৰ নেতৃত্ব কোনে ল’ব, সেই বিষয়ে সম্পূৰ্ণ স্পষ্ট ছবি অহা নাই। ‘ষ্টুডেণ্ট লিষ্ট’ৰ সৈতে জড়িত চিকিৎসক তথা অধ্যাপক ইলিয়া শ্ৰদানভিচ আন্দোলনৰ এগৰাকী বিশিষ্ট প্ৰতিনিধি। তেওঁক সম্ভাব্য প্ৰধানমন্ত্ৰী হিচাপে লৈ আলোচনা চলিছে যদিও মঞ্চখনে চৰকাৰৰ চূড়ান্ত নেতৃত্ব আৰু মন্ত্ৰীসভাৰ গঠন আনুষ্ঠানিকভাৱে ঘোষণা কৰা নাই।

নিৰ্বাচনৰ চূড়ান্ত ফলাফল ঘোষণাৰ পিছত নতুন ৰাষ্ট্ৰীয় সংসদ গঠনৰ প্ৰক্ৰিয়া আৰম্ভ হ’ব। নিয়ম অনুসৰি, চূড়ান্ত ফলাফল ঘোষণাৰ ৩০ দিনৰ ভিতৰত নতুন সংসদ গঠন কৰিব লাগিব। তাৰ পিছত ৯০ দিনৰ ভিতৰত চৰকাৰ গঠনৰ প্ৰক্ৰিয়া সম্পূৰ্ণ কৰাৰ ব্যৱস্থা আছে। ‘ষ্টুডেণ্ট লিষ্ট’ই স্পষ্ট সংখ্যাগৰিষ্ঠতা লাভ কৰাৰ সম্ভাৱনাৰ বাবে আন দলৰ সৈতে দীৰ্ঘদিনীয়া মিত্ৰতা আলোচনাৰ প্ৰয়োজন কম হ’ব পাৰে। কিন্তু মন্ত্ৰীসভাৰ গঠন আৰু প্ৰশাসনিক দায়িত্ব বণ্টনৰ ক্ষেত্ৰত আন্দোলনৰ বিভিন্ন অংশৰ মাজত ঐকমত্য গঢ়ি তোলাটো গুৰুত্বপূৰ্ণ হ’ব। ইয়াৰ উপৰি, ভুচিচৰ ৰাষ্ট্ৰপতি পদৰ পৰৱৰ্তী অৱস্থাও ছাৰ্বিয়াৰ ৰাজনীতিৰ আন এটা গুৰুত্বপূৰ্ণ দিশ। সংসদীয় নিৰ্বাচনত তেওঁৰ শিবিৰৰ পৰাজয়ৰ ফলত দীৰ্ঘদিনীয়া ৰাজনৈতিক আধিপত্যত আঘাত লাগিছে যদিও ৰাষ্ট্ৰপতি পদ আৰু চৰকাৰ গঠনৰ সাংবিধানিক প্ৰক্ৰিয়া পৃথক। সেয়েহে নিৰ্বাচনী ফলাফলৰ ভিত্তিত সকলো সাংবিধানিক পদৰ পৰিৱৰ্তন ইতিমধ্যে সম্পূৰ্ণ হৈছে বুলি ক’ব নোৱাৰি।

ছাৰ্বিয়াৰ নিৰ্বাচনে পুনৰ দেখুৱাইছে যে এটা নিৰ্দিষ্ট ঘটনাক কেন্দ্ৰ কৰি আৰম্ভ হোৱা প্ৰতিবাদে যদি বৃহত্তৰ প্ৰশাসনিক আৰু ৰাজনৈতিক প্ৰশ্নৰ সৈতে সংযোগ স্থাপন কৰে, তেন্তে সি নিৰ্বাচনী ৰাজনীতিতো প্ৰভাৱ পেলাব পাৰে। নোভি ছাদৰ ৰে’ল ষ্টেচনৰ ছাউনি খহি ১৬জন লোকৰ মৃত্যুৰ ঘটনাই যি ক্ষোভৰ সৃষ্টি কৰিছিল, সেয়া কেৱল দুৰ্ঘটনাটোৰ তদন্তৰ দাবীতে সীমাবদ্ধ নাথাকিল। ক্ৰমে ই দুৰ্নীতি, জবাবদিহি, প্ৰতিষ্ঠানৰ স্বাধীনতা আৰু শাসনৰ স্বচ্ছতাৰ দাবীৰ সৈতে সংযুক্ত হৈ পৰে। তথাপি, নিৰ্বাচনী বিজয়ে আন্দোলনৰ সকলো দাবী পূৰণ হোৱাৰ নিশ্চয়তা নিদিয়ে। বিভিন্ন সামাজিক আৰু পেছাগত পটভূমিৰ লোকক একত্ৰিত কৰা ‘ষ্টুডেণ্ট লিষ্ট’ৰ সন্মুখত এতিয়া এক উমৈহতীয়া নীতি-কাৰ্যসূচী ৰূপায়ণৰ দায়িত্ব আহি পৰিছে। চৰকাৰী প্ৰতিষ্ঠানৰ সংস্কাৰ, দুৰ্নীতিৰ তদন্ত, শিক্ষা আৰু কৰ্মসংস্থাপনৰ উন্নতিৰ লগতে বৈদেশিক সম্পৰ্কৰ ক্ষেত্ৰতো নতুন চৰকাৰৰ সিদ্ধান্ত গুৰুত্বপূৰ্ণ হ’ব। কিন্তু আলেকজেণ্ডাৰ ভুচিচৰ দীৰ্ঘদিনীয়া ৰাজনৈতিক আধিপত্যৰ অন্ত পৰাৰ সম্ভাৱনাই ছাৰ্বিয়াৰ ৰাজনীতিত এক নতুন অধ্যায়ৰ সূচনা কৰিছে। কিন্তু এই পৰিৱৰ্তনৰ স্থায়িত্ব নিৰ্ভৰ কৰিব নিৰ্বাচনত জয়ী হোৱা শক্তিয়ে ৰাজপথৰ আন্দোলনৰ দাবীসমূহক কিমানখিনি কাৰ্যকৰী নীতি আৰু প্ৰশাসনিক সংস্কাৰলৈ ৰূপান্তৰিত কৰিব পাৰে, তাৰ ওপৰত।

ছাৰ্বিয়াৰ ছাত্ৰ আন্দোলনৰ পৰিণতিয়ে সম্প্ৰতি ভাৰতত মোদী চৰকাৰৰ বিৰুদ্ধে চলি থকা চিজেপিৰ আন্দোলনক প্ৰাসংগিক কৰি তুলিছে। একে সময়তে চৰ্চালৈ আহিছে বাংলাদেশৰ ছাত্ৰ আন্দোলন আৰু নেপালৰ জেন-জিৰ আন্দোলনো। বাংলাদেশত ২০২৪ৰ ছাত্ৰ-নেতৃত্বাধীন গণঅভ্যুত্থানে শ্বেখ হাছিনা চৰকাৰৰ পতন ঘটালেও আন্দোলনৰ পৰা জন্ম লোৱা নেচনেল চিটিজেন পাৰ্টিয়ে ২০২৬ৰ নিৰ্বাচনত মাত্ৰ ৬খন আসনহে লাভ কৰে; তাৰ বিপৰীতে বি এন পিয়ে সংখ্যাগৰিষ্ঠতা লাভ কৰি চৰকাৰ গঠন কৰে। নেপালত ২০২৫ৰ জেন জি আন্দোলনৰ পাছত ২০২৬ৰ নিৰ্বাচনত ৰাষ্ট্ৰীয় স্বতন্ত্ৰ পাৰ্টিয়ে ১৮২খন আসন লাভ কৰি চৰকাৰ গঠন কৰে। ভাৰতত পৰীক্ষাৰ অনিয়ম, নিযুক্তি আৰু শিক্ষাৰ বিভিন্ন সমস্যাক লৈ ছাত্ৰ আন্দোলনে সময়ে সময়ে চৰকাৰৰ ওপৰত হেঁচা সৃষ্টি কৰি আহিছে যদিও ইয়াৰ ৰাজনৈতিক পৰিণতি প্ৰতিটো ঘটনাতে একে হোৱা নাই। এই তুলনাই দেখুৱায়—ৰাজপথৰ আন্দোলনে চৰকাৰ সলনি কৰিব পাৰে, কিন্তু আন্দোলনৰ নেতৃত্ব দিয়া শক্তিয়েই যে নিৰ্বাচনত জয়ী হৈ চৰকাৰ গঠন কৰিব, তাৰ নিশ্চয়তা নাই।